ALOLE yitela yelewuyo, maluŵa gakusalala, soni matumbi gamalewugo. Ana pelepa ngapakusalala? Alole mwajikulila ngolombwe m’miyala mwa kamcandako. Alole masimba, soni mahaci gagajimi pa mopo wakusalalawo. Ana mpaka asace nyumba jawo jili pamalo mpela gelega?

Mlungu akusaka kuti wawojo catame mu paladaiso kwangamala pacilambo capasi. Ngakusaka kuti wawojo apikaneje yakupweteka, kapena asimaneje ni yakusawusya mpela mwayiŵelele lelo jino. Baibulo jikusasala cilanganoci kwa ŵandu ŵacacitama mu paladaiso jwasambano kuti: ‘Mlungu caciŵa nawo. Ngasipapagwasoni ciwa kapena kulila kapena yakupweteka. Yindu yakalayo yipite.’

Yesu cacilolecesya kuti kusinda kwakusangalasyaku kutendekwe. Ana akumanyilila kuti yicitendekwa cakaci? Panyuma pakutyosya yakusakala yosope, soni ŵandu ŵakusakala pacilambo capasi. Akumbucile kuti Yesu paŵaliji pacilambo capasi ŵaposisye ŵandu ŵakulwala yilwele yakulekanganalekangana, soni ŵakombolece atamose kwimusya ŵandu ku ŵawe. Yesu ŵatesile yeleyi pakusaka kulosya kuti cacitenda yeleyi pacilambo cosope capasi pacaciŵa Mwenye jwa ucimwene wa Mlungu.

Agambe ganicisya mwayiciŵela yakusangalasya mu paladaiso jwasambano pacilambo capasi! Yesu, yimpepe ni ŵandu ŵane ŵakwasagula, caciŵa ali mkulamulila kwinani. Ŵakulamulilaŵa cacisamalila jwalijose, soni cacilolecesya kuti ŵandu ali ŵakusengwa. Kwende tulole yatukusosekwa kutenda kuti tuŵe ŵakusimicisya kuti Mlungu cacitupa umi wangamala mu paladaiso jwasambano.