ILAWIL le nukuch cheʼoboʼ, le jatsʼuts looloʼoboʼ yéetel le kaʼanal witsoʼoboʼ. ¿Máasaʼ jach jatsʼutstak? Ilawil le kéej ku janal tu kʼab le chan paaloʼ. Il xan le leónoʼob yéetel le tsíimnoʼob yaan teʼ dibujoaʼ. ¿A kʼáat wa kajtal tiʼ upʼéel jatsʼuts Luʼum jeʼex lelaʼ?

Dioseʼ u kʼáat ka kuxlakech utiaʼal mantatsʼ teʼ Luʼum sutaʼan paraísoiloʼ, teʼeloʼ mix baʼal kun muʼyajtbiliʼ. Bey le kuxtal kiaʼalik le Biblia kun yantal tiʼe máaxoʼob kun kajtaloʼob teʼ paraísooʼ. Dioseʼ yaan u yantal tu yéeteloʼobiʼ. Maʼ kun kaʼa antal kíimil, mix okʼol, mix kʼiʼinamil. Le úuchben baʼaloʼobaʼ maʼ kun kʼaʼajsbiloʼob tu kaʼatéen.

Jesús kun beetik u yantal le jatsʼuts kuxtalaʼ. ¿Baʼax kʼiin túun ken u beete? Le ken tsʼoʼokok u luʼsik tuláakal le kʼaas ku beetaʼal yóokʼol le Luʼumaʼ bey xan tiʼ le máaxoʼob beetkoʼ. Kʼaʼajaktecheʼ, ka taal Jesús way Luʼumeʼ tu tsʼakaj yaʼab máakoʼob, yéetel yaan tu kaʼa kuxkíintiʼ. Bey túunoʼ Jesuseʼ tu yeʼesaj le jatsʼuts baʼaloʼob ken u beet ken káajak u reinar yóokʼol le Luʼumaʼ.

¡Chéen tukult bukaʼaj jatsʼutsil kun kuxtal máak teʼ túumben paraísooʼ! Jesuseʼ yaan u gobernar teʼ kaʼan yéetel le máaxoʼob u yéeymajoʼ. Yaan u taaskoʼob kiʼimak óolal yéetel yaan u tsʼáaikoʼob tuláakal le baʼax kʼaʼabéet tiʼe máaxoʼob kun kajtaloʼob teʼ paraísooʼ. Koʼox kanik baʼax kʼaʼabéet k-beetik utiaʼal ku tsʼáatoʼon Dios le kuxtal minaʼan u xuul teʼ Luʼum sutaʼan paraísoiloʼ.