BUSHE nawishiba ifyo uyu umwaice na banankwe balebelenga? Balebelenga ili line ibuuku na iwe ulebelengako ilitwa ati Icitabo ca Malyashi ya mu Baibolo. Kabili balebelenga ili line ilyashi ilyo na iwe ulebelengako, ilileti: “Ifingalenga Tukekale Umuyayaya.”

Bushe nawishiba ifyo balesambilila? Ica kubalilapo ca kuti, pa kuti tukekale umuyayaya, tufwile ukwishiba Yehova no Mwana wakwe, Yesu. Baibolo itila: ‘Pa kuti tukakwate umweo wa muyayaya, tufwile ukusambilila pali Lesa wa cine, na pali Yesu Kristu, Umwana wakwe uo atumine pano isonde.’

Kuti twasambilila shani pali Yehova Lesa no Mwana wakwe Yesu? Cimo icingatwafwa, kulabelenga ici cine Icitabo ca Malyashi ya mu Baibolo. Calilanda ifingi pali Yehova na Yesu. Kabili cilatweba ifintu ifingi pa fyo baacita e lyo ne fyo bakacita ku ntanshi. Lelo icifwaikwa te kubelenga fye ili ibuuku.

Bushe naulimona ibuuku limbi ilili pa nshi? Ni Baibolo. Kuti waebako bamo ukulakubelengela amalembo ya mu Baibolo umwafuma amalyashi yaba muli lino ibuuku. Baibolo ilatweba fyonse ififwaikwa pa kuti tulebombela Yehova ukulingana ne fyo afwaya na pa kuti tukakwate umweo wa muyayaya. E ico tufwile ukulabelenga Baibolo lyonse.

Lelo ukusambilila pali Yehova Lesa na Yesu Kristu, te cifwaikwa fye. Kuti twaishiba ifingi pali bena na pa fyo basambilisha, nomba twafilwa ukukwata umweo wa muyayaya. Bushe walishiba fimbi ififwaikwa?

Tufwile ukulacita ne fyo tusambilila. Bushe wamwibukisha Yuda Iskariote? Ali pa batumwa 12 abo Yesu asalile. Yuda alishibe ifingi sana pali Yehova na Yesu. Nomba cinshi camucitikile? Pa numa aishilekwata umutima uubi no kushitisha Yesu ku balwani bakwe pa ndalama sha silfere 30. E ico Yuda takakwate umweo wa muyayaya.

Bushe ulemwibukisha Gehasi, uo twasambililepo mu Lyashi 69? Alefwaya ukukwata ifya kufwala ne ndalama ifishali fyakwe. E ico alibepele pa kuti bamupeele ifi fintu. Lelo Yehova alimukandile. Na ifwe akatukanda nga tatuleumfwila amafunde yakwe.

Lelo kwali abantu abasuma abengi abatwalilile ukubombela Yehova. E bo tufwaya ukupashanya, bushe te ifyo? Ufwile ukuba nga Samwele uwacaice. Ibukisha filya twasambilile mu Lyashi 55 ukuti, ali fye ne myaka 4 nelyo 5 ilyo atendeke ukubombela Yehova pe tempele. Kanshi nangu fye uli mwaice, kuti wabombela Yehova.

Nomba uo bonse tufwaya sana ukupashanya, ni Yesu Kristu. Inshita imo ali mwi tempele alelanda na bantu bambi pali Wishi wa mu muulu ninshi ali fye umwaice, nge fyo wamwene mu Lyashi 87. Natulemupashanya. Tufwile ukulaebako abantu abengi pali Yehova Lesa no Mwana wakwe, Yesu Kristu pantu basuma. Nga tulecita ifi, tukekala umuyayaya pano isonde muli paradaise iyo Lesa akaleta.