SMOL gel ya mo tufala fren blong hem, trifala i stap ridim wanem? Yes, trifala i stap ridim buk ya — Buk Blong Ol Baebol Stori. Trifala i stap ridim semfala stori we yu yu stap ridim — “?Yumi Mas Mekem Wanem Blong Laef Olwe?”

Olgeta ya oli stap lanem wanem? Fastaem, oli lanem se, sipos yumi wantem laef olwe, yumi mas save Jeova mo Pikinini blong hem, Jisas. Baebol i talem se: ‘Sipos yu wantem kasem laef we i no save finis, yu mas savegud God ya we hem nomo i trufala God, mo yu mas save Pikinini blong hem, Jisas Kraes, we God i sanem hem i kam long wol ya.’

?Olsem wanem blong save Jeova God mo Pikinini blong hem Jisas? Wan rod, i blong ridim buk ya, Buk Blong Ol Baebol Stori, stat long faswan stori go kasem en blong hem. Buk ya i givim plante save long saed blong Jeova mo Jisas. Hem i tokbaot plante samting we tufala i mekem finis, mo plante samting we bambae tufala i mekem yet. Be i no naf blong ridim buk ya nomo.

Long pija ya, i gat wan narafala buk i stap long floa. ?Wanem buk ya? Hemia Baebol. I gud yu askem long wan man blong ridim ol haf blong Baebol we ol stori ya oli stanap long hem. Baebol i givim olgeta save we yumi nidim blong yumi save mekem wok blong Jeova long fasin we i stret, nao long rod ya, yumi save laef olwe. Taswe, yumi mas stadi Baebol oltaem.

Sipos yumi kasem save long Jeova God mo Jisas Kraes, be hemia i no naf yet. Yumi save gat fulap save long saed blong tufala ya mo ol tijing blong tufala, be maet God i luk se yumi no naf yet blong laef olwe. ?Wanem moa we yumi nidim?

Yumi mas mekem ol samting we yumi lanem, oli wok blong laef blong yumi. Tingbaot Judas Iskariot bakegen. Hem i wan long ol 12 aposol we Jisas i jusumaot. Judas i gat plante save long saed blong Jeova mo Jisas. ?Be wanem i hapen long hem? Smoltaem i pas, nao hem i stat tingbaot ol samting we hem nomo i wantem. Biaen, hem i putum Jisas long han blong ol enemi blong hem, blong kasem 30 silva mane. Taswe, Judas bambae i no kasem laef blong olwe.

Yu yu rimemba man ya Gehasi long Stori 69? Hem i wantem sam klos mo mane we oli no blong hem. Ale hem i giaman blong i save kasem ol samting ya. Be Jeova i panisim hem. Sipos yumi no obei long ol loa blong Jeova, bambae hem i panisim yumi tu.

Yumi mas olsem ol gudfala man we oli bin holemstrong long Jeova. I gat plante we oli mekem olsemia. Smol Samuel, hem i wan gudfala eksampol we yumi save folem. Stori 55 i talem se, taem hem i gat fo no faef yia nomo, hem i stat mekem wok long haos tapolen blong Jeova. Taswe, nomata sipos yu yu smol nomo, be yu save mekem wok blong Jeova.

Nambawan man we yumi evriwan i wantem folem, hemia Jisas Kraes. Stori 87 i soem se taem hem i wan smol boe nomo, hem i stap sidaon long haos blong God, i stap storian wetem ol narafala long saed blong Papa blong hem long heven. I gud yumi folem eksampol blong hem. Yumi mas storian long olgeta man we yumi mitim olgeta, long saed blong nambawan God Jeova mo Pikinini blong hem, Jisas Kraes. Sipos yumi mekem olsemia, bambae yumi save laef olwe long niufala paradaes we God bambae i mekem long wol ya.

Jon 17:3; Ol Sam 145:1-21.