Maana 116nan

Ɲɛnamaya banbali bɛ sɔrɔ cogo min na

YALA i bɛ se k’a fɔ dennin n’a teriw bɛ ka fɛn min kalan wa? I bɛ ka nin gafe min kalan, u bɛ ka o ɲɔgɔn de kalan: o ye Bibulu maanaw gafe ye. I bɛ ka maana min kalan tigitigi, u bɛ ka o de fana kalan. O maana tɔgɔ ye ko: “Ɲɛnamaya Banbali bɛ sɔrɔ cogo min na.”

I b’a dɔn u bɛ ka min kalan wa? Ko ni an b’a fɛ ka ɲɛnamaya banbali sɔrɔ, a fɔlɔ ye an ka dɔnniya sɔrɔ Jehova ko la ani a Denkɛ Yesu ko la. Bibulu b’a fɔ ko: ‘Ɲɛnamaya banbali bɛ sɔrɔ nin cogo de la: Ka Ala sɛbɛ kelenpe dɔn ani ka a Denkɛ Yesu Krisita dɔn, a ye o min ci ka na dugukolo kan.’

An bɛ se ka dɔnniya sɔrɔ Jehova Ala ni a Denkɛ Yesu ko la cogo di? A cogo dɔ ye ka Bibulu maanaw gafe kalan, k’a ta a daminɛ na ka na a bila a laban na. A bɛ fɛn caman fɔ an ye Jehova ni Yesu kan. O tɛ tiɲɛ ye wa? U ye fɛn minnu kɛ, ani u bɛna fɛn minnu kɛ, a bɛ caman fɔ an ye o kan. Nka, an man kan ka dan o gafe kalanni dɔrɔn ma. An ka kan ka fɛn wɛrɛ kɛ ka fara o kan.

I ɲɛ bɛ kitabu tɔ kelen na duguma wa? Bibulu de don. A fɔ dɔ ye a ka maanaw kalan Bibulu kɔnɔ yɛrɛ. An mago bɛ kunnafoni minnu na walisa an bɛɛ ka se ka Jehova bato cogo tilennen na ani ka ɲɛnamaya banbali sɔrɔ, Bibulu bɛ kunnafoni bɛɛ di an ma o ko kan. O la sa, an ka kan ka to ka Bibulu kalan tuma bɛɛ.

Nka, ka dɔnniya sɔrɔ Jehova Ala ni Yesu Krisita ko la, o tɛ bɔli kɛ. An bɛ se ka fɛn caman-caman dɔn olu ni u ka kalansiraw kan, nka o bɛɛ n’a ta, o dɔrɔn tɛna a to an ka ɲɛnamaya banbali sɔrɔ. An mago bɛ fɛn wɛrɛ la. I b’a dɔn o ye min ye wa?

An ye fɛn minnu kalan, an ka kan ka an ka ɲɛnamaya kɛ ka bɛn olu ma. Yala i hakili bɛ Juda Isikariɔti la wa? Yesu tun ye mɔgɔ 12 minnu sugandi ka kɛ a ka cidenw ye, Juda tun ye olu dɔ la kelen ye. A tun bɛ fɛn caman dɔn Jehova ni Yesu ko la, nka a labanna cogo di? A nana kɛ nataba ye, ka Yesu don a juguw bolo warijɛ 30 kun kɔrɔ. Juda tɛna ɲɛnamaya banbali sɔrɔ.

 I hakili bɛ Gehazi la wa? An kumana ale kan maana 69nan na. A tun b’a fɛ ka dulokiw ni wari sɔrɔ minnu tun tɛ a ta ye. O kosɔn, a ye nkalon tigɛ walisa ka se k’o fɛnw sɔrɔ. Nka Jehova y’a ɲangi. A na an fana ɲangi ni an ma tugu a ka sariyaw kɔ.

Nka, mɔgɔ ɲuman caman bɛ yen minnu ye Jehova bato ni kantigiya ye. An b’a fɛ ka kɛ i ko olu. Tari di? Samuɛl fitininnama ye misali ɲuman min jira, an bɛ se ka o ladege. I hakili b’a la wa? An y’a ye maana 55nan na, ko a ye baara daminɛ Jehova ka finiso la, k’a si to san 4 walima san 5 dɔrɔn de la. O la sa, i mana kɛ denmisennin ye cogo o cogo, o tɛ i bali i ka se ka baara kɛ Jehova ye.

A jɛlen don ko an bɛɛ b’a fɛ ka tugu mɔgɔ min kɔ, o ye Yesu Krisita ye. Kabini a denmisɛnnama, i n’a fɔ a jiralen bɛ cogo min na maana 87 la, Yesu tun taara Alabatoso kɔnɔ ka kuma a sankolola Fa kan. An ka Yesu ka misali ladege. An ka kuma bɛɛ ye, an ka Ala ɲuman Jehova ani a Denkɛ Yesu Krisita ko la. Ni an bɛ o kow kɛ, an na se ka ɲɛnamaya banbali sɔrɔ Ala ka alijinɛ kura kɔnɔ, dugukolo kan.

Yuhana 17:3; Zaburu 145:1-21.