YENA unanyingika yize kanuke au ni masepa jenyi anatange? Ewa, mukanda unowene yena unatanga—Mukanda Wami wa Yishima ya Mbimbiliya. Nawa ayo kanatanga chishima achi—“Kuchi Mutuhasa Kutwama Ku Miaka Yeswe.”

Yena unanyingika yize ayo analilongesa? Chitangu, yetwe chatutamba kunyingika hakutwala kuli Yehova ni Mwanenyi Yesu, nyi tunazange kutwama ku miaka yeswe. Mbimbiliya yinambe ngwo: ‘Chenacho chatamba kulinga hanga tukatwame ku miaka yeswe. Lilongese hakutwala kuli Zambi wamwenemwene, ni Mwanenyi yoze iye atumine hano hashi, Yesu Kristu.’

Kuchi mutuhasa kulilongesa hakutwala kuli Yehova Zambi ni Mwanenyi Yesu? Yimwe jila yili, kutanga Mukanda Wami wa Yishima ya Mbimbiliya, chize ku uputukilo ndo kusongo. Mukanda uno wakuhanjika chinji hakutwala kuli Yehova ni Yesu, nyi ngwami? Nawa wakuhanjika hakutwala ku yuma yize ayo anakalinga ni yize malinga. Alioze, chatutamba kulinga yuma yikwo nawa, hi kutanga mukanda uno wika ko.

Yena unamono mukanda ukwo au uli hashi? Yili Mbimbiliya. Eta kuli umwe mutu hanga akutangile yihanda ya mu Mbimbiliya yize yinahanjika hakutwala ku yishima yino yili mu mukanda uno. Mbimbiliya yinatulumbunwina yuma yeswe yize yetwe tunafupu hanga tunyingike chize chatamba kulingila kanawa Yehova ni chize mutupwa ni mwono wa mutolo. Kashika, yetwe chatutamba kupwa ni ndako ya kulilongesa Mbimbiliya matangwa eswe.

Alioze, hi kulilongesa wika ko hakutwala kuli Yehova ni Yesu Kristu ka. Yetwe mutuhasa kupwa ni yinyingi yinji hakutwala kuli ayo ni ya malongeso jo, alioze chipwe chocho tuchikuhasa kupwa ni mwono wa mutolo. Yena unanyingika yize chatamba kulinga nawa?

Yetwe chatutamba kutwama nikulita ni yuma yize tunalilongesa. Yena uneuluka Yundase Ka-Keriote? Iye te umwe wa kuli 12 waze Yesu asakwile hanga apwe apostolo jenyi. Yundase kanakapwa ni yinyingi yinji hakutwala kuli Yehova ni Yesu. Alioze, yika yinakapwa kuli iye? Kanakapwa ni chipululu, kashika anakakunjika Yesu kuli akwa kole jenyi, ha 30 a mbongo ja prata. Kashika, Yundase kechi kamwaha mwono wa mutolo.

Uneuluka Ngehaze, lunga yoze twalilongesanga ha Chishima 69? Iye yazanga kupwa ni amwe mahina ni mbongo jambala. Kashika, iye yahanjika mahuza hanga ahase kupwa ni yuma yacho. Alioze, Yehova yamumwesa lamba. Nawa ni yetwe nyi twehuka ku shimbi jenyi iye matumwesa lamba.

Alioze, kunakapwa atu anji apema waze anakalingila Yehova ni ushishiko weswe. Yetwe tunazange kupwa ngwe ayo, nyi ngwami? Kanuke Samuele kali chimwe chilweza chipema chize yetwe mutuhasa kukaula. Euluka ngwo, muze twalilongesanga Chishima 55, iye te uchili wika ni miaka yiwana hanji yitano muze aputukile kulingila Yehova, mu tabernakulu yenyi. Kashika, chipwe ngwe ni yena uchili kanuke chinji, nihindu muhasa kulingila Yehova.

Chamwenemwene, mutu yoze yetwe eswe tunazange kukaula mwe Yesu Kristu. Chipwe muze iye te uchili kanuke, ngwe chize twamonanga ha Chishima 87, iye kayile mu tembele ni kuhanjika ni akwo hakutwala kuli Tato wa mu malilu. Tukaulenu chilweza chenyi. Twambujolenu kuli atu anji hakutwala kuli Zambi wetu mupema Yehova, ni Mwanenyi Yesu Kristu. Nyi twalinga yuma yino, mutukahasa kutwama ku miaka yeswe mu paraisu yaha ya Zambi hano hashi.