NGAKCHIANUTE le a hawile cu zeidah an rel lengmang nan chim kho maw? A si, nanmah nan rel lengmang ve mi — Ka Baibal Tuanbia Cauk hi a si. Cun nanmah nan rel lengmang mi — “Zeitindah Zungzal Nunnak Kan Hmuh Khawh Lai,” ti mi tuanbia hi an rel lengmang ve.

Zeidah an cawn nan hngal maw? Hmasa bik ah, zungzal in nun kan duh ahcun Jehovah le a Fapa Jesuh kong kan hngalh a herh. Baibal nih: ‘Hihi zungzal nunnak lam a si. A hmaan mi Pathian le vawlei i a run thlah mi a Fapa Jesuh Kri kong kha hngalh awk ah cawng u,’ a ti.

Zeitindah Jehovah Pathian le a Fapa Jesuh kong cu kan hngalh khawh lai? Lam khat cu, a hramthok in a dongh tiang Ka Baibal Tuanbia Cauk rel hi a si. Jehovah le Jesuh kong tampi a kan chimh, a si lo maw? Cun an tuah cia mi thil le an tuah te lai mi thil kong tampi a kan chimh fawn. Sihmanhsehlaw hi cauk rel sawhsawh lawng in a za lo.

Zelṭuang cung i a um mi adang cauk pakhat khi nan hmu maw? Baibal a si. Hi cauk chung i tuanbia pawl cherhchan mi Baibal cheukhat hna kha mi pakhatkhat relter tuah hna. A hmaan mi lam in Jehovah kha kan biak i zungzal nunnak kan hmuh khawh nak hnga Baibal nih a herh mi fimnak vialte tling tein a kan pek khawh. Cucaah Baibal a caan hmaan tein rel le cawn cu kan zia ah kan canter lai.

Sihmanhsehlaw Jehovah Pathian le Jesuh Kri kong hngalh lawng cun a za rih lo. Anmah kong le an cawnpiaknak kong tampi kan hngalh ko nain zungzal nunnak cu kan sung kho ko. Zeidah a herh rih nan hngal maw?

Kan hngalh mi he aa tlak in kan nun a herh cio. Judas Iskariot kha nan hngal ti maw? Amah cu Jesuh nih a thim mi a lamkaltu 12 chung ah aa tel ve mi a si. Judas nihcun Jehovah le Jesuh kong tampi a hngalh ko. Sihmanhsehlaw zeitindah a rak um? Tlawmpal hnu ah hakkauhnak ahung ngei i Jesuh kha a ral hna sin ah ngun tangka 30 ah a zuar ko. Cucaah Judas cu zungzal nunnak a hmu lai lo.

Tuanbia 69 i kan cawn cang mi Gehazi kong kha nan hngal ti maw? Amah ta a si lo mi thilpuan tlawmpal le tangka kha a rak duh. Cuaah hi thil hna hmuh awk ah lihbia a rak chim. Sihmanhsehlaw Jehovah nih amah cu dan a tat. Kanmah zong a nawlbia kan zulh lo ahcun dan a kan tat ve lai.

Sihmanhsehlaw zumhfek tein Jehovah a rak bia zungzal mi miṭha tampi an um ve ko. Anmah bantuk cu si kan duh, a si lo maw? Ngakchiapa Samuel cu kanmah caah zohchunh awk ṭha ngai a si. Tuanbia 55 ah kan hmuh cang bangin, a biakinn chung ah Jehovah a rian ṭuan aa rak i thok lio ah khan kum li kum nga hrawng lawng a rak si rih. Cucaah zeitluk ngakchia nan si zong ah, Jehovah a rian ṭuan awk ah nan no tuk ve lo.

A si ko, kan zapi in zulh kan duh mi cu Jesuh Kri a si. Tuanbia 87 chung i kan hmuh bang in ngakchiate a si rih ko lio hmanh ah biakinn ah vancung i a Pa kong a rak chim. Amah cu i zohchunh ko u sih. Khuaruahhar awk tlak a si mi kan Pathian Jehovah le a Fapa Jesuh Kri kong kha kan chim khawh chung in mi tampi sin ah chim ve hna u sih. Hihi kan tuah ahcun vawlei cung i Pathian paradis thar chung ah zungzal in kan nung kho ve lai.