ESKI ou kapab dir ki sa pti fiy ek son bann zanmi pe lir? Wi, i sa menm liv ki ou pe lir—Mon Liv Zistwar Labib. E zot pe lir menm zistwar ki ou pe lir—“Ki nou kapab fer pour viv pour touzour.”

Eski ou konnen ki zot pe aprann? Premyerman, ki nou bezwen konn Zeova ek son Garson Zezi si nou anvi viv pour touzour. Labib i dir: ‘Vwala konman pour viv pour touzour. Aprann lo sa sel vre Bondye, ek son Garson ki i’n anvoy lo later, Zezi Kri.’

Konman ki nou kapab aprann lo Zeova ek son Garson Zezi? En fason se par lir Mon Liv Zistwar Labib depi konmansman ziska finisyon. I rakont en kantite keksoz lo Zeova ek Zezi, pa i vre? E i koz lo en kantite keksoz ki zot in fer e ki zot pou fer. Me nou bezwen fer plis ki zis lir sa liv.

Eski ou vwar sa lot liv ater? Sa i en Labib. Fer en dimoun lir avek ou en parti dan Labib dan ki sa bann zistwar sa liv i baze. Labib i dir nou tou keksoz ki nou bezwen afen ki nou tou nou kapab servi Zeova dan sa bon fason e ganny lavi eternel. Alor nou devret fer li en labitid pour etidye Labib souvan.

Me i pa ase pour zis aprann lo Zeova Bondye ek Zezi Kri. Nou kapab konn en kantite en kantite keksoz lo zot ek zot lansennyman, me kantmenm sa pa ganny lavi eternel. Eski ou konnen ki nou devret fer anplis?

Nou bezwen viv dapre bann keksoz ki nou’n aprann. Eski ou mazin Zida Iskaryot? I ti enn sa 12 dimoun ki Zezi ti swazir pour vin son zapot. Zida ti konn en kantite keksoz lo Zeova ek Zezi. Me ki ti arive avek li? Apre en serten letan, i ti vin egois, e i ti trai Zezi pour 30 pyes larzan avek son bann lennmi. Alor Zida pa pou ganny lavi eternel.

Eski ou mazin Geazi, sa zonm ki nou ti aprann lo li dan Zistwar 69? I ti oule en pe lenz ek larzan ki pa ti pour li. Alor i ti koz lalang pour ganny sa bann keksoz. Me Zeova ti pini li. E Zeova pou pini nou osi si nou pa obei son bann lalwa.

Me i annan en kantite bon dimoun ki toultan servi Zeova fidelman. Nou anvi vin parey zot, pa i vre? Samyel i en bon legzanp pour nou swiv. Mazinen, kan nou ti lir Zistwar 55, i ti annan selman 4 oubyen 5 an kan i ti konmans servi Zeova dan son tabernak. Menm si ou ankor zenn, ou kapab servi Zeova.

Byensir, sa dimoun ki nou tou nou anvi swiv i Zezi Kri. Menm kan i ti ankor en pti garson, parey i montre dan Zistwar 87, i ti la dan tanp pe koz avek lezot lo son Papa seles. Annou swiv son legzanp. Annou rakont en kantite dimoun otan ki nou kapab lo nou Bondye merveye Zeova ek son Garson, Zezi Kri. Si nou fer sa bann keksoz, nou pou alor kapab viv pour touzour dan nouvo paradi Bondye lo later.