NDÉPA reikuaa mbaʼépa ko mitãkuñaʼi ha iñamigokuéra oleehína? Upéicha, ko lívro nde releevareína... Che lívro omombeʼúva Istória oĩva Ñandejára Ñeʼẽme. Ha oleehína hikuái ko istória... “Mbaʼéichapa ikatu jaikove opa ára g̃uarã”.

Ndépa reikuaa mbaʼépa oaprende hikuái? Primero, ñaaprendevaʼerãha Jehová ha Itaʼýra Jesúsgui jaikove hag̃ua opa ára g̃uarã. La Biblia heʼi: ‘Kóva haʼe pe tape ogueraháva jeikove opaʼỹvape. Eaprende Ñandejára añetegua peteĩetévagui, ha Itaʼýra ombouvaʼekuégui ko Yvy ape ári, Jesucrísto’.

Mbaʼéichapa ikatu ñaaprende Ñandejára Jehová ha Itaʼýra Jesúsgui? Jajapokuaa upéva jaleéramo Che lívro omombeʼúva Istória oĩva Ñandejára Ñeʼẽme oñepyrũ guive opa peve. Ko lívro omombeʼu heta mbaʼe Jehová ha Jesús rehegua, ajépa? Ha omombeʼu heta mbaʼe haʼekuéra ojapovaʼekue ha ojapótava avei. Péro ndahaʼéi ko lívro añónte jaleevaʼerã.

Rehechápa pe ótro lívro oĩva yvýpe? Haʼe la Biblia. Ejerure oimeraẽvape tolee ndéve la Bíbliagui umi istória oĩva ko lívrope. La Biblia omeʼẽ ñandéve opa informasión ñaikotevẽva jaservi porã hag̃ua Jehovápe, ha jahupyty hag̃ua tekove opaʼỹva. Upévare jajepokuaavaʼerã jastudia meme la Biblia.

Péro ndahaʼéi jaikuaantevaʼerã Ñandejára Jehová ha Jesucrístogui. Ikatu jaikuaa heta mbaʼe chuguikuéra ha umi omboʼévagui, péro ndajahupytýi gueteri tekove opaʼỹva. Ndépa reikuaa mbaʼépa ñaikotevẽ avei?

Avei tekotevẽ jaiporu ñande rekovépe umi mbaʼe jaikuaáva. Nemanduʼápa Judas Iscariote rehe? Haʼe oĩvaʼekue umi 12 apóstol Jesús oiporavovaʼekue apytépe. Judas oguerekovaʼekue heta konosimiénto Jehová ha Jesúsgui. Péro, mbaʼépa oikóraʼe chugui? Ohasa riremi peteĩ tiémpo oiko chugui peteĩ persóna egoísta ha otraisiona Jesúspe 30 monéda de plátare. Júdaspe noñemeʼẽmoʼãi tekove opaʼỹva.

Nemanduʼápa Guehazi rehe? Ñaaprendékuri chugui pe Istória 69-pe. Haʼe oipotavaʼekue pláta ha ao ndahaʼéiva imbaʼe. Upévare ijapu oguereko hag̃ua koʼã mbaʼe, ha Jehová okastiga chupe. Ñandéve avei ñandekastigáta ndajajapóirõ Haʼe heʼíva.

Péro oĩ heta tapicha ipyʼaporãva oservi meme vaʼekue fielménte Jehovápe. Jaikose haʼekuéraicha, ajépa? Samuel haʼe peteĩ ehémplo porã. Nemanduʼáne, jahechahaguéicha pe Istória 55-pe, haʼe oguerekohague cuatro térã cinco áñonte oñepyrũrõ guare oservi Jehovápe itavernákulope. Upévare, nemitãramo jepe, ikatúma avei reservi Ñandejárape.

Añetehápe, enterove jajapose Jesucrístoicha. Haʼe imitãme gueteri, omombeʼuháicha pe Istória 87, oho témplope ha upépe oñeʼẽ ótrope Itúva Jehovágui. Jajapovaʼerã haʼe ojapohaguéicha. Opa ikatúvape ñañeʼẽvaʼerã Ñandejára ijojahaʼỹva Jehovágui, ha Itaʼýra Jesucrístogui. Jajapóramo koʼã mbaʼe, ikatúta jaikove opa ára g̃uarã Ñandejára paraíso pyahúpe, ko Yvy ape ári.