INAI kekeni maragina bona ena turadia ese idia duahia noho bukana oi gwauraia diba, a? Oibe, oi ese hari oi duahia noho bukana idia duahia​—Lauegu Baibel Sivarai Bukana. Bona oi duahia noho sivaraina idia duahia​—“Mauri Hanaihanai Ita Abia Dalana.”

Idia dibaia noho gauna oi diba, a? Gau ginigunana be, bema ita ura mauri hanaihanai ita abia, Iehova bona ena Natuna Iesu ita diba be namo. Baibel ia gwau: ‘Mauri hanaihanai ena dala be inai. Dirava momokani tamona, bona tanobada dekenai ia siaia Natuna, Iesu Keriso, ita dibaia.’

Edena dala ai Iehova Dirava bona ena Natuna Iesu ita dibaia diba? Dala ta be Lauegu Baibel Sivarai Bukana ibounai ita duahia haorea. Iehova bona Iesu edia sivarai momo ia gwauraia, ani? Bona idia karaia vadaeni bona do idia karaia gaudia momo ia herevalaia danu. To, inai buka ita duahia sibona lasi, to gau ma haida danu ita karaia be namo.

Foloa dekenai ia noho buka oi itaia, a? Unai be Baibel. Namona be ta ese inai buka lalonai idia noho siri ibounai be oi dekenai ia duahia. Baibel ese ita dekenai ita abia be namo hereva ibounai ia henia, unai amo dala maorona ai Iehova ita hesiai henia bona mauri hanaihanai ita abia diba. Unai dainai Baibel stadilaia hanaihanai karana ita manadalaia be namo.

To Iehova Dirava bona Iesu Keriso ita dibaia sibona be hegeregere lasi. Reana idia bona edia hahediba herevadia dekenai diba bada ita abia diba, to mauri hanaihanai ita reaia diba. Dahaka ita karaia danu be namo?

Gau badana be iseda mauri lalonai ita dibaia gaudia ita badinaia. Iuda Iskariote oi laloatao, a? Ia be Iesu ese ia abia hidi aposetolo taudia 12 ta. Iuda be Iehova bona Iesu ia diba momo. To ia dekenai dahaka ia vara? Nega sisina murinai sibona ena namo ia laloa, bona Iesu be ena inai taudia dekenai ia samania, siliva moni 30 ia abia totona. Unai dainai Iuda be mauri hanaihanai do ia abia lasi.

Sivarai 69 dekenai ita dibaia tauna, Gehasi, oi laloatao, a? Ia ura ma ta ena dabua bona moni haida ia abia. Unai dainai ia koikoi unai gaudia ia abia totona. To Iehova ese ia panisia. Bona ita do ia panisia danu bema ena taravatu ita badinaia lasi.

To taunimanima namodia momo be hanaihanai mai kamonai ida Iehova idia hesiai henia. Ita ura edia kara ita tohotohoa, ani? Samuela ena haheitalai ita tohotohoa be namo. Laloaboio lasi, Sivarai 55 dekenai ita itaia bamona, palai dubu dekenai Iehova ia hesiai henia matamaia neganai, ena mauri lagani be 4 eiava 5 sibona. Unai dainai herevana oi be maragi, Iehova oi hesiai henia diba.

Momokani, ita ibounai ita ura Iesu Keriso ena kara ita tohotohoa. Sivarai 87 ese ia hahedinaraia bamona, ia do mero maragi neganai, dubu lalonai ma haida dekenai ena guba Tamana ia herevalaia. Iena kara ita tohotohoa be namo. Namona be iseda Dirava namona Iehova bona ena Natuna Iesu Keriso be taunimanima momo dekenai ita herevalaia. Bema unai bamona ita karaia, Dirava ena tanobada paradaiso matamatana dekenai do ita noho hanaihanai diba.