Matu yenene vi okuhupa nga aruhe?
EHUNGI 116
Matu yenene vi okuhupa nga aruhe?
OKAKAZONA noupanga wako motjiperendero ho mave lese tjike? Owo mave lese embo ndi ove ndi mo lese, Embo randje romahungi wOmbeibela. Nowo mave lese ehungi ove ndu mo lese ndi mari tja: “Matu yenene vi okuhupa nga aruhe?”
Ove mo tjiwa kutja owo mave rihongo tjike? Rutenga, mave rihongo kutja twa sokutjiwa Jehova nOmuna we Jesus tji matu vanga okuhupa nga aruhe. Ombeibela mai tja: ‘Imbwi oomuano wokuhupa nga aruhe. Rihonga ohunga na Mukuru uatjiri erike, nOmuna eye ngwa hinda kombanda yehi, Jesus Kristus.’
Matu yenene vi okurihonga ohunga na Jehova Mukuru nOmuna we Jesus? Omuano umwe omokulesa Embo randje romahungi wOmbeibela okuza komautiro nga komaandero. Oro rihonga ovingi ohunga na Jehova na Jesus, katjiperi? Nu oro rihonga ovingi ohunga noviṋa mbi va tjita na mbi mave katjita. Nungwari eṱe matu sokutjita ovingi pendje nokulesa embo ndi.
Embo ndi ri pehi mbo ove mo ri munu? Oro Ombeibela. Ningira omundu me ku lesere otupa okuza mOmbeibela ku kwa zikamena omahungi wembo ndi. Ombeibela i tupa ondjiviro okuura ndji matu hepa kokutja atuhe tu yenene okukarera Jehova momuano omusemba nu tu mune omuinyo waaruhe. Okutja ngatu konḓonone Ombeibela aruhe.
Nungwari okurihonga ohunga na Jehova Mukuru na Jesus Kristus kaku ya yenena. Mape ya atu kara nondjiviro onyingi tjinene ohunga nawo, tjazumbo atu ha munu omuinyo waaruhe. Ove mo tjiwa kutja otjikwaye tjarwe tji matji hepwa?
Eṱe matu sokuhupa mombwaneno noviṋa mbi matu rihongo. Mo zemburuka Judas Iskariot? Eye wa ri umwe waimba 12 Jesus mba toororere okurira ovaapostele ve. Judas wa ri nondjiviro onyingi ohunga na Jehova na Jesus. Nakombanda yanao eye wa tjita otjiṋa otjivi? Otjikeṋa tja tjita? Eye wa uta okurivara omuini, nu wa horora Jesus koutupa wovisilveri 30. Okutja Judas ke nokumuna omuinyo waaruhe.
Mo zemburuka Gehasi, omurumendu ngu twe rihonga mEhungi 69? Eye aa vanga ozombanda novimariva mbi ha ri ovye. Okutja eye wa kora ovizeze kutja me vi mune. Nungwari Jehova we mu vera. Neye wina me tu vere indu tji tu hina okuṱakamisa omatwako we.
Nungwari ku novandu ovengi ovasemba mba karera Jehova nouṱakame. Matu vanga okukara tjimuna wo, poo vii? Otjihorera otjiwa kweṱe otjo hi otjaSamuel tja ri omuṱiṱi. Zemburuka, otja tjitwa muna mEhungi 55 kutja eye wa ri nozombura ine poo ndano uriri indu tja uta okukarera Jehova pondanda ye yomaturiro. Okutja kai na tja kutja u nozombura ngapi, ka ove omuṱiṱi tjinene okurihonga ohunga na Jehova.
Otjiperi kutja omundu ngu matu vanga okukongorera oJesus Kristus. Nandarire eye tja ri okazandona, otja tji twa muna mEhungi 87, eye wa ri mondembeli ama hungire navarwe ohunga na Ihe womeyuru. Ngatu kongorere otjihorera tje. Ngatu raere ovandu ovengi otja pu matu yenene ohunga na Mukuru wetu omuwa Jehova nOmuna we, Jesus Kristus. Indu tji twa tjiti nao, otji matu yenene okuhupa ngaaruhe moparadisa ombe yaMukuru kombanda yehi.
