WE NŨTONYA kũweta kĩla kelĩtu kaa na anyanyae meũsoma? Ĩĩ, nĩ ĩvuku o yĩĩ we ũũsoma—Ĩvuku Yakwa ya Ngewa sya Mbivilia. O namo mesoma ngewa ĩla we ũendee na kũsoma—“Ũndũ Tũtonya Kwĩkala Tene na Tene.”

We nĩwĩsĩ kĩla maendee na kwĩmanyĩsya? Meĩmanyĩsya kana, mbee, nĩtwaĩlĩtwe nĩ kũmũmanya Yeova na Mwana wake Yesũ ethĩwa tũkekala tene na tene. Mbĩvilia yaasya: ‘Ĩno nĩyo nzĩa ya kwĩkala tene na tene. Kwĩmanyĩsya ĩũlũ wa Ngai ũla wa w’o weka, na Mwana ũla wamũtũmie kũũ nthĩ, Yesũ Klĩsto.’

Tũtonya kwĩmanyĩsya ĩũlũ wa Yeova Ngai na Mwana wake Yesũ ata? Nzĩa ĩmwe nĩ kwa kũsoma Ĩvuku Yakwa ya Ngewa sya Mbivilia kuma mwambĩlĩlyo nginya mũmĩnũkĩlyo. Yo nĩyĩwetete maũndũ maingĩ mũno ĩũlũ wa Yeova na Yesũ, kana tĩw’o? Nĩyĩwetete maũndũ maingĩ ala mo mekĩte na maũndũ ala makeka. Ĩndĩ nĩtwaĩlĩte kwĩka ũndũ ũngĩ eka o kũsoma ĩvuku yĩĩ.

We nĩwene ĩvuku yĩu yĩngĩ yĩ vau nthĩ? Nĩ Mbivilia. Kũlya mũndũ ũngĩ aũsomee ilungu sya Mbivilia vala ngewa sya ĩvuku yĩĩ syumĩtw’e. Mbivilia ĩtũnengae ithyĩ ũvoo w’onthe ũla twaĩlĩtwe nĩ kũmanya nĩ kana wĩthĩe ithyonthe nĩtũtonya kũmũthũkũma Yeova kwa nzĩa ĩla yaĩlĩte na kũkwata thayũ ũtathela. Kwoou nĩtwaĩlĩtwe kwĩthĩwa na kĩmanyĩo kya kũmĩsoma Mbivilia mavinda maingĩ.

Ĩndĩ kwĩmanyĩsya ĩũlũ wa Yeova Ngai na Yesũ Klĩsto kũitoetye. No twĩthĩwe na ũmanyi mwingĩ mũno ĩũlũ woo na momanyĩsyo moo, na o na kũilyĩ ũu tũiema kũkwata thayũ ũtathela. We nĩwĩsĩ nĩ kyaũ kĩngĩ kĩkwendeka?

Vamwe na ũu nĩtwaĩlĩtwe nĩ kwĩkala kwosana na maũndũ ala tũĩmanyĩsya. We nũũmũlilikana Yutasi Isikalioti? Aĩ ũmwe katĩ wa amanyĩw’a 12 ala Yesũ wanyuvie matw’ĩke atũmwa make. Yutasi aĩ na ũmanyi mwingĩ mũno ĩũlũ wa Yeova na Yesũ. Ĩndĩ nĩ kyaũ kyamũkwatie? Ĩtina wa ĩvinda nĩwatw’ĩkie mwĩyendi, na amũvũnyanĩa Yesũ kwa amaitha make kwa ilungu 30 sya vetha. Kwoou Yutasi ndakakwata thayũ ũtathela.

We nũlilikana Ngeasi, mũndũ ũla tweemanyĩisye ĩũlũ wake ngewanĩ ya 69? Endaa ethĩwe na ngũa na mbesa itaĩ syake. Kwoou akengana nĩ kana akwate syĩndũ isu. Ĩndĩ Yeova nĩwamũsilĩile. Na akatũsilĩla o naitũ ethĩwa tũikwĩw’a mĩao yake.

Ĩndĩ kwĩ andũ aingĩ aseo ala ĩvinda yonthe mamũthũkũmaa Yeova kwa kũĩkĩĩka. Naitũ twĩenda twĩthĩwe tũilyĩ tamo, kana tiw’o? Samueli ũla waĩ mũnini nĩ ngelekany’o nzeo ya kũatĩĩa. Lilikana o tondũ twoonie nthĩnĩ wa Ngewa ya 55, aĩ o na ũkũũ wa myaka ĩna kana ĩtano yĩla wambĩĩie kũmũthũkũma Yeova ĩeemanĩ yake. Kwoou o na ethĩwa ũnyivĩte ata, ndwĩ mũnini mũno ũndũ ũtatonya kũmũthũkũma Yeova.

Vate nzika, mũndũ ũla ithyonthe tũkwenda kũatĩĩa nĩ Yesũ Klĩsto. O na yĩla waĩ kamwana, o tondũ vonanĩtw’e Ngewanĩ ya 87, we aĩ vau ĩkalũnĩ aineena na andũ angĩ ĩũlũ wa Ĩthe wake wa ĩtunĩ. Ekai tũatĩĩae ngelekany’o yake. Ekai tũtavye andũ aingĩ o ũndũ tũtonya ĩũlũ wa Yeova, Ngai waitũ wa ũsengy’a, na mwana wake, Yesũ Klĩsto. Woona tweeka maũndũ asu, tũkeethĩwa tũtonya kwĩkala tene na tene nthĩnĩ wa valatiso nzaũ ya Ngai ĩũlũ wa nthĩ.

Yoana 17:3; Savuli 145:1-21.