NO ŨMENYE kĩrĩa kairĩtu gaka na arata ako marathoma? Ĩĩni, nĩ ibuku o ta rĩrĩ ũrathoma—Ibuku Rĩakwa rĩa Ng’ano cia Biblia. Na marathoma rũgano o rũrĩa wee ũrathoma—“Ũrĩa Tũũngĩhota Gũtũũra Tene na Tene.”

Wee-rĩ, nĩ ũũĩ kĩrĩa mareruta? Mbere, twagĩrĩirũo nĩ kũmũmenya Jehova na Mũrũwe Jesu angĩkorũo nĩ tũgatũũra tene na tene. Biblia yuugĩte atĩrĩ: ‘Ĩno nĩyo njĩra ya gũtũũra tene na tene. Kwĩruta ũhoro wa Ngai ũrĩa wiki wa ma, na Mũrũwe ũrĩa aatũmire gũkũ thĩ, Jesu Kristo.’

Tũngĩhota kwĩruta atĩa ũhoro wa Jehova Ngai na Mũrũwe Jesu? Njĩra ĩmwe ya gwĩka ũguo nĩ gũthoma Ibuku Rĩakwa rĩa Ng’ano cia Biblia kuuma kĩambĩrĩria nginya mũthia. Rĩtwĩraga maũndũ maingĩ megiĩ Jehova na Jesu, kana tiguo? Rĩtwĩraga ũhoro wa maũndũ maingĩ marĩa mekĩte na marĩa makiriĩ gwĩka. No ĩndĩ nĩ twagĩrĩirũo nĩ gwĩka makĩria ya gũthoma ibuku rĩrĩ.

Wee-rĩ, nĩ ũrona ibuku rĩu rĩngĩ rĩ haarĩa thĩ? Nĩ Biblia. Etha mũndũ agũthomere icunjĩ cia Biblia iria ng’ano cia ibuku rĩrĩ ciumĩte. Biblia ĩtũheaga ũhoro mũgima ũrĩa tũngĩenda nĩguo ithuothe tũtungatĩre Jehova na njĩra ĩrĩa yagĩrĩire na tũgĩe na muoyo wa tene na tene. Kwoguo rekei tũgĩe na mũtugo wa kũmĩthoma kaingĩ kaingĩ.

No ningĩ-rĩ, kwĩruta ũhoro wa Jehova Ngai na Jesu Kristo tikũiganu. Twahota kũgĩa na ũũgĩ mũingĩ mũno na ũrutani wao, na twage muoyo wa tene na tene. Wee-rĩ, nĩ ũũĩ kĩrĩa kĩngĩ gĩkwendekana?

O ũndũ ũmwe nĩ twagĩrĩirũo nĩ gũtũũra tũrũmĩtie maũndũ marĩa twĩrutaga. Wee-rĩ, nĩũkũririkana Judasi Mũisikariota? Aarĩ ũmwe wa arĩa 12 maathurĩtwo nĩ Jesu matuĩke atũmwo ake. Judasi aarĩ na ũũgĩ mũingĩ mũno wĩgiĩ Jehova na Jesu. No ĩndĩ aanyitirũo nĩ ũndũ ũrĩkũ? Ihinda rĩa hĩtũka atuĩkire mwĩyendi, na agĩkunyanĩra Jesu he thũ ciake na icunjĩ cia betha 30. Nĩũndũ ũcio-rĩ, Judasi ndakaheo muoyo wa tene na tene.

No ũririkane Gehazi, mũndũ ũrĩa twathomire ũhoro wake Rũgano-inĩ rwa 69? Endire kũgĩa na nguo na mbeca itaarĩ ciake. Rĩu-rĩ, nĩ kũhenania aahenanirie nĩguo egwatĩre indo icio. No ĩndĩ Jehova nĩamũherithirie. O na ithuĩ no atũherithie tũngĩaga gwathĩkĩra watho wake.

No nĩgũkoretwo na andũ aingĩ ega arĩa makoretwo magĩtungatĩra Jehova marĩ athingu hĩndĩ ciothe. Tũkwenda gũtuĩka tao, kana tiguo? Kamwana karĩa ti Samueli nĩ mũhaano mwega wa kũrũmĩrĩra. Taririkana, ta ũrĩa twonire Rũgano-inĩ rwa 55, aarĩ na ũkũrũ wa mĩaka ta ĩna kana ĩtano ũguo, rĩrĩa aambĩrĩirie gũtungatĩra Jehova hekarũ-inĩ yake. Kwoguo, o na ũngĩkorũo ũrĩ mũnyinyi atĩa, ndũrĩ mwana mũno ũũ atĩ ũremwo nĩ gũtungatĩra Jehova.

Hatarĩ nganja-rĩ, mũndũ ũrĩa twagĩrĩirũo nĩ kũrũmĩrĩra nĩ Jesu Kristo. O na rĩrĩa aarĩ kamwana, ta ũrĩa Rũgano rwa 87 ruonanĩtie, aarĩ thĩinĩ wa hekarũ akĩaria na andũ angĩ ũhoro wa Ithe wake wa igũrũ matu-inĩ. Rekei tũrũmĩrĩre mũhaano wake. Reke tũmenyithie andũ aingĩ o ũrĩa tũngĩhota ũhoro wĩgiĩ Jehova Ngai witũ wa magegania na Mũrũwe, Jesu Kristo. Na tũngĩka maũndũ macio-rĩ, hatikĩrĩ nganja nĩ tũkahota gũtũũra tene na tene thĩinĩ wa paradiso ya Ngai ya thĩ njerũ.