NANCHI wakonsha kumuyuka buku ye abena kutanga uno kashimbi na balunda nanji nyi? Ee, yenka uno buku ye ubena kutangamo wa kuba’mba, Buku Wami wa Mashimikila a mu Baibolo. Kabiji babena kutanga jishimikila jonka jo ubena kutanga jaamba’mba: “Byo Twakonsha Kwikala Myaka ne Myaka.”

Nanchi wayuka kyo babena kufundapo nyi? Kitanshi twafwainwa kuyuka Yehoba ne Mwananji Yesu umvwe tukeba kukekala na bumi bwa myaka ne myaka. Baibolo waamba’mba: ‘Buno bo bumi bwa myaka ne myaka. Bwa kufunda pe Lesa yenka wa kine, ne Mwananji ye atumine, Yesu Kilishitu.’

Twakonsha kufunda byepi pe Yehoba Lesa ne Mwananji Yesu? Jishinda jimo ke kutanga uno Buku Wami wa Mashimikila a mu Baibolo kufuma kuntendekelo shoo ne kwapela. Witubula byavula pe Yehoba ne Yesu, kechi ibyo nenyi? Kabiji witubula ne bintu byavula byo bauba kabiji ne byo bakoba kulutwe na lwendo. Bino kuji byavula byo twafwainwa kuba kukila kutangatu uno buku.

Nanchi wamumona buku uji panshi nyi? Uno buku ke Baibolo. Ambilapo umo akutangileko kibese kimo kya mu Baibolo mwafuma mashimikila aji mu uno buku. Baibolo uji na mabulañano onse o tukeba kuba’mba atweba bonse tumwingijile Yehoba mu jishinda jo akeba ne kumona bumi bwa myaka ne myaka. Onkao mambo, twafwainwa kwikala na muteeto wa kufunda Baibolo kimye kyonse.

Bino kuji byavula byakila pa kufunda pe Yehoba Lesa ne Yesu Kilishitu. Twakonsha kuyuka bintu byavula bingi pe abo ne mafunjisho abo, bino kabiji twakankalwa kwikala na bumi bwa myaka ne myaka. Nanchi wayuka kintu kikwabo kikebewa nyi?

Twafwainwa kwikela monka mwayila bintu byo tufunda. Wamuvuluka Yudasa Isakaliota nyi? Wajinga wa pa boba 12 Yesu bo asajile kwikala batumwa banji. Yudasa wayukile bingi byavula pe Yehoba ne Yesu. Pano ki ka kyamumwekejile? Pa kupitapo kimye waishile kwikala na kichima, ne kumusolola Yesu ku balwanyi banji na mashekele a siliva 30. Onkao mambo, Yudasa kechi ukebumonapo bumi bwa myaka ne.

Abya wamuvuluka Gehazi muntu ye twafunjile mu Jishimikila 69 nyi? Wakebelenga kwikala na bivwalo ne mali abujile anji. Onkao mambo, pa kuba’mba atambule bino bipe wabepele bubela. Bino Yehoba wamukambwile. Ne atweba uketukambula umvwe twabula kukokela mizhilo yanji.

Bino kuji bantu bawama bavula baingijijilenga Yehoba mu bukishinka. Tukeba kwikala byonka byo bajinga, kechi ibyo nenyi? Mwanyike Samwela ke wa kumwenako wawama kulondela. Vuluka, byonka byo twamwene mu Jishimikila 55, wajingatu na myaka ina kufika ku itanu kimye kyo atendekele kwingijila Yehoba ku tente wanji wa lusambakeno. Nangwa wikale mwanyike byepi, kechi wakepesha kya kukankalwa kwingijila Yehoba ne.

Pano bino muntu ye twafwainwa kulondela atweba bonse ke Yesu Kilishitu. Nangwatu kimye kyo akijingatu kalombwana byonka byo amweshiwa mu Jishimikila 87, wajinga mu nzubo ya Lesa saka amba ku bantu pa mambo a Shanji wa mwiulu. Twaya tulondelenga kya kumwenako kyanji. Twaya tubuleko bantu bavula pa mambo a Lesa wetu wawama aye Yehoba ne Mwananji Yesu Kilishitu. Umvwe saka tuba bino bintu, ko kuba’mba tukekala myaka ne myaka mu paladisa mupya wa kwa Lesa pano pa ntanda.