ပူ ၁၁၆
ကအိၣ်မူဘၣ်လီၤထူလီၤယိာ်အဂီၢ် ကဘၣ်မၤမနုၤလဲၣ် အဂ့ၢ်
ပိာ်မုၣ်ဖိသၣ်ဒီး အသကိးတဖၣ် ဖးလံာ်မနုၤလဲၣ်န့ၣ် သုတဲသ့ဧါ. မ့ၢ်လံာ်လၢသုဖးခဲအံၤ—ယလံာ်စီဆှံပူ န့ၣ်လီၤ. ဒီးဖးဝဲသ့ၣ်ပူလၢသုဖးအီၤခဲအံၤ “ကအိၣ်ဘၣ်လီၤထူလီၤယိာ်အဂီၢ် ကဘၣ်မၤမနုၤလဲၣ်အဂ့ၢ်” န့ၣ်လီၤ.
အဝဲသ့ၣ်မၤလိမနုၤလဲၣ်န့ၣ် သုသ့ၣ်ညါဧါ. အဆိကတၢၢ်တခါန့ၣ် လၢပကအိၣ်မူဘၣ်လီၤထူလီၤယိာ်အဂီၢ် ပကဘၣ်သ့ၣ်ညါ ယဟိဝၤဒီး အဖိခွါယ့ၣ်ၡူးန့ၣ်လီၤ. လံာ်စီဆှံစံးဝဲဒၣ် ‘ကျဲလၢပကအိၣ်မူဘၣ်လီၤထူလီၤယိာ်န့ၣ် မ့ၢ်ဒ်အံၤလီၤ. မၤလိသ့ၣ်ညါ ယွၤလၢအမ့ၢ်ဝဲတီဝဲထဲတဂၤဧိၤ, ဒီးယ့ၣ်ၡူးခရံာ်လၢ အဘၣ်တၢ်ဆှၢလီၤအီၤဆူ ဟီၣ်ခိၣ် အဂ့ၢ်န့ၣ်တက့ၢ်.’
ပမၤလိသ့ၣ်ညါ ယဟိဝၤကစၢ်ယွၤဒီး အဖိခွါယ့ၣ်ၡူးအဂ့ၢ် ကသ့ဒ်လဲၣ်. ကျဲတဘိန့ၣ် တၢ်ဖး ယလံာ်စီဆှံပူ လၢအခီၣ်ထံး တုၤလၢအကတၢၢ်န့ၣ်လီၤ. လံာ်အံၤ တဲဘၣ်ပှၤ ယဟိဝၤဒီး ယ့ၣ်ၡူးအဂ့ၢ် အါမးန့ၣ်လီၤ တမ့ၢ်ဘၣ်ဧါ. ဒီးတၢ်လၢအဝဲသ့ၣ်မၤတ့ၢ်ဝဲတဖၣ်, ဒီးဆူညါတၢ်လၢအဝဲသ့ၣ် ကမၤဝဲန့ၣ် အိၣ်ကွဲးအသးအါမးစ့ၢ်ကီးလီၤ. ဘၣ်ဆၣ် ထဲဖးလံာ်အံၤဒၣ်န့ၣ် တဝံၤဒံးဘၣ်.
သုထံၣ်လံာ်လၢခံတဘ့ၣ် အိၣ်လၢသ့ၣ်ဘၣ်ဖီခိၣ်ဧါ. တၢ်န့ၣ်မ့ၢ်လံာ်စီဆှံလီၤ. မၢပှၤတဂၤဖးန့ၢ်နၤ လံာ်စီဆှံအဆၢတဖၣ်လၢ လံာ်အဝဲအံၤအတၢ်ဃဲၤပူတဖၣ် အိၣ်သန့ၤအသးန့ၣ်တက့ၢ်. လံာ်စီဆှံဒုနဲၣ်ပှၤ တၢ်သ့ၣ်ညါအလၢအပှဲၤလၢပလိၣ်ဘၣ် ဒ်သိးပဘူၣ်ထီၣ်ဘါထီၣ်ယဟိဝၤ လၢကျဲတီကျဲလိၤဒီး ပန့ၢ်ဘၣ် တၢ်မူအထူအယိာ် ကသ့အဂီၢ်န့ၣ်လီၤ. လၢတၢ်န့ၣ်အဃိ ကြၢးလၢ ပညီနုၢ်ဖးလံာ်စီဆှံ ဘၣ်ဆၢဘၣ်ကတီၢ်န့ၣ်လီၤ.
သနာ်က့ ထဲပမၤလိသ့ၣ်ညါ ယဟိဝၤယွၤဒီး ယ့ၣ်ၡူးအဂ့ၢ်န့ၣ် တလၢပှဲၤဒံးဘၣ်. ပသ့ၣ်ညါ တၢ်ဘၣ်ဃးအဝဲသ့ၣ်အဂ့ၢ် ဒီးအဝဲသ့ၣ်အတၢ်သိၣ်တၢ်သီတဖၣ် အါမးဘၣ်ဆၣ် ပန့ၢ်ဘၣ် တၢ်မူအထူအယိာ်တသ့ဒံးဘၣ်. လိၣ်ဒံးမနုၤလဲၣ်န့ၣ် သုသ့ၣ်ညါဧါ.
လိၣ်လၢ ပကအိၣ်မူပဝဲဒ် တၢ်လၢပသ့ၣ်ညါတဖၣ်အသိးန့ၣ်လီၤ. သုသ့ၣ်နီၣ်ယူဒၤအံၣ်စကၤရံၤအိာ်ဧါ. အဝဲဒၣ်မ့ၢ်တၢ်မၢဖိတဂၤစ့ၢ်ကီး လၢယ့ၣ်ၡူးဃုထၢထီၣ် ၁၂ ဂၤအကျါ န့ၣ်လီၤ. ယူဒၤန့ၣ်သ့ၣ်ညါ ယဟိဝၤဒီး ယ့ၣ်ၡူးအဂ့ၢ် အါမးန့ၣ်လီၤ. ဘၣ်ဆၣ်, အဝဲကဲထီၣ်ဒ်လဲၣ်. တယံာ်တမီၢ်န့ၣ် အသးပၢၢ်ထီၣ်လၢ ကဃုဆိတၢ်ဘျုးလၢ အဂီၢ်ဒၣ်ဝဲန့ၣ်လီၤ. မၤဟးဂီၤအတၢ်သးတီဒီး ဆါလီၤကွံာ်ယ့ၣ်ၡူး လၢစ့သၢဆံ ဆူဒုၣ်ဒါအစုပူၤလီၤ. လၢတၢ်န့ၣ်အဃိ ယူဒၤတမၤန့ၢ် တၢ်မူအထူအယိာ်ဘၣ်.
သုသ့ၣ်နီၣ်က့ၤဃစံလၢ ပူ ၆၉ ပူၤန့ၣ်ဧါ. အဝဲသးလီသးကွံ တၢ်ကူတၢ်ကၤလၢတမ့ၢ်အတၢ်အဃိ လီတၢ်လၢကန့ၢ်ဘၣ် တၢ်တဖၣ်အံၤအဂီၤလီၤ. ဘၣ်ဆၣ်, ယဟိဝၤသိၣ်ဃီၣ်အီၤလီၤ. ပဝဲစ့ၢ်ကီး ပမ့ၢ်တလူၤဒီးတိၢ်န့ၣ် ယဟိဝၤအတၢ်သိၣ်တၢ်သီသၢပျၢၤ ယဟိဝၤကသိၣ်ဃီၣ်ပှၤန့ၣ်လီၤ.
ပှၤအဂ့ၤလၢ အဘူၣ်ထီၣ်ဘါထီၣ်ယဟိဝၤထီဘိ လၢတၢ်သူၣ်တီသးတီတဖၣ် အိၣ်အါမးလီၤ. ပအဲၣ်ဒိးကဲထီၣ်ဒ်အဝဲသ့ၣ်အသိးလီၤ, တမ့ၢ်ဘၣ်ဧါ. ဖိသၣ်ဖိၡမူၤအ့လးန့ၣ် မ့ၢ်တၢ်ဒိဂ့ၤတဲာ်ဘၣ်လၢပဂီၢ်လီၤ. သုသ့ၣ်နီၣ်ဧါ. ဒ်ပဖးဘၣ်တ့ၢ်လၢပူ ၅၅ အသိးန့ၣ် ဖဲအဝဲစးထီၣ်ဘူၣ်ထီၣ်ဘါထီၣ် ယဟိဝၤန့ၣ် အသးအိၣ်လွံၢ်နံၣ်ယဲၢ်နံၣ်ဖိဒံးလီၤ. အဃိ, သုသးမ့ၢ်စၢ်ထဲလဲၣ်သနာ်က့ သုသးတစၢ်ကဲၣ်ဆိးလၢ သုကဘူၣ်ကဘါယဟိဝၤအဂီၢ်ဘၣ်.
ပှၤလၢ ပဝဲခဲလၢာ်အဲၣ်ဒိးကွၢ်လိအီၤန့ၣ် မ့ၢ်ဝဲယ့ၣ်ၡူးခရံာ်လီၤသၢၣ်. ဒ်ပထံၣ်ဘၣ်လၢပူ ၈၇ ပူၤအသိး လၢအနီၣ်ဆံးသးစၢ်ဒံးအခါလံၤလံၤန့ၣ် စံးကတိၤသကိးဝဲဒၣ် အပၢ်လၢမူခိၣ်အဂ့ၢ်ဒီးပှၤဂၤတဖၣ် လၢတၢ်လုၢ်ဟံၣ်ပူၤန့ၣ်လီၤ. မ်ပလူၤပိာ်သကိး အဒိဂ့ၤတဲာ်ဘၣ်တက့ၢ်. အဂ့ၤကတၢၢ် တသ့ဖဲအသ့ မ်ပစံးကတိၤသကိး ပကစၢ်ယွၤယဟိဝၤလၢအဂ့ၤဒိၣ်ဝဲ ဒီးအဖိခွါ အဂ့ၢ်န့ၣ်တက့ၢ်. ပမ့ၢ်မၤတၢ်တဖၣ်အံၤသၢပျၢၤ, ပကအိၣ်မူဘၣ်လၢ ကစၢ်ယွၤအပၤရဒံစူး လၢဟီၣ်ခိၣ်အသီအပူၤ လီၤထူလီၤယိာ်န့ၣ်လီၤသၢၣ်.
