Esimwititi 116: Omu natu vhura kuparuka narunye
KUVHURA o dimburure asi yinke kana kuresa kakadona aka novakwawo? Yimo, buke zeezi ono kuresa nove—Buke zange zomasimwititi goBibeli. Awo kuna kuresa hena esimwititi lyeeli ono kuresa ove—“Omu natu vhura kuparuka narunye.”
Ono diva asi yinke vana kulironga? Pomuhowo, asi ose twa hepa kudiva Jehova naMunwendi Jesus nsene asi tu ka paruke narunye. Bibeli kwa tanta asi: ‘Ngesi yimo no paruka narunye. Lironga kuhamena Karunga gosili gelike, noMuna ogu ga tumine pevhu, Jesus Kristusa.’
Ngapi omu natu lironga kuhamena Jehova Karunga naMunwendi Jesus? Nkedi zimwe kuna kara mokuresa Buke zange zomasimwititi goBibeli kutunda ketameko dogoro kouhura. Azo kutanta yoyinzi kuhamena Jehova naJesus, ndi ngapi? Azo kutanta hena kuhamena yininke yoyinzi eyi va rugana neyi simpe ngava ka rugana. Nye ose twa hepa kurugana ko yoyinzi kupitakana kuresa tupu buke ezi.
To mono buke zopeke ozo zina rara pevhu? Azo Bibeli. Ninka va ku resere maruha goBibeli apa ga tundilira masimwititi gobuke ezi. Bibeli kutupa mapukururo nagenye aga tuna hepa yipo natuvenye tu karere Jehova monkedi zokuvyuka nokukagwana mwenyo gwanarunye. Twa kona nye kuyininka yi kare nkareso zetu mokulironga Bibeli nkenye apa.
Nye kulironga tupu kuhamena Jehova Karunga naJesus Kristusa kapisi yelike twa hepa. Ose kuvhura tu kare nediwo lyenzi-lyenzi kuvahamena awo nerongo lyawo, nye simpe tu pire kukagwana mwenyo gwanarunye. Ono diva asi yinke hena ya hepa po?
Ose twa kona hena kuparuka kuliza neyi atu lirongo. To diworoka Judasa Isikalyoto? Age kwa kere gumwe gova-12 ava ga horowere Jesus va kare vapositoli vendi. Judasa kwa kere nediwo lyenzi kuhamena Jehova naJesus. Nye yinke ya mu horokerere? Konyima zosiruwo ta ligazara tupu mwene, nokugombeka Jesus kononkore dendi koyitenda yosisiliveli 30. Yipo nye asi Judasa kapi nga ka gwana mwenyo gwanarunye.
To diworoka Gehasi, mugara ogu twa lironga mEsimwititi 69? Age kwa here kugusa yikoverero noyimaliva eyi ya pilire kumutumbukira. Makura ta kumbagere yipo a gwane yininke eyi. Nye Jehova kwa mu tengekere. Age nga tu tengeka hena nose nsene kapi tuna kulimburukwa noveta dendi.
Nye pwa kara vantu wovawa wovanzi ava va karera Jehova nkenye apa moulimburukwi. Ose tuna hara kuvafana, ndi kapisi yimo? Samweregona kuna kara sihonena sosiwa sokukwama. Diworoka, ngomu tuna yi mono mEsimwititi 55, age kwa tamekere kukarera Jehova ponkongoronzugo zendi age nomvhura ne ndi ntano tupu. Yipo asi nampili o kare asi munona gokusika papi, ove kapisi o munona unene mokukarera Jehova.
Yimo, muntu ogu tuna hara kuhonena natuvenye kuna kara Jesus Kristusa. Nampili paapa ga kere mumati, ngomu va yi likida mEsimwititi 87, age kwa kere montembeli, ta uyunga nava wopeke kuhamena oGuhwe vemeguru. Tu kwameni sihonena sendi. Tu tantereni ko vantu wovanzi paapa twa hulira kuhamena Karunga gwetu gomuwa Jehova naMunwendi, Jesus Kristusa. Nsene tu yi rugana eyi, ose ngatu vhura kuparuka narunye moparadisa zaKarunga zompe pevhu.
Johanesa 17:3; Episarome 145:1-21.
Mapuro
- Yinke twa hepa kudiva nsene asi tu ka paruke narunye?
- Ngapi omu natu vhura kulironga kuhamena Jehova Karunga naJesus, moomu kana yi likida kakadona aka novakwawo mefano?
- Buke musinke zapeke ono kumona mefano, ntani morwasinke twa hepa kuziresa nkenye apa?
- Kugusa ko kulironga kuhamena Jehova naJesus, yinke hena ya hepa po mokugwana mwenyo gwanarunye?
- Sirongwa musinke atu lirongere ko kEsimwititi 69?
- Yinke asi likida sihonena sosiwa somunona Samwere mEsimwititi 55?
- Ngapi omu natu vhura kukwama sihonena saJesus Kristusa, ntani nsene tu si kwama, yinke ngatu ka vhura ku ka rugana komeho?
Mapuro gokugwederera ko
- Resa Johanesa 17:3.
Ngapi omu ga likida Matjangwa asi kukara nediwo lyaJehova Karunga ntani naJesus Kristusa ya pitakana tupu kukoneka mausili?
- Resa Episarome 145:1-21.
Nokonda musinke dimwe dononzi twa kara nado mokuhamberera Jehova?
Ngapi omu asi Jehova “kuwapeka nkenye ogu,” ntani ngapi eyi nayi vhura kutuhedesa pepi nendi?
Nsene asi twa hara Jehova, yinke ngayi tu tumangeda tu rugane?
