UA TANTEKEYA vika a li na ku tanda ou kanike ua mpuevo na va vusamba vueni ni? Eyo, vali na ku tanda eli livulu li u li na ku tanda vuovuno—Livulu Liange lia Mizimbu ya mu Mbimbiliya. Muze vali na ku tanda vene muzimbu u uli na ku tanda vuovuno—“Vati tu Hasa ku Yoya Miaka Yose.”

Ua tantekeya vika vali na ku lilongesa ni? Ca ku livanga, va na lilongesa nguavo nga tu tonda ku yoya miaka yose, tua pande ku tantekeya vuino Yehova na Muaneni Yesu. Mbimbiliya ya handeka nguayo: ‘Eyi ikeyo njila i tuala ku muono ka ue ku hua. Ku lilongesa via Njambi umo lika ua vusunga, na Muaneni Yesu Kilistu uze ya tumine ha mavu.’

Vati tu hasa ku lilongesa via Yehova Njambi na Muaneni Yesu? Njila imo ya pua mu ku tanda Livulu Liange lia Mizimbu ya mu Mbimbiliya, fume ku vusangumukilo na ku vumanusuilo. Lia handeka via vingi hali Yehova na Yesu Kilistu, ni vati? Ya lombolola naua ha viuma vika vali na ku linga na viuma vi va ka linga. Vunoni ku tanda lino livulu kati vikevio lika vi tondeka, kuli vikuavo naua vi tua pande ku linga.

Ua mono lize livulu likuavo li li ha mavu ni? Ikeyo Mbimbiliya. U na pande ku handeka na umo linga a ku tandeleko mikanda ya mu Mbimbiliya ha va fumisa mizimbu ya lino livulu. Mu Mbimbiliya mua kala mizimbu yose ya tu pande linga tu vose tu pangele Yehova mu njila ya mu ya ku mutima, linga tu ka tambule muono ka ue ku hua. Ngeci mukemuo tua pande ku lihakela kapandi ka ku lilongesa Mbimbiliya ntsimbu yose.

Vunoni ku lilongesa via Yehova Njambi na Yesu Kilistu kati vikevio lika vi tondeka. Muntu a hasa ku tantekeye viuma via vingi hali Yehova na Yesu na vilongesa viavo vunoni citava ka ka uana muono ua ya-ye. Ua tantekeya viuma vika vikuavo via lisupuko ni?

Tua pande ku linga viuma vi tue ku lilongesa. U ci vuluka Yundasa Iskaliota ni? Ua puile umo ua vaze 12 va hanguile Yesu linga vapue vapostolo veni. Yundasa ua tantekeyele viuma via vingi hali Yehova na Yesu. Vunoni vika via mu solokelele? Mu nima ya ntsimbu Yundasa ua himpukile mukua cipululu kaha uendele Yesu vungungu, mu ku mu landesa ku vitozi veni na zimbongo 30 zia palata. Yundasa ka ka tambula muono ka ue ku hua.

U vuluka naua Ngehazi, uze yala u tua lilongesele mu Muzimbu 69 ni? Ua tondele ku tambula zimbongo na vuzalo via mbala. Ngeci ua handekele makuli linga a vi tambule. Vunoni Yehova ua mu hele kasitiku. Netu a ka tu hana kasitiku nga ka tu ononoka ku masiko eni.

Vunoni kua kele vantu va vengi va pangelele Yehova na mutima uose. Netu tu yongola tu pue ngue vakevo ni vati? Uze kanike Samuele ua puile lungano lua cili lua ku kavangeya. Vuluka, ngue muze mu tua lilongesele mu Muzimbu 55 ua kele lika na miaka itanu mua putukile ku pangela Yehova ku tavenakulu. Eci ci tu lekesa ngecize ambe u pue kanike ua mundende u hasa ku pangela Yehova.

Mua vusunga tu vose tu yongola ku kavangeya lungano lua Yesu Kilistu. Muomu ikeye mua puile kanike ua mundende, ngue mu tua muene ha Muzimbu 87, Yesu ua kele ku tembele mu ku ambuluila vakuavo via Ise ua muilu. Tua pande ku mu tambuluisa. Tu na pande ku lekako vakuetu via Yehova Njambi yetu na Muaneni Yesu Kilistu. Nga tu puisamo ku linga viuma evi tu ka hasa ku yoya mu palandaizi ya iha ha mavu.