OVE utyii oityi okamukainthu aka nomapanga ae vekahi nokutanga? Yoo, vekahi nokutanga omukanda ou, ove ukahi nokutanga. Omukanda Womahipululo Ombimbiliya. Tupu vekahi nokutanga ehipululo eli ove ukahi nokutanga. “Oñgeni Tupondola Okukala Nomuenyo wahapu.”

Ove utyii oityi vekahi nokulilongesa? Tete, tuesukisa okunoñgonoka Yehova Nomona wae Yesu, inkha tuhanda okukala nomuenyo wahapu. Ombimbiliya yati: ‘Ei, oyo ondyila yomuenyo wahapu. Okulilongesa kombinga ya Huku yotyotyili, no Yomona wae una atumine pano pohi, Yesu Kristu.’

Oñgeni tupondola okulilongesa kombinga ya Yehova Huku no Yomona wae Yesu? Onkhalelo imue, okutanga Omukanda Womahipululo Ombimbiliya, okuhimbikila kehipululo liotete alo kulina liokuahulako. Omukanda ou utupopila unene kombinga ya Yehova no ya Yesu. Hatyoko? Tupu utupopila unene kombinga yovipuka Yehova na Yesu valinga, navina mavakalinga komutue. Mahi, okutanga omukanda ou katyatuukile. Tuesukisa okulinga vali unene.

Weete omukanda ou omukuavo ukahi pohi? Ombimbiliya. Ita komunthu umue ekutangele mo Mbimbiliya ononthele muapolwa omahipululo omukanda ou. Ombimbiliya itupopila oñgeni tuna yokuumbila Yehova nonkhalelo yaviuka, opo tukamone omuenyo wahapu. Moluotyo, tuesukisa okukala notyituwa tyokulilongesa apeho Ombimbiliya.

Mahi, okulilongesa kombinga ya Yehova no ya Yesu Kristu, katyatuukile. Mokonda tupondola okukala nenoñgonoko enyingi kombinga ya Huku no ya Yesu, no yomalongeso avo, mahi, atuhakamona omuenyo wahapu. Ove utyii oityi tuesukisa vali okulinga?

Tupu, tuesukisa okuendesila omuenyo wetu, movipuka aviho tukahi nokulilongesa. Judas Iskaliote umuhinangela? Ankho ulinga onthele yovalongwa 12 Yesu aholovonene opo vakale ono apostolu mbae. Judas ankho una enoñgonoko enyingi kombinga ya Yehova no ya Yesu. Mahi utyii oityi tyapita nae? Konyima weya okukala nelungavi. Alandesa Yesu konondyale mbae no 30 onombongo mbopalata. Moluotyo, Judas kamakatambula omuenyo wahapu.

Geazi omulume una tuelilongesa Mehipululo 69 umuhinangela? Geazi wahandele onombongo, novikutu ankho viheviae. Mokonda ankho uhanda ovipuka ovio atolo ounkhembi. Mahi, Yehova emuhitisa. Tupu Yehova metuhitisa, inkha katutavela ovitumino viae.

Mahi, kuali ovanthu ovanyingi vaumbila Yehova apeho nekolelo. Onthue katuhande okulinga ngetyi ovo valinga? Okamona Samuele ongeleka ongwa tuesukisa okulandula. Hinangela etyi tuatala Mehipululo 55. Samuele ankho una vala omanima ekuana ine etano, puetyi ahimbika okuumbila Yehova mondyuo yae ikola. Ngotyo, nove upondola okuumbila Yehova namphila nkhele omututu.

Atuho tuesukisa okulandula Yesu Kristu. Etyi ankho nkhele omututu, ngetyi tuetyimona Mehipululo 87, ankho wali mondyuo ya Huku, nokupopila vakuavo kombinga ya Tate yae keulu. Tulandulei ongeleka yae. Tupopilei vakuetu ovipuka ovinyingi kombinga ya Yehova Huku yetu no Yomona wae Yesu Kristu. Inkha tulinga ngotyo, matukamona omuenyo wahapu mouye omupe wa Huku, pano pohi.