WASWE, iu savve wanem nao disfala smol gele hem readim witim olketa fren bilong hem? Ia, hem disfala sem buk wea iu readim⁠—⁠Bible Story Buk Bilong Mi. And olketa readim sem story wea iu readim​—⁠“Hao Iumi Savve Laef Olowe.”

Waswe, iu savve wanem nao olketa lanem? First samting, for iumi laef olowe, iumi need for savve abaotem Jehovah and Son bilong hem Jesus. Bible hem sei: ‘Diswan nao wei for kasem laef olowe. Lane abaotem only tru God, and Son wea hem sendem kam long earth, Jesus Christ.’

Hao nao iumi savve lane abaotem Jehovah God and Son bilong hem Jesus? Wanfala wei hem for readim Bible Story Buk Bilong Mi long start go kasem end. Hem storyim plande samting abaotem Jehovah and Jesus, iaman? And hem story abaotem plande samting wea olketa duim finis and wea olketa bae duim long future. Bat iumi need for duim moa samting winim wei for readim disfala buk nomoa.

Waswe, iu lukim narafala buk wea stap long floor? Hem Bible. Askem samwan for readim olketa scripture from Bible wea olketa story insaed disfala buk kam from. Bible givim evri information wea iumi needim mekem iumi evriwan savve servem Jehovah long stretfala wei and kasem laef olowe. So iumi shud studyim Bible evritaem.

Bat for lane nomoa abaotem Jehovah God and Jesus Christ hem no inaf. Nomata maet iumi garem plande savve abaotem tufala and olketa teaching bilong tufala, datwan no minim iumi bae kasem laef olowe. Waswe, iu savve wanem moa iumi needim?

Iumi mas live followim olketa samting wea iumi lanem tu. Waswe, iu rememberim Judas Is·carʹi·ot? Hem wanfala long 12-fala wea Jesus chusim for kamap olketa aposol bilong hem. Judas savve long plande samting abaotem Jehovah and Jesus. Bat wanem nao happen long hem? Hem kamap selfish, and hem givim go Jesus long olketa enemy bilong hem for 30 silver selen. So Judas bae no kasem laef olowe.

Waswe, iu rememberim Ge·haʹzi, man wea iumi lane abaotem long Story 69? Hem laekem samfala kaleko and selen wea no bilong hem. So hem talem laea story for kasem olketa samting hia. Bat Jehovah panisim hem. And hem bae panisim iumi tu sapos iumi no obeyim olketa law bilong hem.

Bat plande gudfala pipol stap bifor tu wea servem Jehovah long faithful wei. Iumi laek for olsem olketa, iaman? Smolfala Samuel hem gudfala example for followim. Remember hao long Story 55, hem foa or faev year nomoa taem hem start for servem Jehovah long tabernacle. So nomata sapos iu smol, iu fit for servem Jehovah.

Tru nao, man wea iumi evriwan want for followim hem Jesus Christ. Story 87 showim hao nomata long taem wea hem boy yet, hem stap long temple and story long nara pipol abaotem Dadi bilong hem long heven. Iumi mas followim example bilong hem. Iumi mas talem evriwan wea iumi fit for talem abaotem nambawan God bilong iumi Jehovah and Son bilong hem, Jesus Christ. Sapos iumi duim olketa samting hia, then iumi bae fit for laef olowe insaed long niu paradaes bilong God long earth.