¿LA AWETAʼM su tijan kkesikʼij ri alaj ali xuqujeʼ ri täq rachiʼl? Jeʼ, are wajun wuj tijan kasikʼij at ubʼiʼ... Ri xebʼantaj ojer tzʼibʼatal pa Loqʼalaj Wuj. Tijan kkesikʼij uwäch wajun bʼantajik riʼ... «Jun kʼaslemal che kʼot ukʼisik».

¿La awetaʼm su tijan kketaʼmaj? Nabʼe, che rajawaxik kqetaʼmaj chirij ri Jehová xuqujeʼ chirij ri Ukʼojol ubʼiʼ Jesús rech kʼo jun qakʼaslemal che kʼot ukʼisik. Ri Loqʼalaj Pixabʼ kubʼij: ‹Are waʼ ri bʼe rech jun kʼaslemal che kʼot ukʼisik. Chawetaʼmaj chirij ri xa jun qastzij Ajawaxel, xuqujeʼ chirij ri Ukʼojol, Jesucristo›.

¿Su ubʼanik kqabʼan che uretaʼmaxik chirij ri Ajawaxel Jehová xuqujeʼ chirij ri Ukʼojol, Jesús? Jun ubʼanik are usikʼixik uwäch ronojel ri e kʼo pa ri wuj Ri xebʼantaj ojer tzʼibʼatal pa Loqʼalaj Wuj. Wajun wuj kubʼij kʼi täq jastaq chirij Jehová xuqujeʼ chirij Jesús, ¿la jewaʼ? Xuqujeʼ kubʼij kʼi täq jastaq che kkebʼanom xuqujeʼ ri kkebʼan na. Xuqujeʼ rajawaxik ksikʼix uwäch chi jun chik wuj.

¿La kawil jun chik wuj kʼo pa ri wachbʼäl? Are ri Loqʼalaj Pixabʼ. Chabʼij che jun winaq che kusikʼij chawe pa ri Loqʼalaj Pixabʼ ri täq bʼantajik kʼo pa wajun wuj riʼ. Ri Loqʼalaj Pixabʼ kuya ronojel ri rajawaxik kqetaʼmaj rech kqapatanej ri Jehová rukʼ sukʼilal, rech kyaʼ jun kʼaslemal che kʼot ukʼisik chaqe. Rumal laʼ rajawaxik amaqʼel kqasikʼij uwäch ri Loqʼalaj Pixabʼ.

Tekʼuriʼ xaq xiw ta rajawaxik kqetaʼmaj chirij ri Ajawaxel Jehová xuqujeʼ ri Jesucristo. Kojkunik nim kqetaʼmaj chikij xuqujeʼ ri kkekʼutu, rukʼ ta wariʼ kyaʼ jun kʼaslemal kʼot ukʼisik chaqe. ¿La awetaʼm su nikʼaj chik rajawaxik kqabʼano?

Rajawaxik kqabʼan pa qakʼaslemal ri kqetaʼmaj. ¿La xsach ta pa ajolom ri Judas Iscariote? Are jun chike ri 12 winaq xuchaʼ ri Jesús rech kubʼan apóstol. Ri Judas kʼo sibʼalaj nim retaʼmbʼäl chirij ri Jehová xuqujeʼ ri Jesús. Tekʼuriʼ, ¿su xubʼano? Xqʼax ri täq qʼij xubʼan itzel winaq xuqujeʼ xukʼayij ri Jesús rukʼ 30 raqan saq pwäq. Rumal wariʼ kyaʼ ta ri kʼaslemal che kʼot ukʼisik che ri Judas.

¿La xsach ta pa ajolom ri Guehazí, che xqetaʼmaj chirij pa ri bʼantajik 69? Areʼ xraj xkʼejeʼ ratzʼyaq xuqujeʼ upwäq. Rumal wariʼ xumol tzij rech xuriq wa jastaq riʼ, rumal laʼ Jehová xukʼajsaj uwäch. Junam rukʼ wariʼ kubʼan Jehová chaqe we kojniman ta che täq utaqonik.

Tekʼuriʼ kʼo kʼi täq utzalaj täq winaq che xkepatanej rukʼ sukʼilal ri Jehová. Öj kqaj kqabʼan ojunam kukʼ ¿la jewaʼ? Ri alaj Samuel jun utz kʼutbʼal chaqe. Masach chawe ri xqil pa ri bʼantajik 55, xaq xiw kʼo kajibʼ o jobʼ ujunabʼ chiʼ xok che upatanexik ri Jehová pa ri tabernáculo. Rumal laʼ, we at alaj na, rukʼ ta wariʼ che katkun täj kapatanej ri Ajawaxel.

Jewaʼ qonojel kqaj kqabʼan qe junam che xubʼan Jesucristo. Chiʼ ri Jesús akʼal na junam che kʼo pa ri bʼantajik 87, kʼo chilaʼ pa ri loqʼalaj ja tijan kchʼaw kukʼ nikʼaj chik chirij ri Utat, Jehová. Chqabʼanaʼ qe junam rukʼ. Chojchʼaw kukʼ konojel täq winaq chirij ri utzalaj Ajawaxel Jehová, xuqujeʼ ri Jesucristo. We kqabʼan ronojel wariʼ, kojkunik kʼo jun qakʼaslemal che kʼot ukʼisik pa kʼakʼ kotzʼiʼjalaj uwäch Ulew rech ri Ajawaxel.