KUA kite koe e eaa ta teia tamaine meangiti e tona au oa e tatau ra? Ae, ko teia puka tikai taau e tatau ra—Taku Puka Tua Pipiria. E te tatau ra ratou i te tua tikai taau e tatau ra—“Akapeea Tatou me Ora e Mutu Kore ua Atu.”

Kua kite koe e eaa ta ratou e apii ra? Te mea mua, ka anoanoia tatou kia kite no runga ia Iehova e tana Tamaiti ko Iesu me ka noo tatou e mutu kore ua atu. Karanga te Pipiria e: ‘Teia te mataara i te noo e tuatau ua atu. Apii no runga i te Atua mou anake ua, e te Tamaiti tana i tono mai ki te enua, ko Iesu Karaiti.’

Akapeea tatou i te apii anga no runga i te Atua ko Iehova e tana Tamaiti ko Iesu? Tetai mataara na te tatau anga i Taku Puka Tua Pipiria mei te akamataanga ki te openga. Te akakite maata maira te reira no runga ia Iehova e Iesu, me kare ainei? E te akakite maata maira no runga i te apinga ta raua i rave ana e te au apinga ta raua ka rave. Inara ka anoanoia tatou kia rave maata atu i te tatau ua i teia puka.

Te kite ra koe i te puka ke i runga i te taua? E Pipiria te reira. Pati i tetai tangata kia tatau kia koe i te au tuanga Pipiria no reira mai te au tua o teia puka. Te oronga maira te Pipiria i te au akakiteanga maata ta tatou ka inangaro kia tavini tatou pouroa ia Iehova i roto i te mataara tika, e kia rauka te ora mutu kore. No reira ka inangaro tatou kia akariro i te apii putuputu i te Pipiria ei angaanga matauia.

Inara kare e rava ua te apii no runga i te Atua ko Iehova e Iesu Karaiti. Penei e maata to tatou kite no runga ia raua e ta raua apiianga, inara kare e rauka te ora mutu kore. Kua kite koe e eaa atu te ka inangaroia?

Ka anoano katoa tatou te noo kia tau ki te au apinga ta tatou i apii. Te maara ra ia koe a Iuda Ikariota? Koia tetai o te aronga e 12 ta Iesu i iki ei au apotetoro nana. E maata tikai to Iuda kite ia Iehova e Iesu. Inara eaa tei tupu kiaia? Muri ake i tetai taime kua riro mai aia ei tangata karapii, e kua pikikaa ia Iesu ki tona au enemi no te moni ario e 30. No reira kare e rauka ia Iuda te ora mutu kore.

Te maara ra ia koe a Gehazi, te tangata ta tatou i apii i te Tua 69? Kua inangaro aia i tetai au kakau e te moni, kare e nana. No reira kua pikikaa aia kia rauka teia au apinga. Inara kua akautunga a Iehova iaia. E ka akautunga katoa aia ia tatou me kare tatou e akono i tana au ture.

Tera ra e maata tikai te aronga meitaki tei tavini ua rai ia Iehova ma te akarongo mou. Ka inangaro tatou kia aite mei ia ratou rai, me kare ainei? E akaraanga meitaki a Samuela meangiti ua i te aru. Akamaara ana, i te kite anga tatou i te Tua 55, e a rai me kore e rima ona mataiti i akamata ai aia i te tavini ia Iehova i ko i tona tapenakara. No reira noatu e eaa toou mataiti, kare koe e meangiti roa i te tavini ia Iehova.

Tika rai, ko Iesu Karaiti te tangata ta tatou pouroa ka inangaro i te aru. Noatu e tamaiti meangiti ua aia, mei tei akaariia i te Tua 87, tei roto aia i te iero e tuatua ra ki tetai ke no runga i tona Metua i te rangi. Ka aru tatou i tona akaraanga. Ka akakite tatou ki te tangata e manganui no runga i to tatou Atua meitaki roa ko Iehova e tana Tamaiti, ko Iesu Karaiti. Me rave tatou i teia, ka rauka ia tatou te noo e mutu kore ua atu i roto i te parataito ou o te Atua i runga i te enua nei.