LÁ NATAYÁÁ rí xtáa raguxnuu ada̱ bugi̱ ga̱jma̱a̱ bi̱ nambáxuu gajmíi̱n ráʼ. Xúʼko̱, ikhaa má libro rígi̱ rí ikháánʼ xtaa ratraxnuu... Libro ndrígóʼ náa na̱ʼkha̱ raʼthí ga̱jma̱a̱ numuu Biblia. Ga̱jma̱a̱ kuwa ruraxnuu historia má rígi̱... “Xú káʼnii gándoo gákuwáanʼ kámuu mbiʼi”.

Lá natayáá rí kuwa rajmañún xáʼ. Timbá, ndayóoʼ majmañulúʼ ga̱jma̱a̱ numuu Jeobá ma̱ngaa numuu Jesús mu makuwáanʼ kámuu mbiʼi. Náa Biblia naʼthí: ‹Ka̱mba̱a̱ rígi̱ rí maraxtaa kámuu mbiʼi. Gajmañaaʼ ga̱jma̱a̱ numuu mbáwíi Dios bi̱ gajkhun, ga̱jma̱a̱ A̱ʼdióo, Jesucristo›.

Xú káʼnii gándoo gajmañulú ga̱jma̱a̱ numuu Jeobá Dios ga̱jma̱a̱ Jesús rá. Timbá nindxu̱u̱ rí muraxnuu Libro ndrígóʼ náa na̱ʼkha̱ raʼthí ga̱jma̱a̱ numuu Biblia náa gi̱ʼdu̱u̱ asndu náa námbáa. Náa libro naʼthulú wéñuʼ ga̱jma̱a̱ numuu Jeobá ma̱ngaa numuu Jesús. Ma̱ngaa naʼtulúʼ wéñuʼ rí ikhiin nini ga̱jma̱a̱ rí gúní nda̱wa̱á. Mú rígá imbo̱o̱ rí gíʼmaa muraxnuu.

Lá natayáá imbo̱o̱ libro rí kriga̱ mbayííʼ ráʼ. Ikhaa nindxu̱u̱ Biblia. Atani rí mbáa maguxnuu Biblia náa na̱ʼkha̱ raʼthí tikhuu dí nirígá wajyúúʼ. Biblia naxnulúʼ xúgíʼ rí ndayóoʼ majmañulúʼ mu muʼni ñajunʼ Jeobá xó má eyoo ikhaa ga̱jma̱a̱ xúʼko̱ makuwáanʼ kámuu mbiʼi. Ikha jngó gíʼmaa muraxnuu tsejtsí mbiʼi Biblia.

Mú raʼkháa i̱ndó majmañulúʼ ga̱jma̱a̱ numuu Jeobá Dios ga̱jma̱a̱ Jesucristo. Ma̱ndoo majmañulúʼ itháan ga̱jma̱a̱ numún ikhiin ga̱jma̱a̱ dí nusngáa, ga̱jma̱a̱ rígi̱ tsíyoo gáʼthi rí maraxtaa kámuu mbiʼi. Lá natayáá ndiéjunʼ eyóoʼ matani itháan ráʼ.

Ma̱ngaa gíʼmaa muʼgíiʼ muʼni rí kuwáanʼ rajmaṉ̃ulúʼ. Lá narmáʼáan a̱jkia̱nʼ eʼni Judas Iscariote ráʼ. Ikhaa nindxu̱u̱ mbá bi̱ 12, bi̱ Jesús ndiyáaʼ mu manindxu̱u̱ apóstol ndrígóo. Judas nigiʼdoo wéñuʼ ku̱ma̱ ndrígóo Jeobá ga̱jma̱a̱ numuu Jesús. Mú, ndiéjunʼ nigíʼnuu xá. Mú nda̱wa̱á ni̱jkha̱ kayáa mandxaʼwáminaʼ i̱ndó ga̱jma̱a̱ numuu ikhaa ga̱jma̱a̱ nigujua̱a̱ Jesús náa xa̱bu̱ bi̱ sia̱nʼ ga̱jma̱a̱ mbá 30 mbújkha̱a̱ plata. Judas xáʼganú maxtáa kámuu mbiʼi.

Lá narmáʼáan a̱jkia̱nʼ eʼni Guejazi, bi̱ nijmañulúʼ ga̱jma̱a̱ numuu náa Historia 69 ráʼ. Ikhaa nindoo magiʼdoo xtíin ga̱jma̱a̱ mbújkha̱a̱ dí raʼkháa ndrígóo ikhaa. Ikhaa niʼninduwaʼ mu magiʼdoo xúgíʼ rígi̱, ga̱jma̱a̱ Jeobá nikunguanʼ castigo náa ikhaa. Makuʼma castigo náa ikháanʼ á mu tseʼnimbulú xtángoo ndrígóo.

Mú kuwa mbaʼin wéñuʼ xa̱bu̱ bi̱ májánʼ a̱jkiún bi̱ nini má xúʼko̱ ñajunʼ Jeobá. Lá ragájkhun rí nandulúʼ manindxulú xóo ikhiin xáʼ. Ada̱ lájuíin bi̱ nagumbiʼyuu Samuel nindxu̱u̱ mbá xkri̱da májánʼ. Garmáʼáan a̱jkia̱nʼ, rí ndiʼyáá náa Historia 55, nákha ikhaa nigiʼdoo a̱jkhu̱ tsiguʼ o witsu tsiguʼ índo̱ ikhaa nigíʼdu̱u̱ niʼni ñajunʼ Jeobá náa tabernáculo. Ikha jngó, maski ajndu ikháánʼ ni̱ndxa̱ʼ mbáa ada̱ lájuíin ma̱ndoo má matani ñajunʼ Dios.

Xúʼko̱, xúgiáanʼ nandulúʼ muʼni xó má niʼni Jesucristo. Asndu nákha ikhaa ninindxu̱u̱ mbáa ada̱ lájuíin nixtáa náa templo mu maʼthúún eʼwíínʼ xa̱bu̱ ga̱jma̱a̱ numuu Anu̱u̱ bi̱ xtáa mekhuíí, xó má ndiʼyáá náa Historia 87. Guʼyaridáá má xúʼko̱ xkri̱da ndrígóo Jesús. Guʼthúún xúgínʼ xa̱bu̱ ga̱jma̱a̱ numuu Dios bi̱ májánʼ wéñuʼ, Jeobá, ga̱jma̱a̱ A̱ʼdióo, Jesucristo. Á mu nuʼni xúgíʼ rígi̱, ma̱ndoo makuwáanʼ kámuu mbiʼi náa mbá nuxi̱ʼ Ku̱ba̱ʼ mitsaan ndrígóo Dios.