116-нҗы хекая

Эбеди яшамак үчин нәме этмели?

ГЫЗҖАГАЗЫҢ достлары билен нәме окаяныны билйәңми? Догры, олар хем «Мукаддес Язгылардан хекаялар» атлы китабың «Эбеди яшамак үчин нәме этмели?» диен хекаясыны окаярлар.

Олар хекаяны окап, нәме билдикә? Илки билен, эбеди яшамак үчин Ехова хем-де онуң Оглы Иса барада билим алмалы. Инҗилде: «Эбеди яшамак үчин еке-тәк хакыкы Худайы ве Иса пыгамбери танамалы» дийилйәр.

Худай ве Иса барада нәдип билим алып боларка? Биринҗиден, «Мукаддес Язгылардан хекаялар» атлы китабы башдан-аяк окап чыкмалы. Шу китапда Ехова ве Иса барада көп затлар айдыляр, шейле дәлми? Шейле хем, онда оларың эден ве этҗек көп ишлери барада айдыляр. Эмма диңе бу китабы окамак етерлик дәл.

Чагаларың өңүнде ене-де бир китабы гөрйәңми? Бу Мукаддес Язгылар. Сениң окан хекаяларың Мукаддес Язгылардан алынды. Шонуң үчин хер хекаяның ашагындакы аятлары бири саңа окап берсин. Мукаддес Язгылар Ехова догры гуллук эдип, эбеди яшайшы алмак үчин нәме этмелидигиңи айдяр. Шонуң үчин Мукаддес Язгылары хер гүн окамагы эндик эдинмели.

Эмма Ехова Худай ве Иса Месих барада билим алмак етерлик дәл. Биз олар барада көп билсек-де, эбеди яшайшы алмазлыгымыз мүмкин. Онда ене-де нәме этмеликә?

Биз Худайың айдышы ялы яшамалы. Иуда Искариот ядыңдамы? Ол Исаның сайлан 12 ресулының бириди. Ехова ве Иса барада Иуда көп затлар билйәрди. Йөне оңа нәме болды? Бирнәче вагтдан, ол өз пейдасыны гөзләп, Исаны 30 күмүш пула сатды. Шонуң үчин Иуда эбеди яшайшы алып билмез.

Гехаз атлы адам ядыңдамы? Ол барада 69-нҗы хекаяда окапдык. Ол башга бир адамың эшигини ве пулуны алмак иследи. Шолары алмак үчин ялан сөзледи. Ехова оңа җеза берди. Бизем Худайың канунларына гулак асмасак, ол бизе-де җеза берер.

Йөне Ехова гуллук эден говы адамларам барды. Биз шол адамлар ялы болмак ислейәрис, шейле дәлми? Кичиҗик Самуел говы гөрелде гөркезди. Ядыңда болса, 55-нҗи хекаяда ол дөрт-бәш яшындака Ехованың ыбадатханасында гуллук эдип башлады дийилйәр. Шонуң үчин сен нәче яшыңда болсаң-да, Ехова гуллук этмәге өзүңи яш гөрме.

Элбетде, бизиң хеммәмиз Исадан гөрелде алмак ислейәрис. 87-нҗи хекаядан яш Исаның ыбадатханада гөкдәки Атасы барада адамлар билен гүррүң эдиши барада окапдык. Гел, бизем шейле эдели. Бизиң аҗайып Худайымыз Ехова ве Иса пыгамбер барада көп адамлара гүррүң берели. Шейтсек, биз ер йүзүнде болҗак Җеннетде яшап билерис.

Яхя 17:3; Зебур 145:1—21.