¿WAN maʼ xa naʼa jasa wan skʼumajel ja yal akʼix it soka smojiki? Jaʼi, jaʼa juʼun it wana skʼumajel ja weʼn... Ja jlibro wa sloʼiltay loʼilik bʼa Biblia. Jaʼ wane skʼumajel ja junxta loʼil it... «Jastal oj bʼobʼ ajyukotik sakʼan bʼa tolabida.»

¿Wan maʼ xa naʼa jasa wane snebʼjeli? Wane snebʼjel ja stʼilanil yiʼoj oj jnebʼtik sbʼaja Jyoba soka Yunin Jesús bʼa oj ajyukotik sakʼan tolabida. Nebʼa sbʼaja kechan Dyos smeranili, soka bʼa Yunin Jesukristo, pes ja Biblia wa xyala jaʼ it ja bʼej wa x-ikʼwani och ja bʼa sakʼanil bʼa tolabida.

¿Jastal oj jnebʼtik sbʼaja Dyos Jyoba soka bʼa Yunin Jesusi? Jun modo jaʼ skʼumajel man wa xkʼeʼi sok man wa xchʼaki Ja jlibro wa sloʼiltay loʼilik bʼa Biblia. Ja juʼuni wa sloʼiltay jitsan jastik junuk sbʼaja Jyoba soka Jesús, sbʼaja jastik junuk skʼulunejeʼi soka jastik ojto skʼulukeʼi. Pe cha ay jun pilan juʼun tʼilan skʼumajel.

¿Waxa wila ja pilan juʼun tey bʼa dibujo? Jaʼa Biblia. Leʼa maʼ oj skʼumukawi bʼa Biblia spetsanil ja tekstoʼik wa xyiʼajan jujune ja loʼiliki. Ja Biblia wa xyala kabʼtik tsʼikan lek ja jasa oj jkʼuluktik bʼa oj kaʼteltaytik toj ja Jyoba sok bʼa oj ajyukotik sakʼan bʼa tolabida. Ja yuj tʼilan la kʼajyukotik skʼumajel tikʼan.

Pe mi malanuk ita skʼumajel sok snebʼjel sbʼaja Dyos Jyoba soka Jesukristo. Bʼobʼta jel ja jastik junuk wa xnaʼatik bʼa yeʼnle soka jastik wa sjeʼaweʼi, pe ja jaw mi wa stojolan ojxa jtatik ja jsakʼaniltik bʼa tolabida, ayto ni jas skʼana oj jkʼuluktik.

Tʼilan oj jkʼuluktik ja jastik wa xnebʼatik bʼa Biblia. ¿Wan maʼ xjulakʼujol ja Judas Iscariote? Ja yeʼn jaʼ june ja bʼa 12 snebʼumanik stsaʼa ja Jesús. Judas jelni snaʼa sbʼaja Jyoba sok bʼa Jesús. Pe ¿jasa ekʼ sbʼaj? Soka tyempo kechanta waj skʼujol bʼa yeʼna sok yiʼaj yi spatik ja Jesús yuj 30 sat plata. Judas xchʼayani ja sakʼanil bʼa tolabida.

¿Cha wan maʼ xjulakʼujol ja Guehazí, ja it maʼ jnebʼatikta tʼusan ja bʼa loʼil 69? Ja yeʼn okʼ skʼujol aʼajuk yi kʼuʼal sok takʼin bʼa mi sbʼajuk. Sleʼa abʼal bʼa aʼajuk yi ja jastik junuk it, soka Jyoba skʼulan kastigar. Chomajkil jachʼni oj ekʼ jbʼajtik ja keʼntiki ta mi xkʼuʼantik ja smandariki.

Pe ayni jitsan ixuk winik bʼa yaʼteltaye toj ja Jyoba. Wani xcha jkʼanatik jachʼ oj jkʼuluktik ja keʼntiki, ¿anke meran? Ja yal kerem Samuel juni lekil sjeʼjela. Jastal kilatik ja bʼa loʼil 55, ja yeʼn kechanto chane ma joʼe jabʼil yiʼoj ja kʼe yaʼteltay ja Jyoba ja bʼa stabernáculo. Ja yuj, anima jelto ala yal chʼina ojni bʼobʼ awaʼteltay ja Dyosi.

Jpetsaniltik wa xkʼana oj jnochtik ja smodo ja Jesusi. Jastal wa sjeʼa ja loʼil 87, masan yal xchʼinil tini ajyi bʼa templo bʼa sloʼilta yabʼ ja tuki sbʼaja sTati. La jnochtik ja smodo bʼa sloʼiltajel yabʼ ja tuki ja janekʼ xbʼobʼkujtiki sbʼaja lekil jDyostik, Jyoba, soka bʼa Yunin Jesukristo. Ta wa xkʼulantik spetsanil ja it, ojni ajyukotik sakʼan tolabida ja bʼa yajkʼachil sKʼachinubʼ ja Dyos bʼa Luʼumi.