Ni nga amba uri musidzanyana na khonani dzawe vha khou vhalani? Ee, ndi yeneino bugu ine na khou vhala-Bugu Yanga ya Mafhungo a Bivhili. Nahone vha khou vhala enea mafhungo ane na khou vhala—“Nḓila Ya u Tshila Tshoṱhe.”

Ni a ḓivha uri vha khou gudani? Tsha u thoma, uri hu ṱoḓea uri ri ḓivhe Yehova na Murwa wawe Yesu arali ri tshi ḓo tshila tshoṱhe. Bivhili i ri: ‘Nḓila ya u tshila tshoṱhe ngei. Gudani nga Mudzimu wa ngoho, na Murwa wawe Yesu Kristo.’

Ri nga guda hani nga ha Yehova na Murwa wawe Yesu? Iṅwe nḓila ndi nga u vhala Bugu Yanga ya Mafhungo a Bivhili u bva u thomani u swika u fhedzani. I amba zwinzhi nga ha Yehova na Yesu, a si zwone? Nahone i amba zwinzhi nga ha zwe vha ita na zwine vha ḓo ita. Fhedzi hu ṱoḓea uri ri ite zwo engedzeaho.

Ni a i vhona iṅwe bugu i re fhasi? Ndi Bivhili. Ni ri muṅwe a ni vhalele zwipiḓa zwa Bivhili zwe mafhungo a ino bugu a thewa khazwo. Bivhili i ri fha mafhungo o ḓalaho ane ra ṱoḓa uri roṱhe ri kone u shumela Yehova nga nḓila yo fanelaho ra wana vhutshilo vhu sa fheli. Ngauralo ri fanela u zwi ita nḓowelo u ḓigudisa Bivhili zwifhinga zwoṱhe.

Fhedzi u sokou guda nga ha Yehova na Yesu Kristo a zwo ngo eḓana. Ri nga vha na nḓivho nnzhi-nnzhi nga havho na pfunzo dzavho, ra si wane vhutshilo vhu sa fheli. Ni a ḓivha uri hu ṱoḓea mini hafhu?

Hu ṱoḓea na uri ri tshile nga u tendelana na zwine ra guda. Ni a mu humbula Yudasi Iskariote? O vha e muṅwe wa vha 12 vhe Yesu a vha nanga uri vha vhe vhaapostola vhawe. Yudasi o vha e na nḓivho nnzhi nga ha Yehova na Yesu. Fhedzi nga murahu a vha na tseḓa, a ambulula Yesu kha maswina awe nga zwipiḓa zwa 30 zwa maseṱha. Ngauralo Yudasi ha nga wani vhutshilo vhu sa fheli.

Gehasi ni a mu humbula, munna we ra guda nga hae kha Mafhungo a 69? O ṱoḓa u vha na zwiambaro na tshelede zwe zwa vha zwi si zwawe. Ngauralo a zwifha uri a zwi wane. Fhedzi Yehova a mu ṱarafa. U ḓo ri ṱarafa-vho arali ri sa mu thetshelesi.

Fhedzi hu na vhathu vhanzhi vhavhuḓi vhe vha ḓi shumela Yehova nga u fulufhedzea. Ri ṱoḓa u fana navho, a si zwone? Samuele muṱuku ndi tsumbedzo yavhuḓi ya u i tevhela. Humbulani, samusi ro zwi vhona kha Mafhungo a 55, o vha e na miṅwaha miṋa kana miṱanu a tshi thoma u shumela Yehova denndeni yawe. Hu sa londwi uri ni muṱuku hani, a ni muṱukusa u shumela Yehova.

Vhukuma, muthu ane roṱhe ra ṱoḓa u mu tevhela ndi Yesu Kristo. Na musi e mutukana, samusi zwo sumbedzwa kha Mafhungo a 87, o vha e thembeleni a tshi khou amba na vhaṅwe nga ha Khotsi awe wa ṱaḓulu. Kha ri mu edzise. Kha ri vhudze vhanzhi nga hune ra nga kona nga ha Mudzimu washu a mangadzaho Yehova na Murwa wawe, Yesu Kristo. Arali ra ita izwi zwithu, ri ḓo kona u tshila tshoṱhe paradisoni ntswa ya Mudzimu kha ḽifhasi.

Yohane 17:3; Psalme ya 145:1-21.