ANA mpaka ajimanyilile buku jakuŵalanga kamwalika yimpepe ni acimjakweŵa? Jili buku jakuŵalanga wawojoji jakuti Buku Jangu ja Ngani sya M’Baibulo. Jemanjaji akuŵalangasoni ngani jakuŵalanga wawojoji jakuti “Yampaka Tutende Kuti Tutame ni Umi Kwangamala.”

Ana akumanyilila yakulijiganya? Candanda, tukusosekwa kummanyilila Yehofa ni Yesu Mwanagwe, naga tukusaka kutama ni umi wangamala. Baibulo jikusaŵeceta kuti: ‘Lyeleli lili litala lyakutamila kwangamala. Kulijiganya ya Mlungu jusyesyene, soni Mwanace juŵamtumile pacilambo capasi, Yesu Klistu.’

Ana mpaka tulijiganye catuli ya Yehofa soni Yesu Mwanagwe? Litala limo lili kuŵalanga Buku Jangu ja Ngani sya M’Baibulo kutandila kundanda mpaka kumbesi. Jikusala yindu yejinji yakwamba Yehofa ni Yesu, ngati m’yoyo? Jikusalasoni yindu yejinji yatesile jemanjaji soni yacacitenda pacangakaŵapa. Nambo tukusosekwa kutenda yejinji ngaŵa kwamba kuŵalangape bukuji.

Ana akujiwona buku jine jajili pasijo? Jelejo jili Baibulo. Am’ŵende mundu jwine kuti ŵaŵalanjileje mbali sya m’Baibulo kwasityocele ngani sya m’bukumu. Baibulo jikusatumanyisya yejinji yatukusosekwa kutenda kuti tumtumicile Yehofa mwakuŵajilwa, soni kuti tukapate umi wangamala. Sambano tukusosekwa kola cisyoŵe cakulijiganya Baibulo ndaŵi syosope.

Nambo kwamba kulijiganya ya Yehofa ni Yesu Klistu nganikuŵa kwakwanila. Komboleka kwamanyililaga jemanjaji mnope, soni yijiganyo yawo nambo ni ngaja kuwupata umi wangamala. Ana akumanyilila yine yayikusosekwasoni?

Tukusosekwasoni kutamaga mwakamulana ni yindu yatukulijiganya. Ana akumkumbucila Yudasi Isikaliyoti? Jwalakwe ŵaliji jumo jwa ŵandumetume 12 ŵele Yesu ŵaŵasagwile. Yudasi ŵammanyililaga mnope Yehofa, soni Yesu. Nambo ana camtendecele cici? Pali papite ndaŵi jwalakwe ŵaliji jwakulikwesya, soni ŵampelece Yesu ni mbiya syakwana 30. M’yoyo Yudasi ngasapocela umi wangamala.

Ana akumkumbucila Gehasi, mundu jutwalijiganyisye mu Ngani 69? Jwalakwe ŵasakaga kupata yakuwala yasyene ni mbiya syasyene. Mwati ŵalambwisye pakusaka kupata yinduyi. Nambo Yehofa ŵampele cilango. M’wejisoni cacitupa cilango naga ngatukupikanila malamusi gakwe.

Nambopana ŵandu ŵajinji ŵambone ŵaŵamtumicile Yehofa mwakulupicika. Tukusosekwa kuŵa mpela jemanjaji, ngati m’yoyo? Mcanda Samueli ali cisyasyo cambone. Akumbucile kuti mu Ngani 55, twayiweni kuti jwalakwe ŵagambile kola yaka mcece kapena msanope paŵatandaga kutumicila Yehofa panyumba jakulambilila. M’yoyo cinga wawojo ali kamwanace ka msingu watuli, komboleka kumtumicila Yehofa.

Nambope, wosope tukusosekwa kuya Yesu Klistu. Atamose paŵaliji mwanace, mpela mwatuyiwonele mu Ngani 87, jwalakwe ŵaliji mu nyumba jakulambilila ni kusalaga ya Atatigwe ŵakwinani. Kwende tukuye cisyasyo cakwe. Kwende tulinjelinjeje kwasalila ŵandu ŵajinji yakwamba Yehofa Mlungu jwetu jwambone, soni ya Mwanagwe Yesu Klistu. Naga tukutenda yeleyi tucitama ni umi wangamala mu paladaiso jwasambano jwa Mlungu pacilambo capasi.