Historia 116

Ximodo guibáninu sin qué chuʼ dxi gátinu

ÑEE nannuʼ xi cayuunda dxaapahuiiniʼ riʼ ne ca xhamigu la? Ya, laacabe cayuundacabe laca libru ni cayuundaluʼ riʼ... Libru stinneʼ de ca historia stiʼ Biblia. Ne historia riʼpeʼ nga cayuundacabe... «Ximodo guibáninu sin qué chuʼ dxi gátinu».

Nannuʼ xi caziidicabe la? Primé la? de que naquiiñeʼ guizíʼdinu de Jiobá ne de Xiiñibe Jesús para guibáninu sin qué chuʼ dxi gátinu. Biblia na: Ndiʼ nga neza ni ziné lii lu ti guendanabani ni qué zaluxe. Biziidiʼ de tobi lucha Dios ni dxandíʼ dxandipeʼ, ne de Xiiñibe, Jesucristu.

Ximodo zanda guiziidinu de Jiobá Dios ne de Xiiñibe Jesucristu yaʼ. Tobi de laani nga gúʼndanu Libru stinneʼ de ca historia stiʼ Biblia de ra bizulú hasta ra guiluxe. Libru riʼ caniʼni stale de Jiobá ne de Jesús. Ne caniʼni stale de cani maʼ bíʼnicabe ne cani chigunirúcabe. Peru laaca naquiiñeʼ gúʼndanu sti cosa.

Ruuyuʼ libru nexheʼ layú ca la? Nga nga Biblia o Stiidxaʼ Dios. Gunabaʼ tuuxa guundané lii Biblia ra cá guiráʼ historia ni zeeda lu libru riʼ. Biblia cusiene laanu xi naquiiñeʼ gúninu para guzuubanu stiidxaʼ Jiobá jnézapeʼ ne ganda ugaandanu guendanabani ni qué zaluxe ca. Pur nga runi, naquiiñeʼ guiaʼnu gúʼndanu Biblia guiráʼ dxi.

Peru cadi guizíʼdisinu de Jiobá ne Jesús nga maca bilúxeni. Zándaca gánnanu stale de laacabe, ne de ni rusiidicabe ne cadi ugaandanu guendanabani ni qué zaluxe ca. Nannuʼ xiruʼ naquiiñeʼ gúninu la?

Laaca naquiiñeʼ gúninu guiráʼ ni guizíʼdinu. Rietenalaʼdxuʼ de Judas Iscariote la? Laabe gúcabe tobi de ca doce apóstol ni gulí Jesús que. Judas guizáʼ gúnnabe de Jiobá ne de Jesús. Peru, xi gúcabe yaʼ. Qué nindaa diʼ biyúbibe puru para laasibe dede bitoobe Jesús pur treinta moneda de plata. Judas qué zacaa diʼ guendanabani ni qué zaluxe.

Rietenalaʼdxuʼ de Guehazí, ni bizíʼdinu caadxi de laa lu Historia 69 que la? Laabe gucaláʼdxibe nicaabe lari ne bidxichi ni cadi stibe. Ne bisiguiibe para gunda gucuaabe guirani, ngue runi Jiobá biʼniʼ castigar laabe. Laaca zuni castigarbe laanu pa qué guzuubanu diidxaʼ ca ley stibe.

Peru laaca guyuu stale binni nachaʼhuiʼ ni qué nusaana de ñuni ni na Jiobá sin nuchee. Ñee cadi dxandíʼ racaláʼdxinu gácanu casi laacabe la? Ti ejemplu sicarú ni nápanu nga de hombrehuiiniʼ ni biree lá Samuel que. Bietenalaʼdxiʼ, casi biiyanu lu Historia 55 que la? laabe nápabe tapa o gaayuʼ si iza ora bizulube bíʼnibe ni na Jiobá ndaaniʼ tabernáculo stiʼ. Nga runi, neca nahuiiniruluʼ, zanda guʼnuʼ ni na Jiobá.

Ya, guiranu racaláʼdxinu gácanu casi Jesucristu. Laabe neca nahuiinibe, peru bisiidibe de Bixhózebe ni nuu guibáʼ ndaaniʼ yuʼduʼ stiʼ, casi biiyanu lu Historia 87 que. Gúninu casi bíʼnibe ca. Guiníʼnenu binni de Dios stinu Jiobá, ne de Xiiñibe, Jesucristu. Pa gúninu guiráʼ ndiʼ la? zanda guibáninu ndaaniʼ paraísu nacubi stiʼ Dios lu Guidxilayú riʼ, sin qué chuʼ dxi gátinu.

Juan 17:3; Salmo 145:1-21.

[Foto ni zeeda lu yaza 254]

Libru stinneʼ

DE CA HISTORIA

STIʼ BIBLIA

Stiidxaʼ Dios

Stiidxaʼ Dios