¿NANLO ni mbioxgonaʼyen reʼ né ximig cayoʼol la? Scú láani, libro ni cayoʼolcalo ngú ni cayoʼolyibu, Xi libriya ni rasuidy historias xtuny la Biblia. Historia ni cayoʼolcabu ngúca cayoʼol lo ni laa, «Ximod guibanyno tipzó».

¿Nanlo xí casuidyibu la? Nír non guisuidyno de Jehová né de Xiimbu Jesús par labúu guibanyno tipzó. La Biblia ná: Ndeʼ néz ni riné par guibanyno tipzó. Bisuidy par gannlo de toibguielot Dios ni rasuidy xinésni, né de Xiimbu Jesucristo.

¿Ximod labúu guisuidyno de Jehová né de Xiimbu Jesús? Toib mod ni labúu gonyno láani ngú golno guidopynac, Xi libriya ni rasuidy historias xtuny la Biblia. Libro reʼ rasetlagoluni xidal cós ni Jehová né Jesús ma bunyibu né ni gonyrayibu. Per noʼ stoib libro ni non golno.

¿Rabilo libro ni náaxh layoo ca la? Láani nga la Biblia. Biyopy ni gacné looy guisuidylo ni ná la Biblia ro bireʼ guirá historias ni sieed ló libro ni cayoʼolcalo. La Biblia rasuidytzaayni lóono ni non gonyno par gonyno xchiin Dios mod náni láabu né scú labúu guibanyno tipzó. Por ngú, diti non guisianno de golno la Biblia guirá dzú.

Per ni guisuidyno de Jehová né Jesucristo diti ngúsi láani. Labúu nimbutzaayno layibu né ni rasuidyibu, per ná scú diti labúu ñonyno gann nabanyno tipzó. ¿Nanlo xí más raquiinni la?

Láaca raquiin guibanyno mod cayenno ló la Biblia. ¿Rasetnaladxlo Judas Iscariote la? Láabu gócbu toibtica de doce buñ ni Jesús golú par ñac xpiin. Judas bimbutzaaybu xtiitz Jehová né Jesús. Per ¿xí gosaclobu? Bidxin midid bunybu pensary en lásibu né bunycuentbu Jesús por 30 nilas de plata. Judas diti sabanybu tipzó ló Gudxlio.

¿Rasetnaladxlo Guehazí, buñguieeu ni bisuidyno ló Historia 69 la? Láabu bisobladxbu lairy né bidxiich ni diti góc xtunybu. Biscúbu par labúu cuaʼbu láani, né por ngú Jehová buny castigar láabu. Láaca sony castigarbu lóono pal diti rasobdiitzno xileybu.

Per noʼ xidal buñtzay ni buny ni ná Jehová mod náapabu. ¿Nigolú rioladxno gacno mod gocyibu la? Samuel toib mbioxien ni bisian toib galán mod par guisuʼno. Rasetnaladxlo mod bisuidyno ló Historia 55, láabu napbu nosi tap o gáay íz órni gosalobu bunybu xchiin Dios lainy yoʼ ro rac adorar Jehová. Por ngú ná nacloʼ mbiox, diti gonylo pensary que diti labúu gonylo xchiin Dios.

Scú láani, guiráno raniiny guicanalno Jesucristo. Historia 87 raslooy que desde dzú nacbu mbioxien goyoʼbu lainy yoʼ xiroʼ ro rac adorar Jehová né goníbu de Bixiosbu ni noʼ guibá. Guisuʼno mod bunybu. Guininéno xidal buñ ruti rigaʼlni lóono xí ni ná Jehová, né Xiimbu Jesucristo. Pal ronyno guirá ndeʼ, labúu guibanyno tipzó lainy lagary móz ló Gudxlio ni Dios guiduidy lóono.