Usa ka Dili-Maihap nga Dakong Panon
Kapitulo 20
Usa ka Dili-Maihap nga Dakong Panon
1. Human mahubit ang pagtimbre sa 144,000, unsang lain pang grupo ang nakita ni Juan?
HUMAN mahubit ang pagtimbre sa 144,000, si Juan nagpadayon sa pagtaho sa usa sa labing makaiikag nga mga pinadayag sa tibuok Kasulatan. Lagmit milukso ang iyang kasingkasing sa kalipay samtang nag-asoy siya niini, nga nag-ingon: “Human niining mga butanga nakita ko, ug, tan-awa! usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan, nga nagbarog atubangan sa trono ug atubangan sa Kordero, nga nagsul-ob ug maputing tag-as nga mga besti; ug nanagdalag mga palwa sa palma diha sa ilang mga kamot.” (Pinadayag 7:9) Oo, tungod sa pagpugong sa upat ka hangin, adunay lain pang grupo nga maluwas gawas sa 144,000 ka membro sa espirituwal nga Israel: usa ka dakong panon nga lainlaig pinulongan ug gikan sa lainlaing mga nasod. a—Pinadayag 7:1.
2. Sa unsang paagi gisabot sa mga komentarista sa kalibotan ang dakong panon, ug sa unsang paagi gilantaw sa mga Estudyante sa Bibliya kining grupoha kaniadto?
2 Gisabot sa mga komentarista sa kalibotan kining dakong panon ingong mao ang unodnong mga dili-Hudiyo nga nakombertir sa Kristiyanidad o mao ang mga Kristohanon nga gipatay ingong martir nga moadto sa langit. Bisan ang mga Estudyante sa Bibliya kaniadto naglantaw kanila ingong segundaryo nga langitnong matang, sumala sa gipakita sa 1886 nga Tomo I sa Studies in the Scriptures, The Divine Plan of the Ages: “Dili nila maangkon ang ganti nga mahimong hari ug ang samag-diyos nga kinaiyahan, apan sila sa ulahi matawo ingong espirituhanong mga persona nga mas ubos ug kahimtang kay sa samag-diyos nga kinaiyahan. Bisan tuod sila gihimong balaan, sila nadaog sa kalibotanong espiritu mao nga sila napakyas sa paghalad sa ilang mga kinabuhi.” Ug sa 1930, ang maong pagtuo gipahayag sa librong Light, Basahon Uno: “Kadtong naglangkob sa dakong panon wala mosanong sa imbitasyon nga mahimong masibotong mga saksi alang sa Ginoo.” Sila gihubit ingong grupo nga nagpakamatarong sa kaugalingon nga may kahibalo sa kamatuoran apan wala kaayo maningkamot sa pagwali niini. Sila makaadto sa langit ingong segundaryo nga matang ug dili makigbahin sa pagmando uban kang Kristo.
3. (a) Unsang paglaom ang gihuptan sa pipila ka matarong ug kasingkasing nga sa ulahi nagmasiboton sa pagsangyaw? (b) Sa unsang paagi gipatin-aw sa The Watch Tower sa 1923 ang sambingay bahin sa mga karnero ug mga kanding?
3 Bisan pa niana, adunay laing mga kauban ang dinihogang mga Kristohanon nga sa ulahi nagmasiboton kaayo sa pagsangyaw. Sila wala mangandoy nga moadto sa langit. Sa pagkatinuod, ang ilang paglaom nahiuyon sa ulohan sa usa ka pakigpulong publiko nga gipasiugda sa katawhan ni Jehova gikan sa 1918 ngadto sa 1922. Sa sinugdan, kini nag-ulohang “Ang Kalibotan Natapos Na—Minilyon nga Buhi Karon Dili na Gayod Mamatay.” b Wala madugay human niana, ang magasing Watch Tower sa Oktubre 15, 1923, nagpatin-aw sa sambingay ni Jesus bahin sa mga karnero ug mga kanding (Mateo 25:31-46), nga nag-ingon: “Ang mga karnero naghawas sa tanang katawhan sa kanasoran, nga bisag dili inanak-sa-espiritu sila nakiling sa pagkamatarong, nga nag-ila kang Jesu-Kristo ingong Ginoo diha sa ilang hunahuna ug nangandoy ug naglaom ug mas maayong panahon ilalom sa iyang pagmando.”
4. Sa unsang paagi ang kahayag bahin sa yutan-ong matang anam-anam nga nagkadan-ag sa 1931? sa 1932? sa 1934?
4 Paglabay sa pipila ka tuig, sa 1931, gipatin-aw sa librong Vindication, Basahon Uno, ang Ezequiel kapitulo 9, nga ang mga tawo nga gimarkahan sa agtang alang sa kaluwasan sa kataposan sa kalibotan mao ang mga karnero sa gihisgotang sambingay. Ang Vindication, Basahon Tres, nga giluwatan sa 1932, naghubit sa matarong ug kasingkasing nga dili-Israelinhong lalaki nga si Jehonadab, nga misakay sa karo sa dinihogan nga si Haring Jehu sa Israel ug miuban aron makita ang kasibot ni Jehu sa paglaglag sa bakak nga mga magsisimba. (2 Hari 10:15-17) Ang libro nag-ingon: “Si Jehonadab naghawas o naglandong sa matang sa mga tawo karon sa yuta sa panahong ang buluhaton ni Jehu [sa pagpahibalo sa mga paghukom ni Jehova] nagpadayon, mga tawo nga may maayong kabubut-on, nga wala magpahiuyon sa organisasyon ni Satanas, nga midapig sa pagkamatarong, ug mao ang tipigan sa Ginoo panahon sa Armagedon, luwason niana nga kasakitan, ug hatagag kinabuhing walay kataposan dinhi sa yuta. Sila ang naglangkob sa ‘mga karnero’ nga matang.” Sa 1934, gipatin-aw sa The Watchtower nga kining maong mga Kristohanon nga may yutan-ong paglaom kinahanglang magpahinungod kang Jehova ug magpabawtismo. Ang kahayag bahin niining yutan-ong matang anam-anam nga nagkadan-ag.—Proverbio 4:18.
5. (a) Unsang pag-ila bahin sa dakong panon ang gihimo sa 1935? (b) Sa dihang gipatindog ni J. F. Rutherford niadtong 1935 ang mga kombensiyonista nga naglaom nga mabuhing walay kataposan sa yuta, unsa ang nahitabo?
5 Ang pagsabot sa Pinadayag 7:9-17 nagakasanag na gayod pag-ayo! (Salmo 97:11) Sublisubling nanghinaot ang magasing Watchtower nga ang kombensiyon nga gieskedyul sa Mayo 30 ngadto sa Hunyo 3, 1935, sa Washington, D.C., U.S.A., mahimong “matuod nga kahupayan ug kaayohan” ngadto sa mga tawo nga gihulagwayan ni Jehonadab. Mao gayod kana ang nahitabo! Sa makapadasig nga pakigpulong nga nag-ulohang “Ang Dakong Panon,” nga gipahayag ngadto sa mga 20,000 ka kombensiyonista, si J. F. Rutherford, nga maoy nanguna sa tibuok-kalibotang pagsangyaw niadtong panahona, mihatag ug Kasulatanhong pamatuod nga ang modernong-adlaw nga ubang mga karnero mao ra usab ang dakong panon sa Pinadayag 7:9. Sa kataposan niining pakigpulonga, siya nangutana: “Mahimo bang motindog ang tanang naglaom nga mabuhing walay kataposan sa yuta?” Sa dihang nanindog ang usa ka dakong bahin sa mga nanambong, ang mamumulong miingon: “Tan-awa! Ang dakong panon!” Dihay kalit nga kahilom, nga gisundan sa lanog nga pagpamakpak. Pagkadako sa kalipay sa Juan nga matang—ug sa Jehonadab nga grupo usab! Pagkasunod adlaw, 840 ka bag-ong mga Saksi ang gibawtismohan, nga kadaghanan kanila nag-angkon nga bahin nianang dakong panon.
Pagtino Kon Kinsa Gayod ang Dakong Panon
6. (a) Nganong tin-aw natong masabtan nga ang dakong panon mao ang modernong-adlaw nga grupo sa dedikadong mga Kristohanon nga naglaom nga mabuhi sa walay kataposan sa yuta? (b) Unsay gisimbolohan sa puting tag-as nga mga besti sa dakong panon?
6 Nganong makaingon gayod kita nga ang dakong panon mao ang modernong-adlaw nga grupo sa dedikadong mga Kristohanon nga naglaom nga mabuhi sa walay kataposan sa yutang gipanag-iya sa Diyos? Diha sa panan-awon, unang nakita ni Juan ang langitnong grupo nga “gipalit . . . alang sa Diyos gikan sa matag tribo ug pinulongan ug katawhan ug nasod.” (Pinadayag 5:9, 10) Ang dakong panon susama niana ug gigikanan apan lahi ang ilang dulnganan. Dili sama sa Israel sa Diyos, wala tinoang daan ang ilang gidaghanon. Walay tawo ang makasulti kon pila unya sila. Ang ilang tag-as nga mga besti gilabhan ug gipaputi sa dugo sa Kordero, nga nagsimbolo sa ilang matarong nga baroganan sa atubangan ni Jehova tungod sa ilang pagtuo sa halad ni Jesus. (Pinadayag 7:14) Ug sila nagwarawara ug mga palwa sa palma, nga nagbayaw sa Mesiyas ingong ilang Hari.
7, 8. (a) Ang pagwarawara ug mga palwa sa palma nagpahinumdom gayod kang apostol Juan sa unsang mga hitabo? (b) Unsay kahulogan sa pagwarawara sa dakong panon ug mga palwa sa palma?
7 Samtang nagtan-aw siya niining panan-awona, lagmit nahinumdom si Juan sa kataposang semana ni Jesus sa yuta kapin sa 60 ka tuig na ang milabay. Sa Nisan 9, 33 K.P., sa dihang ang panon sa katawhan nanghugop sa pagsugat kang Jesus sa dihang siya misulod sa Jerusalem, sila “nanguhag mga palwa sa kahoyng palma ug nanggula sa pagsugat kaniya. Ug sila misinggit: ‘Luwasa, kami nagaampo kanimo! Bulahan siya nga nagaanhi sa ngalan ni Jehova, ang hari sa Israel!’” (Juan 12:12, 13) Sa susamang paagi, ang pagwarawara ug mga palwa sa palma ug ang pagsinggit sa dakong panon nagpakita sa ilang dili-mapugngang kalipay sa pagdawat kang Jesus ingong tinudlong Hari ni Jehova.
8 Walay duhaduha nga ang mga palwa sa palma ug ang malipayong pagsinggit nagpahinumdom usab kang Juan sa Pista sa mga Balongbalong sa karaang Israel. Mahitungod niining pistaha si Jehova nagsugo: “Ug panguhaon ninyo sa unang adlaw ang bunga sa maanindot nga mga kahoy, ang mga palwa sa mga kahoyng palma ug ang mga sanga sa daghag-sanga nga mga kahoy ug ang mga alamo sa bul-oganang walog, ug magmaya kamo atubangan ni Jehova nga inyong Diyos sa pito ka adlaw.” Ang mga palwa sa palma gigamit ingong timaan sa kasadya. Ang temporaryong mga balongbalong maoy usa ka pahinumdom nga giluwas ni Jehova ang iyang katawhan gikan sa Ehipto, aron mopuyo sa mga balongbalong didto sa kamingawan. “Ang langyaw nga pumoluyo ug ang batang ilo-sa-amahan ug ang babayeng balo” nakigbahin niini nga pista. Ang tibuok Israel angay nga “magmalipayon gayod.”—Levitico 23:40; Deuteronomio 16:13-15.
9. Sa unsang paghugyaw sa kalipay miduyog ang dakong panon?
9 Busa, haom nga ang dakong panon, bisag dili bahin sa espirituwal nga Israel, magwarawara gayod ug mga palwa sa palma, tungod kay malipayon ug mapasalamaton nilang gipasidungog ang kadaogan ug kaluwasan ngadto sa Diyos ug sa Kordero, sama sa giingon dinhi ni Juan: “Ug sa makusog nga tingog sila nanagsinggit, nga nag-ingon: ‘Ang kaluwasan utang namo sa atong Diyos, nga naglingkod sa trono, ug sa Kordero.’” (Pinadayag 7:10) Bisan tuod gilain na sila gikan sa nagkalainlaing etnikong mga grupo sa mga tawo, ang dakong panon nanagsinggit nga may usa lamang ka “makusog nga tingog.” Sa unsang paagi mahimo nila kini bisan pag nagkalainlain ang ilang mga nasod ug pinulongan?
10. Sa unsang paagi ang dakong panon nagkahiusa sa pagsinggit sa usa ka “makusog nga tingog” bisan pag nagkalainlain ang ilang mga nasod ug pinulongan?
10 Kining dakong panon maoy bahin sa usa ka organisasyon nga mao lamang ang nagkahiusa sa yuta karon nga gikan sa nagkalainlaing mga nasod. Wala silay lainlaing mga sukdanan alang sa nagkalainlaing mga nasod kondili giaplikar nilang tanan ang matarong nga mga prinsipyo sa Bibliya bisan asa pa sila nagpuyo. Sila wala mag-apil-apil sa nasyonalistikanhon ug rebolusyonaryo nga mga kalihokan kondili ‘nagsalsal gayod sa ilang mga espada nga mga punta sa daro.’ (Isaias 2:4) Sila wala mabahinbahin ingong mga sekta o mga denominasyon, nga nanagsinggit ug makalibog o nagkasumpaki nga mga mensahe sama sa mga relihiyon sa Kakristiyanohan; ni ilang gisalig ang ilang buluhaton sa pagdayeg ngadto sa nagpabayad nga mga klero. Sila wala mosinggit nga ang ilang kaluwasan utang nila sa balaang espiritu, tungod kay sila dili mga alagad sa usa ka trinidad nga diyos. Diha sa mga 200 ka kayutaan, sila nagkahiusa sa pagtawag sa ngalan ni Jehova samtang sila nagsulti sa usa ka putli nga pinulongan sa kamatuoran. (Sofonias 3:9) Sa kahaom, ilang dayag nga giila nga ang ilang kaluwasan naggikan kang Jehova, ang Diyos sa kaluwasan, pinaagi ni Jesu-Kristo, ang Iyang Pangulong Ahente sa kaluwasan.—Salmo 3:8; Hebreohanon 2:10.
11. Sa unsang paagi ang modernong teknolohiya nakatabang sa dakong panon sa pagpakusog pa sa ilang tingog?
11 Nakatabang ang modernong teknolohiya sa pagpakusog pa sa tingog sa nagkahiusang dakong panon. Walay laing relihiyosong grupo sa yuta ang nagtinguha nga magpatik ug mga tabang sa pagtuon sa Bibliya diha sa kapin sa 400 ka pinulongan, tungod kay walay laing grupo ang interesado sa pag-abot sa tanang katawhan sa yuta pinaagi sa usa ka hiniusang mensahe. Ingong dugang tabang sa pagpatik, giimbento ang Multilanguage Electronic Phototypesetting System (MEPS) ubos sa pagdumala sa dinihogang Nagamandong Lawas sa mga Saksi ni Jehova. Sa pagpatik niining libroha, ang nagkalainlaing matang sa MEPS gigamit diha sa kapin sa 125 ka dapit sa tibuok yuta, ug kini nakatabang aron ang magasing Ang Bantayanang Torre nga kaduha mogula sa usa ka bulan dungan nga mapatik diha sa kapin sa 130 ka pinulongan. Ang katawhan ni Jehova dungan usab nga nagpatik ug mga libro, sama niini, diha sa daghang pinulongan. Busa, ang mga Saksi ni Jehova, nga ang kadaghanan kanila maoy bahin sa dakong panon, nagapanagtag ug ginatos ka milyong mga publikasyon matag tuig diha sa tanang iladong mga pinulongan, aron daghan pang panon gikan sa tanang tribo ug pinulongan ang makatuon sa Pulong sa Diyos ug magdugang sa ilang mga tingog sa makusog nga tingog sa dakong panon.—Isaias 42:10, 12.
Sa Langit o sa Yuta?
12, 13. Sa unsang paagi ang dakong panon “nagbarog atubangan sa trono ug atubangan sa Kordero”?
12 Giunsa nato pagkahibalo nga ang ‘pagbarog atubangan sa trono’ wala magkahulogan nga ang dakong panon atua sa langit? Daghan kita ug tin-awng pamatuod niini. Pananglitan, ang Gregong pulong nga gihubad ug “atubangan sa” (e·noʹpi·on) literal nga nagkahulogang “sa panan-aw [ni]” ug daghang higayong gigamit sa pagtumong sa mga tawo sa yuta nga anaa sa “atubangan” o “sa panan-aw ni” Jehova. (1 Timoteo 5:21; 2 Timoteo 2:14; Roma 14:22; Galacia 1:20) Usa ka higayon niana sa dihang ang mga Israelinhon didto pa sa kamingawan, si Moises miingon kang Aaron: “Sultihi ang tibuok katigoman sa mga anak sa Israel, ‘Duol kamo sa atubangan ni Jehova, tungod kay siya nakadungog sa inyong mga pagbagulbol.’” (Exodo 16:9) Ang mga Israelinhon dili kinahanglang dad-on sa langit aron mobarog sa atubangan ni Jehova niadtong tungora. (Itandi ang Levitico 24:8.) Hinunoa, didto mismo sa kamingawan sila nagbarog nga makita ni Jehova, ug ang iyang pagtagad anaa kanila.
13 Dugang pa, atong mabasa: “Inig-abot sa Anak sa tawo diha sa iyang himaya . . . ang tanang kanasoran pagatigomon sa iyang atubangan.” Dili mahimong atua sa langit ang tanang tawo sa dihang matuman na kining tagnaa. Siyempre, dili mahimong atua sa langit kadtong makaagom ug “walay kataposang kalaglagan.” (Mateo 25:31-33, 41, 46) Hinunoa, ang katawhan mobarog sa yuta nga makita ni Jesus, ug iyang iliso ang iyang pagtagad sa paghukom kanila. Sa samang paagi, ang dakong panon anaa sa “atubangan sa trono ug atubangan sa Kordero” sa pagkaagi nga sila nagbarog nga makita ni Jehova ug sa iyang Hari, si Kristo Jesus, nga maoy mohatag kanila ug paborableng paghukom.
14. (a) Kinsa ang gihubit nga anaa ‘palibot sa trono’ ug “diha sa [langitnong] Bukid sa Zion”? (b) Bisan tuod ang dakong panon nag-alagad sa Diyos “diha sa iyang templo,” nganong wala kini magpasabot nga sila saserdotehanon nga matang?
14 Ang 24 ka ansiyano ug ang dinihogang grupo sa 144,000 gihubit nga anaa ‘palibot sa trono’ ni Jehova ug “diha sa [langitnong] Bukid sa Zion.” (Pinadayag 4:4; 14:1) Ang dakong panon dili saserdotehanon nga matang ug dili nila mabatonan kanang binayaw nga posisyon. Tinuod, sila gihubit sa ulahi sa Pinadayag 7:15 ingong nag-alagad sa Diyos “diha sa iyang templo.” Apan kining temploha wala magtumong sa kinasulorang sangtuwaryo, ang Labing Balaan. Hinunoa, kini ang yutan-ong sawang sa espirituwal nga templo sa Diyos. Ang Gregong pulong nga na·osʹ, nga gihubad ug “templo” dinhi, kasagarang nagtumong sa enterong tinukod nga gipatindog alang sa pagsimba kang Jehova. Karon, usa kini ka espirituwal nga kahikayan nga naglakip sa langit ug sa yuta.—Itandi ang Mateo 26:61; 27:5, 39, 40; Marcos 15:29, 30; Juan 2:19-21, potnot sa New World Translation Reference Bible.
Tibuok Uniberso nga Pagsinggit sa Pagdayeg
15, 16. (a) Unsay reaksiyon didto sa langit sa dihang mitungha ang dakong panon? (b) Unsay reaksiyon sa espirituhanong mga linalang ni Jehova sa matag bag-ong pagpadayag sa iyang katuyoan? (c) Sa unsang paagi kita makaduyog sa pag-awit sa pagdayeg dinhi sa yuta?
15 Ang dakong panon nanagdayeg kang Jehova, apan ang uban usab nanag-awit ug mga pagdayeg kaniya. Si Juan nagtaho: “Ug ang tanang manulonda nagbarog libot sa trono ug sa mga ansiyano ug sa upat ka buhing linalang, ug mihapa sila sa atubangan sa trono ug misimba sa Diyos, nga nag-ingon: ‘Amen! Ang pagdayeg ug ang himaya ug ang kaalam ug ang pagpasalamat ug ang dungog ug ang gahom ug ang kusog maiya unta sa atong Diyos hangtod sa kahangtoran. Amen.’”—Pinadayag 7:11, 12.
16 Sa dihang gilalang ni Jehova ang yuta, ang tanan niyang balaang mga manulonda “nagdungan paghugyaw sa kalipay, ug ang tanang anak sa Diyos misinggit sa pagdayeg.” (Job 38:7) Ang matag bag-ong pagpadayag sa katuyoan ni Jehova lagmit nakaaghat sa mga manulonda ug susamang mga pagsinggit sa pagdayeg. Kon ang 24 ka ansiyano—ang 144,000 diha sa ilang langitnong himaya—mosinggit sa makusog agig pag-ila sa Kordero, ang tanang uban pang langitnong mga linalang sa Diyos moduyog sa pagdayeg kang Jesus ug kang Jehova nga Diyos. (Pinadayag 5:9-14) Ang maong mga linalang nalipay gayod tungod kay ilang nakita ang katumanan sa katuyoan ni Jehova sa pagbanhaw sa matinumanong dinihogan nga mga tawo ngadto sa usa ka mahimayaong kahimtang sa espirituhanong dapit. Ug karon, ang tanang matinumanon nga langitnong mga linalang ni Jehova kusog nga nanag-awit ug pagdayeg sa dihang mitungha ang dakong panon. Sa pagkatinuod, makapahinam alang sa tanang alagad ni Jehova ang pagkinabuhi sa adlaw sa Ginoo. (Pinadayag 1:10) Pagkadako sa atong pribilehiyo dinhi sa yuta nga makapakigbahin sa awit sa pagdayeg pinaagi sa pagsangyaw sa Gingharian ni Jehova!
Mitungha ang Dakong Panon
17. (a) Unsang pangutana ang gisukna sa usa sa 24 ka ansiyano, ug unsay gipasabot sa kamatuoran nga ang ansiyano makahimo sa pagkaplag sa tubag? (b) Kanus-a gitubag ang pangutana sa ansiyano?
17 Sukad sa panahon ni apostol Juan ug hangtod sa unang bahin sa adlaw sa Ginoo, ang dinihogang mga Kristohanon nalibog kon kinsa ang dakong panon. Busa, haom nga ang usa sa 24 ka ansiyano, nga naghawas sa mga dinihogan nga atua na sa langit, magpukaw sa panghunahuna ni Juan pinaagi sa pagsukna ug usa ka hinungdanong pangutana. “Ug agig sanong usa sa mga ansiyano miingon kanako: ‘Kining nagsul-ob ug maputing tag-as nga mga besti, kinsa man kini sila ug diin man sila gikan?’ Busa ako miingon dayon kaniya: ‘Akong ginoo, ikaw ang nahibalo.’” (Pinadayag 7:13, 14a) Oo, kini nga ansiyano makahimo sa pagkaplag sa tubag ug maghatag niini ngadto kang Juan. Kini nagpasabot nga ang mga binanhaw sa grupo sa 24 ka ansiyano mahimong may bahin sa pagpasa sa langitnong mga kamatuoran karon. Sa bahin sa Juan nga matang sa yuta, ilang matukib kon kinsa ang dakong panon pinaagi sa pagpaniid pag-ayo sa ginahimo ni Jehova sa ilang taliwala. Nasabtan dayon nila ang pagpangidlap sa langitnong kahayag nga midan-ag sa teokratikanhong kahikayan niadtong 1935, sibo sa panahon ni Jehova.
18, 19. (a) Unsang paglaom ang gipasiugda sa Juan nga matang sa katuigan sa 1920 ug 1930, apan kinsa ang nagkaanam ka daghan nga midawat sa mensahe? (b) Mahitungod sa 144,00, timaan sa unsa ang pagpaila sa dakong panon niadtong 1935? (c) Unsay gipakita sa mga estadistika sa Memoryal?
18 Sulod sa katuigan sa 1920 ug sa unang bahin sa katuigan sa 1930, gipasiugda sa Juan nga matang ang langitnong paglaom diha sa mga publikasyon ug diha sa pagsangyaw. Dayag nga wala pa makompleto ang bug-os nga gidaghanon sa 144,000 niadtong tungora. Apan nagkaanam ka daghan niadtong nagpatalinghog sa mensahe ug nagmasiboton sa pagsangyaw ang nagpahayag ug interes nga mabuhi sa walay kataposan sa Paraisong yuta. Sila wala magtinguhang moadto sa langit. Dili kana ang ilang paglaom. Sila dili bahin sa gamayng panon kondili sa ubang mga karnero. (Lucas 12:32; Juan 10:16) Ang pagpaila kanila niadtong 1935 ingong dakong panon sa ubang mga karnero nagtimaan nga halos kompleto na niadto ang pagpili sa 144,000.
19 Gisuportahan ba sa mga estadistika kining konklusyona? Oo. Niadtong 1938, sa tibuok kalibotan, 59,047 ka Saksi ni Jehova ang nakigbahin sa ministeryo. Niini, 36,732 ang nakig-ambit sa mga emblema sa tinuig nga pagsaulog sa Memoryal sa kamatayon ni Jesus, nga nagpasabot nga sila adunay langitnong paglaom. Sa misunod nga katuigan sukad niadto, anam-anam nga mikunhod ang gidaghanon sa mga nakig-ambit, ilabina tungod kay natapos na sa matinumanong mga Saksi ni Jehova ang ilang yutan-ong kinabuhi diha sa kamatayon. Sa 2005, 8,524 lamang ang nakig-ambit sa mga emblema sa Memoryal—0.05 porsiyento lamang sa 16,390,116 nga mitambong sa maong tibuok-kalibotang pagsaulog.
20. (a) Panahon sa Gubat sa Kalibotan II, unsay gisulti ni J. F. Rutherford sa pribado mahitungod sa dakong panon? (b) Unsay pamatuod karon nga ang dakong panon maoy dako gayod nga panon?
20 Sa dihang gisangka ang ikaduhang gubat sa kalibotan, si Satanas naningkamot gayod sa pagpahunong sa pagtigom sa dakong panon. Ang buluhaton ni Jehova gidili sa daghang kanasoran. Nianang mangiob nga mga panahon, ug wala madugay una pa sa iyang kamatayon sa Enero 1942, si J. F. Rutherford nadunggan nga miingon: “Aw . . . morag ang dakong panon dili ra diay kaayo dako.” Apan tungod sa panalangin sa Diyos kabaliskaran ang nahitabo! Sa 1946, ang gidaghanon sa mga Saksi nga nag-alagad sa tibuok kalibotan misulbong ngadto sa 176,456—nga ang kadaghanan kanila sakop sa dakong panon. Sa 2005, adunay 6,390,022 ka Saksi nga matinumanong nag-alagad kang Jehova diha sa 235 ka nagkalainlaing kayutaan—usa gayod ka DAKONG PANON! Ug sila nagkadaghan pa.
21. (a) Sa unsang paagi ang pagpanigom sa katawhan sa Diyos panahon sa adlaw sa Ginoo bug-os nga nahiuyon sa panan-awon ni Juan? (b) Sa unsang paagi natuman ang pipila ka hinungdanong mga tagna?
21 Busa ang pagpanigom sa katawhan sa Diyos panahon sa adlaw sa Ginoo bug-os nga nahiuyon sa panan-awon ni Juan: una ang pagpanigom sa mga nahibilin sa 144,000; dayon ang pagpanigom sa dakong panon. Sama sa gitagna ni Isaias, niining “kaulahiang bahin sa mga adlaw,” ang katawhan sa tanang kanasoran nagaganayan aron sa pagpakigbahin sa putli nga pagsimba kang Jehova. Ug tuod man, nalipay gayod kita agig apresasyon sa paglalang ni Jehova sa “bag-ong mga langit ug usa ka bag-ong yuta.” (Isaias 2:2-4; 65:17, 18) Ginatigom sa Diyos “ang tanang butang diha kang Kristo, ang mga butang sa mga langit ug ang mga butang sa yuta.” (Efeso 1:10) Ang dinihogang mga manununod sa langitnong Gingharian—nga gipili sulod sa kasiglohan sukad sa adlaw ni Jesus—mao “ang mga butang sa mga langit.” Ug karon, mitungha ang dakong panon sa ubang mga karnero ingong unang bahin sa “mga butang sa yuta.” Ang imong pag-alagad uyon nianang kahikayana magkahulogan ug dumalayong kalipay alang kanimo.
Ang mga Panalangin Alang sa Dakong Panon
22. Unsang dugang impormasyon ang nadawat ni Juan mahitungod sa dakong panon?
22 Pinaagi sa langitnong alagianan sa komunikasyon, si Juan nakadawat ug dugang impormasyon mahitungod niining dakong panon: “Ug siya [ang ansiyano] miingon kanako: ‘Mao kini sila ang nakalabang sa dakong kasakitan, ug ilang gilabhan ang ilang tag-as nga mga besti ug gipaputi kini sa dugo sa Kordero. Tungod niini sila anaa sa atubangan sa trono sa Diyos; ug sila nagahatag kaniya ug sagradong pag-alagad adlaw ug gabii diha sa iyang templo; ug ang Usa nga naglingkod sa trono magabuklad sa iyang tolda sa ibabaw nila.’”—Pinadayag 7:14b, 15.
23. Unsa ang dakong kasakitan nga gikan niini ‘makalabang’ ang dakong panon?
23 Sa mas naunang okasyon, si Jesus miingon nga ang iyang presensiya diha sa himaya sa Gingharian mosangko sa “dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mateo 24:21, 22) Sa katumanan nianang tagnaa, buhian sa mga manulonda ang upat ka hangin sa yuta aron sa paglaglag sa sistema sa kalibotan ni Satanas. Ang unang malaglag mao ang Dakong Babilonya, ang tibuok-kalibotang imperyo sa bakak nga relihiyon. Unya, sa kinatayuktokan sa maong kasakitan, luwason ni Jesus ang nahibilin sa 144,000 nga ania pa sa yuta, uban sa dili-maihap nga dakong panon.—Pinadayag 7:1; 18:2.
24. Sa unsang paagi ang indibiduwal nga mga sakop sa dakong panon mahimong kuwalipikado alang sa kaluwasan?
24 Sa unsang paagi ang indibiduwal nga mga sakop sa dakong panon mahimong kuwalipikado alang sa kaluwasan? Ang ansiyano nag-ingon kang Juan nga ilang “gilabhan ang ilang tag-as nga mga besti ug gipaputi kini sa dugo sa Kordero.” Sa ato pa, sila nagpasundayag ug pagtuo kang Jesus ingong ilang Manunubos, nagpahinungod kang Jehova, nagpasimbolo sa ilang pahinungod pinaagi sa bawtismo sa tubig, ug ‘naghupot ug maayong tanlag’ pinaagi sa ilang matul-id nga panggawi. (1 Pedro 3:16, 21; Mateo 20:28) Sa ingon, sila hinlo ug matarong sa mga mata ni Jehova. Ug ilang giampingan ang ilang kaugalingon nga “dili mahugawan sa kalibotan.”—Santiago 1:27.
25. (a) Sa unsang paagi ang dakong panon nagahatag kang Jehova ug “sagradong pag-alagad adlaw ug gabii diha sa iyang templo”? (b) Sa unsang paagi si Jehova “magabuklad sa iyang tolda” ibabaw sa dakong panon?
25 Dugang pa, sila nahimong masibotong mga Saksi ni Jehova—nga “nagahatag kaniya ug sagradong pag-alagad adlaw ug gabii diha sa iyang templo.” Usa ka ba niining nagpahinungod na nga dakong panon? Kon mao, ikaw may pribilehiyo sa pag-alagad kang Jehova nga walay hunong diha sa yutan-ong sawang sa iyang dakong espirituwal nga templo. Karon, ubos sa pagdumala sa mga dinihogan, ang dakong panon maoy naghimo sa mas dakong bahin sa pagsangyaw. Bisan pa sa mga responsabilidad sa pagpanginabuhi, ginatos ka libo kanila ang nag-alagad sa bug-os-panahong ministeryo ingong mga payunir. Lakip ka man nianang grupoha o dili, ingong nagpahinungod na nga membro sa dakong panon, mahimo kang magmalipayon tungod kay pinaagi sa imong pagtuo ug mga buhat gipahayag ka nga matarong ingong higala sa Diyos ug giabiabi ingong dinapit sa iyang tolda. (Salmo 15:1-5; Santiago 2:21-26) Sa ingon, si Jehova “magabuklad sa iyang tolda” ibabaw niadtong nahigugma kaniya ug, isip maayong tagbalay, siya manalipod kanila.—Proverbio 18:10.
26. Unsa pang mga panalangin ang mapahimuslan sa dakong panon?
26 Ang ansiyano nagpadayon: “Sila dili na gutomon ni uhawon pa, ni ang adlaw magpaantos kanila ni ang bisan unsang makapagba nga kainit, tungod kay ang Kordero, nga anaa sa taliwala sa trono, magabantay kanila, ug magatultol kanila ngadto sa mga tuboran sa mga tubig sa kinabuhi. Ug ang Diyos magapahid sa tanang luha gikan sa ilang mga mata.” (Pinadayag 7:16, 17) Oo, si Jehova tinuod gayod nga maabiabihon! Apan unsa ang lalom nga kahulogan niining mga pulonga?
27. (a) Unsay gitagna ni Isaias nga susama sa gipamulong sa ansiyano? (b) Unsay nagpakita nga ang tagna ni Isaias natuman diha sa Kristohanong kongregasyon sa panahon ni Pablo?
27 Atong hisgotan ang usa ka tagna nga may susama niini nga mga pulong: “Mao kini ang giingon ni Jehova: ‘Sa usa ka panahon sa maayong kabubut-on ako mitubag kanimo, ug sa usa ka adlaw sa kaluwasan ako mitabang kanimo . . . Sila dili gutomon, ni sila uhawon, ni ang naglagiting nga kainit o ang adlaw mohampak kanila. Kay ang Usa nga adunay kaluoy kanila mag-agak kanila, ug sila tultolan niya ngadto sa daplin sa mga tubod sa tubig.’” (Isaias 49:8, 10; tan-awa usab ang Salmo 121:5, 6.) Si apostol Pablo nagkutlo ug usa ka bahin niining tagnaa ug nagpadapat niini ngadto sa “adlaw sa kaluwasan” nga nagsugod sa Pentekostes 33 K.P. Siya misulat: “Kay siya [si Jehova] nag-ingon: ‘Sa usa ka panahong dalawaton ikaw akong gidungog, ug sa usa ka adlaw sa kaluwasan ikaw akong gitabangan.’ Tan-awa! Karon mao na ang panahon nga ilabinang dalawaton. Tan-awa! Karon mao na ang adlaw sa kaluwasan.”—2 Corinto 6:2.
28, 29. (a) Sa unsang paagi ang mga pulong ni Isaias natuman sa unang siglo? (b) Sa unsang paagi ang mga pulong sa Pinadayag 7:16 natuman maylabot sa dakong panon? (c) Unsay mahitabo sa dihang matultolan na ang dakong panon ngadto sa “mga tuboran sa mga tubig sa kinabuhi”? (d) Nganong ang dakong panon mahimo unyang talagsaon taliwala sa katawhan?
28 Sa unsang paagi ang saad nga dili na gutomon ni uhawon ni mag-antos sa naglagiting nga kainit natuman niadtong panahona? Dayag nga may mga panahon nga ang mga Kristohanon sa unang siglo nag-antos sa literal nga kagutom ug kauhaw. (2 Corinto 11:23-27) Apan sa espirituwal nga paagi, sila nagpahimulos ug kadagaya. Sila dagaya nga gitagan-an, aron sila dili na gutomon o uhawon sa espirituwal nga mga butang. Dugang pa, wala mosilaob ang kasuko ni Jehova kanila sa dihang gilaglag niya ang Hudiyohanong sistema sa mga butang niadtong 70 K.P. Ang mga pulong sa Pinadayag 7:16 adunay susamang espirituwal nga katumanan alang sa dakong panon karon. Uban sa dinihogang mga Kristohanon, sila nagpahimulos ug dagayang espirituwal nga mga tagana.—Isaias 65:13; Nahum 1:6, 7.
29 Kon sakop ka nianang dakong panon, ang maayong kahimtang sa imong kasingkasing magtukmod kanimo sa ‘paghugyaw sa kalipay,’ bisag unsa pay imong giantos nga mga kalisdanan ug kapit-osan niining talitapos nang mga tuig sa sistema ni Satanas. (Isaias 65:14) Sa maong diwa, bisan karon, si Jehova makahimo sa ‘pagpahid sa tanang luha gikan sa imong mga mata.’ Ikaw dili na mameligrong mapagba sa naglagiting nga “adlaw” sa malaglagong paghukom sa Diyos, ug sa dihang buhian na ang upat ka hangin sa kalaglagan, ikaw mahimong makalingkawas sa “makapagba nga kainit” sa kasuko ni Jehova. Human niana nga kalaglagan, ang Kordero magatultol kanimo aron bug-os kang makapahimulos sa makapalagsik nga “mga tuboran sa mga tubig sa kinabuhi,” nga naghawas sa tanang tagana nga gihimo ni Jehova aron imong mabatonan ang kinabuhing walay kataposan. Ang imong pagtuo sa dugo sa Kordero dili makawang tungod kay anam-anam kang ibalik ngadto sa tawhanong kahingpitan. Ikaw nga sakop sa dakong panon mahimo unyang talagsaon taliwala sa ‘minilyong’ katawhan nga dili na kinahanglan pang mamatay! Sa kinabug-osang diwa, ang tanang luha mapahiran na gikan sa imong mga mata.—Pinadayag 21:4.
Pagseguro sa Pagkatinawag
30. Unsang maanindot nga talan-awon ang gipakita kanato sa panan-awon ni Juan, ug kinsay arang “makabarog”?
30 Pagkaanindot nga talan-awon ang gipakita kanato niining mga pulonga! Si Jehova mismo anaa sa iyang trono, ug ang tanan niyang mga alagad, langitnon ug yutan-on, nagkahiusa sa pagdayeg kaniya. Gipabilhan gayod sa iyang yutan-ong mga alagad kon unsa ka dakong pribilehiyo ang pagpakigbahin niining nagkakusog nga koro sa pagdayeg. Sa dili madugay, si Jehova ug si Kristo Jesus magpatuman na sa paghukom, ug ang singgit madunggan: “Ang dakong adlaw sa ilang kapungot nahiabot na, ug kinsay arang makabarog?” (Pinadayag 6:17) Ang tubag? Usa lamang ka gamayng bahin sa katawhan, lakip ang pipila sa natimbrehan nga 144,000 nga lagmit buhi pa sa yuta ug ang dakong panon sa ubang mga karnero ang “makabarog,” sa ato pa, maluwas uban kanila.—Jeremias 35:19; 1 Corinto 16:13.
31. Sa unsang paagi ang katumanan sa panan-awon ni Juan mag-apektar sa mga Kristohanon, sa dinihogan man o sa dakong panon?
31 Tungod niini, ang dinihogang mga Kristohanon sa Juan nga matang nanlimbasog gayod sa ‘pagpangagpas sa tumong alang sa ganti sa pagkatinawag sa Diyos ngadto sa itaas pinaagi ni Kristo Jesus.’ (Filipos 3:14) Nahibalo gayod sila nga gikinahanglan nila ang talagsaong pagkamalahutayon tungod sa mga nagakahitabo niining mga adlawa. (Pinadayag 13:10) Human sa ilang maunongong pag-alagad kang Jehova sulod sa daghang katuigan, sila lig-ong naghupot sa ilang pagtuo, nagmaya nga ang ilang mga ngalan “nahisulat na sa mga langit.” (Lucas 10:20; Pinadayag 3:5) Kadtong sakop sa dakong panon nahibalo usab nga “siya [lamang] nga nakalahutay hangtod sa kataposan mao ang maluwas.” (Mateo 24:13) Bisan tuod segurado nang makalabang-buhi sa dakong kasakitan ang dakong panon ingong usa ka grupo, ang tagsatagsa ka membro niini kinahanglang manlimbasog gayod sa pagpabiling hinlo ug aktibo.
32. Unsang dinaliang situwasyon ang gipasiugda sa kamatuoran nga duha lang ka grupo ang “makabarog” sa adlaw sa kasuko ni Jehova?
32 Walay pamatuod nga gawas niining duha ka grupo aduna pay laing “makabarog” sa adlaw sa kasuko ni Jehova. Unsay kahulogan niini alang sa minilyon nga matag tuig nagpakita ug pagtahod sa halad ni Jesus pinaagi sa pagtambong sa Memoryal sa iyang kamatayon apan wala pa makapasundayag ug pagtuo sa halad ni Jesus hangtod sa punto nga mahimong dedikado, bawtismado nga mga alagad ni Jehova, nga aktibo sa pag-alagad kaniya? Dugang pa, komosta man kadtong aktibo kanhi apan nagtugot sa ilang mga kasingkasing nga “mabug-atan . . . sa mga kabalaka sa kinabuhi”? Hinaot nga mahigmata silang tanan ug magpabiling magtukaw, aron molampos “sa pag-ikyas niining tanang butanga nga gitakdang mahitabo, ug sa pagbarog atubangan sa Anak sa tawo”—si Jesu-Kristo. Mubo na lang ang panahon!—Lucas 21:34-36.
[Mga footnote]
a Tan-awa ang potnot sa New World Translation Reference Bible.
b The Watch Tower, Abril 1, 1918, panid 98.
[Mga Pangutana sa Pagtuon]
[Kahon sa panid 119]
Ang mga Paghubad Iya sa Diyos
Sulod sa daghang katuigan ang Juan nga matang nagapangusisa kon kinsa gayod ang dakong panon apan wala sila makakaplag ug makapatagbawng katin-awan. Ngano? Atong makita ang tubag diha sa mga pulong sa matinumanong si Jose, sa dihang siya miingon: “Dili ba ang mga paghubad iya man sa Diyos?” (Genesis 40:8) Kanus-a ug sa unsang paagi ipatin-aw sa Diyos ang katumanan sa iyang mga tagna? Kasagaran, ipatin-aw kini sa dihang gitakda na kining matuman o nagakatuman na aron ang mensahe niini klaro nga masabtan sa iyang nagapangusisa nga mga alagad. Kini nga pagsabot gihatag “sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.”—Roma 15:4.
[Kahon sa panid 124]
Ang mga membro sa dakong panon
▪ nagagikan sa tanang kanasoran ug mga tribo ug katawhan ug mga pinulongan
▪ nagbarog atubangan sa trono ni Jehova
▪ naglaba sa ilang tag-as nga mga besti nga gipaputi sa dugo sa Kordero
▪ nagpahinungod sa kaluwasan ngadto kang Jehova ug kang Jesus
▪ makalabang sa dakong kasakitan
▪ nag-alagad kang Jehova diha sa iyang templo sa adlaw ug gabii
▪ nakadawat sa mahigugmaong panalipod ug pag-atiman ni Jehova
▪ gitultolan ni Jesus ngadto sa mga tuboran sa mga tubig sa kinabuhi
[Tibuok panid nga hulagway sa panid 121]
[Hulagway sa panid 127]
Ang kaluwasan sa dakong panon utang nila sa Diyos ug sa Kordero
[Hulagway sa panid 128]
Ang Kordero magatultol sa dakong panon ngadto sa mga tuboran sa mga tubig sa kinabuhi
