Pene 1

No te aha e taio ai i te Bibilia?

Te farerei nei te ao nei e rave rahi mau ati, mea varavara roa râ hoi te mau ravea no te arai i te reira. E rave rahi mau mirioni taata teie e ora nei ma te pohe i te poia; area vetahi ra, te rahi noa ˈtura hoi, teie e riro nei ei tîtî na te raau taero. Te rahi noa ˈtura te mau utuafare amahamaha, a paraparau-rahi-noa-hia ˈi i te parau no te mau taatiraa i te pae tino i rotopu i te mau fetii iho e te haavîraa uˈana “e rave-moe-hia nei”. Te haapue noa nei te mau mea taero i roto i te mataˈi ta tatou e hutihuti nei e i roto i te pape ta tatou e inu nei. Ma te ore e haamoe i te parau no te ohipa taparahi taata, teie e haapohe rahi noa ˈtura i te taata. Eaha to outou manaˈo? Ia manaˈo outou, e titiaifaro anei taua mau fifi ra aore ra te tahi atu â, ia tae i te hoê mahana?

1. (A faaô mai te parau omuaraa.) No teihea mau fifi te huitaata nei e hinaaro ai i te hoê aratairaa?

 E ERE te reira anaˈe. Ua riro atoa to tatou nei anotau ei anotau no te tahi mau manaˈo patoi. Ei hiˈoraa, e rave rahi mau taata teie e patoi uˈana nei i te ohipa haamaruaraa tamarii oia hoi, ia au i to ratou manaˈo, e tuea noa i te ohipa taparahi taata. I te tahi aˈe pae, te tiaturihia ra ïa e e tiamâraa to te mau vahine i nia i to ratou iho tino, e tei ia ratou iho hoi te faaotiraa hopea. E rave rahi teie e manaˈo nei e e mau peu faufau mau te mau peu mai te ohipa mahu, te ohipa faaturi aore ra te mau taairaa i te pae tino na mua ˈˈe i te faaipoiporaa. Area vetahi pae ra, te manaˈo ra ïa e tei te taata tataitahi iho te opuaraa eaha ta ˈna e hinaaro. O vai râ hoi te nehenehe e parau e o vai tei tano e o vai tei hape?

2, 3. Eaha te huru hiˈoraa o te mau taata e rave rahi i te Bibilia i teie mahana?

² Te pûpû maira te Bibilia i te hoê aratairaa morare e te faataa atoa maira e nafea te ohipa taparahi taata, te oˈe aore ra te haaviiviiraa ia ore roa. Teie râ hoi: mea iti roa te  taata teie e manaˈo nei e e mana to ˈna i nia i te tahi mau tumu parau mai teie te huru. Inaha hoi i mutaa ihora, e buka faatura-roa-hia te Bibilia, i te pae tooa o te râ ma iho â râ, e noa ˈtu â ïa e na te taata i papai ia ˈna, e faariro na te amuiraa faaroo kerisetiano i roto i to ˈna taatoaraa i te reira ei Parau na te Atua, ei buka faauruahia mai e te Atua iho.

³ I teie nei râ mahana, e peu matauhia te manaˈo feaa. E peu matau-roa-hia ia feaa i nia i te mau mea atoa: i nia i te mau peu, te mau manaˈo, te morare, e tae noa ˈtu i te parauraa e te vai mau ra anei te Atua. E te feaa taa ê nei te manaˈo i nia i te faufaaraa o te Bibilia. Mai te huru ra ïa e e rave rahi teie e faariro nei ia ˈna ei buka tahito, ei buka e haamoemoeâ, e mea iti roa te mau taata tuatapapa i te parau no te ite i teie nei tau i te faariro ia ˈna ei Parau na te Atua. E turu râ te rahiraa o te taata i te manaˈo i papaihia e te hoê taata tuatapapa i te Bibilia o James Barr te iˈoa, tei parau e: “Ia manaˈo vau, te faaineineraa no nia i te parau tutuu bibilia, e hotu ïa na te hoê ohipa taata nei. O te tuatapaparaa ïa no nia i te mau tiaturiraa o te taata​¹.”

4, 5. No te aha e mea faufaa mau â ia ite e mea faaurua-mau-hia anei te Bibilia e te Atua aore ra eita? Eaha ta te buka ta outou e tapea ra e titau ra?

⁴ O to outou atoa anei teie manaˈo? Ia manaˈo outou, e Parau anei te Bibilia na te Atua, aore ra na te taata? Noa  ˈtu e eaha ta outou pahonoraa, ia feruri na outou i teie nei manaˈo: mai te peu e te Bibilia e mau parau na te taata, aita ïa e ravea mau to te mau ati e faaruruhia nei e te huitaata nei. E tia noa ˈtura hoi ïa i te mau taata ia tamata i te tatara i to ratou iho fifi, a tiaturi noa ˈtu ai e eita ratou e taero i te mau mea pohe, eita atoa ratou e haamou ia ratou iho i roto i te hoê ati atomi. Mai te peu râ e Parau na te Atua te Bibilia, o ˈna mau ïa te aratai e hinaarohia nei e tatou no te faaruru ma te ati ore i teie anotau fifi to tatou nei.

⁵ Te hinaaro ra te buka ta outou e tapea ra e faaite atu ia outou e e Parau na te Atua iho â te Bibilia. Te tiaturi nei te feia i nenei i teie buka e ia oti outou i te taio, e ite mau ïa outou e te pûpû mai nei te Bibilia i te mau ravea mau hoê roa ra no te arai i te mau ati o te huitaata nei. Hou râ e tapae roa ˈtu ai i reira, te hinaaro nei matou i teie nei e faaite atu ia outou i te tahi mau ohipa i tupu e o te faariro hoi i te Bibilia ei buka te tia mau â ia outou ia tuatapapa.

Te hoê neneiraa aita e faaauraa

6, 7. No nia i te Bibilia, eaha te tahi mau ohipa faahiahia mau i tupu te tia mau â ia tuatapapahia?

⁶ Ia parau na tatou na mua roa ˈˈe e e itehia te taa-ê-raa o te Bibilia na roto i te hoê neneiraa taa ê mau: o ˈna hoi te buka parare rahi roa ˈˈe o te mau tau atoa. Ia au i te buka ra Le livre Guinness des records 1988, mai te mea ra ïa e ua neneihia te tahi tau 2,5 miria bibilia mai te matahiti 1815 mai e tae mai i te matahiti 1975. Tera te hoê neneiraa eita e nehenehe e faaau ta te tahi noa ˈˈe buka i ore aˈenei i haafatata.

⁷ Hau atu, o te Bibilia te buka tatara-rahi-roa ˈˈe-hia na roto i te tahi atu mau reo ia faaauhia i te tahi noa ˈˈe buka, e inaha, e nehenehe atu ai tatou e taio ia ˈna i teie mahana, i roto i to ˈna taatoaraa aore ra i te tahi noa tuhaa, na roto hau atu i te 1 800 reo. Ia au i te Taiete bibilia marite, e 98 % o te huiraatira o te fenua nei te nehenehe e taio i te Bibilia i teie nei. A feruri na maa taime iti i te mau tutavaraa i ravehia no taua ohipa rahi tatararaa na roto i te tahi atu  mau reo ra! Inaha, a faaite mai na, eaha anaˈe atu â te buka mai teie te huru?

E mana rahi

8, 9. Eaha vetahi mau manaˈo e faaite maira i te mana i faaohipahia e te Bibilia?

⁸ Te parau ra te Buka parau paari beretane apî no nia i te Bibilia e o ˈna “te haapueraa buka tei papu maitai i te faaohipa i te mana rahi roa ˈˈe i nia i te aamu taata nei​²”. Teie ta Heinrich Heine, rohipehe helemani no te senekele XIX, i parau: “Te tumu i itea mai ai ia ˈu i te tahi mau manaˈo, o te hoê ïa buka (...), maoti hoi te Bibilia. Mea tano mau â ia parauhia oia e te mau Papairaa Moˈa. Mai te peu e aita to te taata e Atua faahou, e nehenehe teie buka e horoa mai na ˈna i te ravea e itea ˈtu ai ia ˈna i te Atua​³.” I taua noa iho senekele ra, teie ta te taata aro i te parau no te faatîtîraa, o William H. Seward, i parau: “Te mau tiaturiraa atoa o te huitaata nei, tei te mana rahi ïa e faaohipahia ra e te Bibilia​⁴.”

⁹ Ua faataa mai o Abraham Lincoln, te 16raa o te peretiteni o te mau Etats-Unis, i te Bibilia mai “te ǒ faufaa roa ˈˈe ta te Atua i ore aˈenei i horoa mai i te taata nei (...). Maoti oia, ta ˈna ïa e parau faahou ra, eita ta tatou e nehenehe e faataa i te maitai e te ino​⁵”. Mai teie te huru to te taata ra o Sir William Blackstone, te hoê taata haapao ture beretane, faataaraa mai i te mana no roto mai i te Bibilia: “I nia i teie na niu e piti, te ture o te natura e te ture o te faaiteraa [te Bibilia], e vai ai te mau ture taata atoa, oia hoi eita roa e tia ia tatou ia faatia i te hoê noa ˈˈe ture a te taata ia faahapa i taua mau ture nei​⁶.”

Herehia e vetahi, ririhia râ e te tahi pae

10. Mai te aha te huru te patoiraahia te Bibilia?

¹⁰ E tia râ ia tatou ia tapao mai e aita e buka i riro aˈenei ei tapao no te hoê patoiraa uˈana, riri-rahi-hia, i roto i te roaraa o te Tuatapaparaa. Mai te Vraa e tae atu i te XVraa o te senekele, ua tutuihia te tahi mau Bibilia i mua i te huiraatira, e ia taio noa ˈtu te hoê taata i te Bibilia e ia haapurara ê ia ˈna, e roohia ïa oia i te tahi mau faautuaraa  e te mau utua fare auri, e mai te reira noâ hoi i teie mahana, i teie senekele XX. I roto i te mau senekele i mairi, te feia e rave noa ˈtu i teie mau huru “ohipa iino”, e pinepine ïa ratou i te haamauiuihia e i te haapohehia.

11, 12. Mea nafea to Tyndale haapapuraa e mea here mau na ˈna i te Bibilia?

¹¹ I te tahi aˈe pae, ua here-rahi-hia te Bibilia. E rave rahi tei tamau â i te taio ia ˈna noa ˈtu te mau hamani-ino-raa uˈana mau. Te reira hoi tei farereihia e William Tyndale, te hoê taata Beretane no te senekele XVI, tei pee i te mau haapiiraa o te fare haapiiraa tuatoru no Oxford, hou aˈe oia e riro mai ai ei orometua faatura-rahi-hia i te fare haapiiraa tuatoru no Cambridge.

¹² Mea here mau na Tyndale i te Bibilia. I to ˈna râ tau, ua hinaaro te mau aratai haapaoraa e ia vai noa oia na roto i te reo latino, te hoê reo pohe. Ua opua aˈera hoi o Tyndale e tatara ia ˈna na roto i te reo beretane ia nehenehe atoa te mau taata o to ˈna fenua e taio i te Bibilia. I te mea hoi e aita taua ohipa ra i tia i te ture, ua tia aˈera ia Tyndale ia vaiiho i te hoê toroa maitai mau hoi i te fare haapiiraa tuatoru e ia horo ê atu i nia i te fenua rahi. Noa ˈtu e ua imi-haere-hia o ˈna, ua ora maoro maira oia no te tatara i te mau Papairaa Heleni (te “Faufaa Apî”) e te hoê tuhaa o te mau Papairaa Hebera (te “Faufaa Tahito”) na roto i to ˈna iho reo, i muri iho râ, ua tapeahia oia, ua faautuahia ei taata patoi i te haapaoraa katolika e ua uumihia to ˈna arapoa e tutui-roa-hia ˈtu ai to ˈna tino.

13. E nehenehe e parau e e buka otahi roa te Bibilia i roto i teihea tuhaa?

 ¹³ O Tyndale noa te tahi o te mau taata e rave rahi tei haapae i te mau mea atoa no te taio i te Bibilia aore ra no te rave e ia nehenehe to ratou mau taata-tupu e taio atoa. Aita e buka mai teie te huru i horoa aˈenei i te itoito i roto i te mau taata e te mau vahine e rave rahi. E faariro mau â te reira ia ˈna ei buka taa ê mau.

Te parau ra oia e e Parau oia na te Atua

14, 15. Eaha ta te mau taata papai bibilia i parau e rave rahi taime?

¹⁴ Te faataa ê atoa maira te Bibilia ia ˈna na roto i te faaiteraa a to ˈna mau taata papai e rave rahi. E mau arii, mau tiai mamoe, mau taata ravaai, mau taata toroa na te hau, mau tahuˈa, te hoê tenerara e te hoê taote, oia hoi te tahi tau 40 taata o tei papai i to ˈna mau buka. Teie râ, teie ta ratou manaˈo e horoa ra: te mau manaˈo ta ratou e papai na, e ere roa ˈtu ïa to ratou manaˈo, o te mau manaˈo râ o te Atua.

¹⁵ No reira tatou e farerei pinepine ai i roto i te Bibilia i te mau parau mai teie te huru: “Te parau nei te [v]arua o Iehova ia ˈu, e tei tau vaha nei ta ˈna parau”, aore ra: “Te na ô maira te Fatu ra, o Iehova sabatoa.” (Samuela 2, 23:2; Isaia 22:15). I roto i te hoê rata o ta ˈna i faatae atu i te hoê o to ˈna mau hoa poro evanelia mai ia ˈna, teie ta te aposetolo Paulo i papai: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata no te Atua i te mau ohipa maitatai atoa ra.” — Timoteo 2, 3:16, 17.

16. Te pahono ra te Bibilia i teihea mau uiraa?

¹⁶ I te mea hoi e te parau ra te Bibilia e e Parau oia na te Atua, eiaha râ na te taata, mea tano mau iho â ïa ia haamaramarama mai oia i te tahi mau tumu parau e o te Atua anaˈe te nehenehe e pahono mai. Ei hiˈoraa, te faataa maira oia no te aha te mau faatereraa taata e ore ai e nehenehe e haamau i te hoê hau e tia i te vairaa; te parau mai nei oia i te mau taata e nafea râ te oaoaraa mau e itea mai ai; te faaite maira hoi i te huru a muri aˈe o te fenua nei e o te  huitaata nei. Eita e ore teie mau tumu parau aore ra vetahi atu â mau tumu parau i te ô ê mai na i roto i to outou feruriraa. No te aha ïa e ore ai e manaˈo e e Parau mau iho â te Bibilia na te Atua e e nehenehe ta ˈna e pahono mai ia outou ma te maramarama maitai?

17, 18. a) Eaha te tahi mau manaˈo patoi i te Bibilia e tuatapapahia i roto i teie nei buka? b) Eaha ˈtu â te tahi mau tumu parau te tuatapapahia?

¹⁷ Te faaitoito atu nei matou ia outou ia tuatapapa maite i te mau parau e faaitehia ˈtu i roto i teie nei buka. E hiˈopoa te tahi mau pene i te tahi mau manaˈo e horoa-pinepine-hia nei no te patoi i te Bibilia. Te patoi ra anei oia i te ite aravihi? Te faahapa ra anei oia ia ˈna iho? Te mau parau o ta ˈna e faatia maira, ua haapapuhia anei e te aamu aore ra e mau aai? Ua tupu mau anei te mau semeio ta ˈna e faahiti ra i te parau? Te horoa maira hoi te Bibilia i te hoê pahonoraa tano e te maramarama maitai no nia i taua mau uiraa ra. E tuatapapa-atoa-hia i muri iho i te tahi mau parau taa maitai e haapapu mai e no ǒ mai te Bibilia i te Atua ra: ta ˈna mau parau tohu, to ˈna paari e riro i te haaputapû e ta ˈna mau faaohiparaa faahiahia mau no nia i te oraraa o te taata. I te pae hopea, e faahiti ïa tatou i te parau no te mana ta te Bibilia e nehenehe e faatupu i nia i to outou oraraa.

¹⁸ Mea nafea râ hoi te Bibilia i te taeraa mai ia tatou nei? O ta tatou ïa e tuatapapa i teie nei. Te faaite maira te aamu iho o teie nei buka faahiahia mau e e ere teie i te hoê noa buka i papaihia e te taata.

[Uiraa haapiiraa]

 [Hohoˈa api taatoa i te api 4]

[Hohoˈa i te api 6]

O te Bibilia te buka nenei-rahi-roa ˈˈe-hia e te tatara-rahi-roa ˈˈe-hia na roto i te tahi atu reo i roto i te roaraa o te Aamu.

[Hohoˈa i te api 9]

Mai ta teie hohoˈa i neneihia i nia e te raau o te senekele XV e faaite ra, e rave rahi mau taata tei tutui-oraora-noa-hia e ta ratou “utua” teie ïa, te taioraa ratou i te Bibilia.

[Hohoˈa i te api 11]

Ua parau hoi te feia i papai i te Bibilia e mea faauruahia mai ratou e te Atua.