Pene 14

Te Bibilia e o outou

Te faahapa nei te mau taata patoi i te Bibilia i te mea e aita roa ˈtu o ˈna e tuati ra e te ite aravihi, te faahapahapa ra oia ia ˈna iho aore ra e haapueraa buka aai noa. I te tahi aˈe pae, ua haapapu maira o Iesu e: “O to parau na [ta te Atua] te parau mau.” (Ioane 17:17). Te faatano ra te mau ohipa i tupu, i te manaˈo o Iesu e te patoi ra hoi i taua mau faahapahaparaa ra; te haapapu nei taua mau ohipa i tupu ra i te parau mau o te aamu o te Bibilia. Hau atu, te tuati-maite-raa faahiahia mau o tera tuhaa e tera tuhaa o te Bibilia, te tupuraa o ta ˈna mau parau tohu, te hohonu o to ˈna paari, ta ˈna faaohiparaa oaoa mau i nia i te mau taata, e mau haapapuraa anaˈe ïa e e Parau mau papaihia oia na te Atua. Ua tano maitai te aposetolo Paulo i te papairaa e: “Te mau parau moˈa atoa i papaihia ra e mea faaurua mai ïa e te Atua, e e mea maitai.” — Timoteo 2, 3:16.

1. (A faaô mai i te parau omuaraa.) a) Eaha ta te mau ohipa i tupu e haapapu maira no nia i te Bibilia? b) I te mea hoi e ua riro te Bibilia ei Parau faauruahia na te Atua, eaha ïa to ˈna faufaaraa?

 I TE mea hoi e e Parau te Bibilia na te Atua, eiaha râ na te taata, e ohipa faufaa roa ïa te reira. Te auraa ra, ua atuatu te Atua i te mau auraa e te taata, ua pahono mai oia i ta tatou mau uiraa e rave rahi e ua faaite mai i te ravea no te faatitiaifaro i te rahiraa o to tatou mau fifi. Te auraa atoa, te mau mea i faaitehia mai i roto i te Bibilia no nia i te oraraa a muri aˈe, e mau mea mau anaˈe ïa. Te faatere ra hoi te Basileia o te Atua e i te taime i haapaohia ra oia e tamâ roa ˈi i te fenua nei i te mau huru parau-tia ore atoa, i te haavîraa e i te mauiui.

2. Te iteraa outou e e Parau te Bibilia na te Atua, e faaitoito ïa te reira ia outou ia aha?

² Teie atura ïa te tahi uiraa: E nafea hoi outou i taua  mau parau ra? I to outou iteraa e e Parau te Bibilia na te Atua, eita e ore i te faaitoito ia outou ia tuatapapa i te reira. Ua horoa mai te papai salamo i te haapapuraa e te feia e rave i taua tuatapaparaa ra, e oaoa mau ïa ratou. Teie hoi ta ˈna i papai: “E ao to te taata, aore e faaau i to ˈna haerea i te aˈo a te paieti ore, (...) o tei hinaaro râ i te ture a Iehova; e tei ta ˈna ture to ˈna manaˈoraa i te rui e te ao.” — Salamo 1:1, 2.

A farii i te tauturu

3, 4. a) Mai ta te Bibilia iho e faaite maira, eaha te tia ia tatou ia rave, ia farerei tatou i te tahi mau irava bibilia ta tatou e ore e taa ra i te auraa? b) O vai ma te mau taata tei ineine noa i te tauturu i to ratou taata-tupu ia taa maitai aˈe i te auraa o te Bibilia?

³ Eita e ore e, ia outou i taio i te Bibilia, ua farerei outou i te tahi mau irava fifi roa ia taa i te auraa (Petero 2, 3:16). Te faaite maira te hoê parau no roto mai i te buka a te mau Ohipa e eiaha tatou e maere. I muri iti noa ˈˈe i te poheraa o Iesu, te taio ra te hoê taata Etiopia i te tahi mau parau tohu o te buka bibilia a Isaia. Ua haere maira te taata poro evanelia ra o Philipa e farerei ia ˈna e ua ani atura e: “Te ite na oe i ta oe e taio na?” I te mea e aita o ˈna e taa ra i te auraa o te parau ta ˈna e taio ra, ua ani atura te taata Etiopia ia Philipa e tauturu mai ia ˈna. — Ohipa 8:30, 31.

⁴ I te mau Etats-Unis, hoê â ohipa i farereihia e te hoê vahine. Te taio ra oia i te Bibilia ma te tuutuu ore, teie râ, o ˈna anaˈe, aita i noaa ia ˈna i te auraa o te tahi mau haapiiraa tumu o te Parau a te Atua. I to ˈna noa aparauraa ˈtu i te mau Ite no Iehova to ˈna ite-papu-raa i te mau parau mau bibilia tumu, oia hoi, mai te faufaaraa o te Basileia o te Atua e te mau haamaitairaa e rave rahi ta ˈna e hopoi mai no te huitaata nei. Ia ani atu outou ia ratou i te reira, e oaoa roa te mau Ite no Iehova i te tauturu mai ia outou ia taa maitai aˈe i te auraa o te mau parau ta outou e taio ra i roto i te Bibilia.

 A faaohipa i te mau aˈoraa o te Bibilia

5. Ia au i te Bibilia, nafea te oaoa e itea mai ai?

⁵ Te titauhia mai nei tatou eiaha noa ia taio i te Bibilia, ia faaohipa atoa râ i te mau parau ta tatou e taio (Salamo 119:2). Teia â te aˈoraa ta te Bibilia e horoa mai nei: “A tamata na ia ite i te maitai o Iehova! e ao to te taata i tiaturi ia ˈna ra.” (Salamo 34:8). Oia mau, te faaitoito maira oia ia tatou ia tamata i te Atua. A faaitoito i te faaohipa i te mau faaueraa tumu a te Atua i roto i to outou oraraa, ma te fariu tia ˈtu i nia ia ˈna e ite atu ai outou e eaha te mau mea faufaa roa ˈˈe no outou. I reira noa ïa outou e papu ai e aita ˈtu eˈa maitai aˈe. Te feia e na reira i te tiaturi i te Atua, e riro ïa ratou i te tamata i te oaoa mau.

6. Mea tano mau anei ia faaitoito i te faatura i te mau faaueraa tumu bibilia i to tatou nei mau mahana? A faataa mai.

⁶ I te tahi taime, e faaroohia na te taata ia parau e eita e nehenehe e faatura i te mau faaueraa tumu bibilia i teie mahana, i roto i te hoê ao haerea tia ore, taiata e te haavî. Inaha, te nehenehe nei hoi e rave rahi mau taata e na reira. O vai ïa mau taata? Ua amuimui atu te hoê taurearea no te pae Afirika i roto ia ratou. Teie ta ˈna i papai: “I te mau matahiti i mairi aˈenei, ua ite au i ǒ nei i Zimbabwe nei, e o outou te mau Ite no Iehova, teie e faaitoito mau nei i te pee i te hiˈoraa o te Mesia. (...) E tae roa mai i teie nei, o outou anaˈe te pǔpǔ tei manuïa e tei haapapu mai ia ˈu i te parau no te aroha o te Atua e no te mana o Ta ˈna Evanelia, na roto i to outou huru oraraa e eiaha noa na roto i te tahi mau oreroraa parau e mau buka. Outou, te poro nei outou i te Evanelia e te ora nei outou i taua Evanelia ra, a poro noa atoa ai e rave rahi, aita râ hoi e ora ra i taua Evanelia nei.”

A farii i to ˈna mana

7. A faaite mai na i te tahi mau peu i matauhia i te rave e aita roa ˈtu e tuati ra i te Bibilia.

⁷ Ua parau te aposetolo Paulo e “e mea maitai [te Bibilia] ei haapiiraa, ei aˈoraa, ei faaiteraa hapa”. (Timoteo 2, 3:16.) Te itehia ra râ i te tahi taime e aita te mau faaueraa bibilia e auhia ra e te taata. No reira, te faautua ra oia i te  peu mahu, o te hoê hoi huru oraraa teie e farii-rahi-hia nei (Roma 1:24-27; Korinetia 1, 6:9-11; Timoteo 1, 1:9-11). A rave-noa-hia ˈi te tahi tau 50 mirioni mau haamaruaraa tamarii i te mau matahiti atoa i roto i te ao nei, te faaite maira te Bibilia i te tamarii e fanauhia, mai te hoê ora faufaa roa eita e tia ia opuahia e faaore (Exodo 21:22, 23; Salamo 36:9; 139:14-16; Ieremia 1:5). E nafea râ ïa tatou mai te peu e mea fifi roa na tatou ia farii i te tiaraa o te Bibilia no nia i te tahi mau tumu parau mai teie te huru?

8, 9. Mai te peu e, i to outou hiˈoraa matamua, mea fifi roa ia farii i te hoê aˈoraa bibilia, eiaha ïa ia moehia ia outou i te aha, e ta vai mau faaueraa ta tatou e farii i te mau taime atoa?

⁸ Ua haapii te mau kerisetiano e te eˈa o te paari, te haapaoraa ïa i te Parau a te Atua i te mau taime atoa. No te aha? No te mea, ia faaohipa tatou i ta ˈna mau aˈoraa, e mau faahopearaa maitai roa ˈˈe iho â ïa ta tatou paatoa e ite atu a muri aˈe (Maseli 2:1-11). E tia râ ia tatou ia farii e e otia to te paari o te taata. Mea varavara roa ratou i te ite na mua ˈˈe i te mau faahopearaa atoa o ta ratou ohipa e rave. Teie ta te peropheta o Ieremia i parau: “Ua ite hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” — Ieremia 10:23.

⁹ E papu maitai ia tatou i te reira ia hiˈo tatou i te mau ohipa e tupu ra na te hiti ia tatou. Te rahiraa o te mau ati e farereihia ra e te ao nei, o te faahopearaa ïa no te oreraa te taata e haapao i te mau aˈoraa a te Parau a te Atua. I roto i te roaraa o te mau senekele, ua faaite mai te aamu arepurepu o te huitaata nei e eita ta te taata e nehenehe e rave i te mau opuaraa maitai i te pae no te huru morare. Ua hau ê roa ˈˈe te Atua i te paari ia tatou nei. No te aha ïa tatou e ore ai e faaroo ia ˈna, maoti i te tiaturi i to tatou iho paari? — Maseli 28:26; Ieremia 17:9.

 Aita e taata hapa ore

10, 11. a) Eaha te mau fifi o te naturaraa taata nei e o te ao nei ta tatou e farerei nei ia tutava tatou i te haapao i te mau faaueraa tumu a te Bibilia? b) Eaha te mau huru amuimuiraa ta te Bibilia e faaitoito maira ia tatou e imi, e i hea roa tatou e nehenehe ai e ite i taua mau huru taata ra?

¹⁰ Te faaite maira te Bibilia i te tahi atu â tuhaa ta tatou e hinaaro ra e ia tauturuhia mai tatou. E feia hara anaˈe hoi tatou. “Ino noâ te manaˈo o to te taata aau mai to ˈna tamariiriiraa mai â.” (Genese 8:21; Roma 7:21). Te papu maitai ra tatou i taua huru hape nei no te mea te ora nei tatou i roto i te hoê ao e ore roa ˈtu e haapao i te mau faaueraa tumu bibilia. Mea hinaaro atura ïa na tatou i te tauturu i te pae no te taaraa i te auraa o te Bibilia e i te pae atoa no te faaohiparaa i te mau mea ta tatou e haapii ra i roto. No reira te Bibilia e faaitoito mai ai ia tatou e amuimui atu i roto i te feia e hinaaro ra e ora ia au maite i te mau faaueraa a te Atua. Teie ta te papai salamo i papai: “E mea ino na ˈu ia parahi i ǒ te feia parau ino; e ore hoi au e parahi i roto i te feia paieti ore. (...) e haamaitai â vau ia Iehova i roto i te mau amuiraa ra.” E taio atoa tatou i roto i te tahi atu salamo e: “Inaha hoi, te maitai e te popou, ia parahi atoa te mau taeae ma te au maite!” — Salamo 26:5, 12; 133:1.

¹¹ Ua riro te mau haaputuputuraa ei tuhaa faufaa roa no te haamoriraa a te mau Ite no Iehova. E rave rahi mau putuputuraa ta te mau Ite i te mau hebedoma atoa e te faanaho nei ratou i te tahi mau tairururaa i reira ratou e tuatapapa amui ai i te Bibilia e e hiˈopoa ˈi nafea râ ratou ia faaohipa i ta ˈna mau faaueraa tumu. Ua riro ratou ei ‘hui taeae’ i reira te taata tataitahi e faaitoitohia ˈi e e tauturuhia ˈi ia haapao i te mau faaueraa teitei mau a te Bibilia (Petero 1, 2:17). No te aha outou e ore ai e amui atu i roto i te hoê o ta ratou  mau putuputuraa ia nehenehe outou e ite e nafea râ taua amuimuiraa ra e nehenehe ai e tauturu atoa mai ia outou? — Hebera 10:24, 25.

A faaau i to outou oraraa i nia i te Parau a te Atua

12. Te iteraa tatou e e Parau te Bibilia na te Atua, eaha ïa te mau haamaitairaa e noaa mai ia tatou?

¹² Te iteraa outou e e Parau te Bibilia na te Atua, e mau haamaitairaa iho â ïa to muri mai e e mau hopoia. Oia mau, te fanaˈo nei tatou, no te aratai ia tatou i roto i to tatou oraraa o te mau mahana atoa, i te hoê aratairaa ta tatou e ore roa ˈtu e ite i te tahi noa ˈˈe vahi. Te ite atoa ra tatou i te aroha ta te Atua i faaite mai na roto i te pûpûraa mai i ta ˈna iho Tamaiti ei hoo ia tatou e no te horoa mai i te tiaturiraa o te ora mure ore (Ioane 3:16). Te taa ra ïa ia tatou e, i teie nei, ua arii o Iesu e fatata roa oia i te faaore roa i te paieti ore i nia i te fenua nei. Te tiai atoa ra tatou ma te tiaturi i te mau ‘raˈi apî e te fenua apî’ parau-tia ta te Atua iho i tǎpǔ mai. — Petero 2, 3:13.

13. Eaha te mau hopoia ta tatou e rave mai, ia farii tatou e e Parau te Bibilia na te Atua?

¹³ Teie râ, eiaha e moehia ia tatou e e tia ia tatou ia haapii i te Bibilia e ia haafaufaa mau i te mau mea ta ˈna e parau ra. Te horoa maira te Atua iho i teie nei aˈoraa: “E tau tamaiti, eiaha e haamoe i ta ˈu nei aˈo; ia haapao maite to aau i ta ˈu nei ture.” (Maseli 3:1). Noa ˈtu â ïa e no te rahiraa o te taata, e parau te Bibilia na te taata noa, e tia ia tatou ma te itoito ‘ia farii e ia riro noa ˈtu te taata atoa ei haavare, ei parau mau â ta te Atua’. (Roma 3:4.) Ia nehenehe atoa na outou e vaiiho i te paari o te Atua ia aratai mai ia outou! “E tiaturi ia Iehova ma to aau atoa ra (...). Eiaha e haamoe ia ˈna i to oe atoa ra mau haerea.” (Maseli 3:5, 6). Ia na reira tatou i te haafaufaa rahi i te Parau a te Atua, ua riro ïa ei tapao no te paari e noaa ˈtu ai ia outou i te tahi mau haamaitairaa i teie nei, e a muri noa ˈtu.

[Uiraa haapiiraa]

[Parau iti faaôhia i te api 187]

Eita e navai te taio-noa-raa i te Bibilia; e tia ia tatou ia faaohipa i te mau mea ta tatou e taio ra.

[Parau iti faaôhia i te api 188]

Ia haapao tatou i ta te Bibilia e parau ra, e mau faahopearaa maitai anaˈe ïa to muri mai.