Aborsiyon

Kahubitan: Ang aborsiyon o pagkuha mao ang pagpalugwa sa bata sa tiyan nga kinaiyanhong dili pa mabuhi sa gawas sa tagoangkan. Ang kinaiyanhong aborsiyon o pagkanaapasan mahimong mosangpot gumikan sa tawhanong pagkadihingpit o usa ka aksidente. Ang tinuyong gidasig nga aborsiyon aron lamang sa paglikay sa usa ka anak nga wala kinahanglana mao ang tinuyong pagpatay sa tawhanong kinabuhi.

Sa unsang paagi ang Tinubdan sa tawhanong kinabuhi magaapektar sa atong hunahuna niining butanga?

Buh. 17:28: “Pinaagi kaniya [Diyos] kita nangabuhi ug nagalihok ug nagalungtad.”

Sal. 36:9: “Uban kanimo [Jehova nga Diyos] mao ang tinubdan sa kinabuhi.”

Roma 14:12: “Ang matag usa kanato mohatag ug husay alang sa iyang kaugalingon ngadto sa Diyos.”

Giisip ba ni Jehova ang kinabuhi sa usa ka bata ingong bililhon bisan sa sayo kaayong mga ang-ang sa pagtubo tapos sa pagsamkon?

Sal. 139:13-16: “Ikaw [Jehova] nagtago kanako sa tiyan sa akong inahan. . . . Ang imong mga mata nakakita bisan sa akong pagkabinhi pa, ug sa imong basahon ang tanan niining bahin nahisulat.”

Nagpahayag ba ang Diyos nga ang usa ka tawo manubag sa kadaot ngadto sa usa ka batang wala pa ihimugso?

Ex. 21:22, 23: “Kon ang mga tawo manag-away ug sila makasamad sa usa ka babayeng mabdos ug ang iyang mga anak mogawas apan walay kadaot nga mahitabo, siya pahamtangan sa mga multa nga walay pakyas sumala sa ipahamtang kaniya sa tag-iya sa babaye; ug kana iyang igahatag pinaagi sa mga maghuhukom. Apan kon mahitabo ang makapatay nga disgrasya, nan kinahanglang magahatag ka sa kalag tungod sa kalag.” (Gipatin-aw sa pila ka hubad nga niining kasugoana ngadto sa Israel ang hinungdanon mao kon unsay nahitabo sa inahan, dili sa bata sa tiyan. Apan, ang orihinal Hebreong teksto nagatumong ngadto sa makapatay nga disgrasya ngadto sa inahan kaha o sa bata.)

 Unsa ka seryoso ang tinuyong pagpatay sa usa ka tawhanong kinabuhi tungod sa usa ka hinungdang wala itugot sa Diyos?

Gen. 9:6: “Si bisan kinsa nga magaula sa dugo sa tawo, pinaagi sa tawo ang iyang dugo pagaulaon, kay sa dagway sa Diyos iyang gibuhat ang tawo.”

1 Juan 3:15: “Ang mamumuno walay kinabuhing walay kataposan nga magapabilin diha kaniya.”

Ex. 20:13: “Dili ka magbuno.”

Ang opinyon ba sa doktor nga ang pagtugot nga paaboton sa bug-os nga tagal ang pagmabdos makadaot sa panglawas sa inahan magpakamatarong sa usa ka aborsiyon?

Ang mga opinyon sa doktor usahay sayop. Matarong ba ang pagpatay sa isigkatawo tungod kay kana siya basin magdaot sa iyang isigkatawo? Kon sa panahon sa pagpanganak kinahanglang himoon ang pagpili tali sa kinabuhi sa inahan ug sa iya sa bata, anaa ra sa mga hingtungdan ang pagpili. Apan, ang mga kauswagan sa medikal nga mga paagi sa daghang kayutaan naghimo niining kahimtanga nga talagsaon kaayo.

Kon Adunay Moingon—

‘Apan ako adunay katungod sa paghukom bahin sa mga butang maylabot sa akong kaugalingong lawas.’

Mahimong tubagon mo: ‘Akong masabtan ang imong gibati. Kadaghanan kaayo karong adlawa ang atong mga katungod yatakan sa uban; daghan ang yanong walay pagtagad kon unsay mahitabo sa ubang tawo. Apan ang Bibliya nagataganag mga latid nga makapanalipod kanato. Hinuon, sa pagdawat sa mga kaayohan kinahanglang dawaton usab nato ang mga kaakohan.’ Dayon tingali modugang: (1) ‘Daghang inahan ang gibiyaan sa mga lalaking mao ang amahan sa ilang mga anak. Apan sa panimalay diin ang bana ug asawa nagasunod sa mga sukdanan sa Bibliya, ang bana tinuod nga mahigugma sa iyang asawa ug mga anak ug mounong sa pagpuyo uban kanila ug magabuhi kanila. (1 Tim. 5:8; Efe. 5:28-31)’ (2) ‘Aron atong madawat nga personal kanang matanga sa gugma ug pagtahod, kinahanglan usab nga atong ipadapat ang mga sukdanan sa Bibliya diha sa atong tinamdan ngadto sa mga sakop sa atong pamilya. Sumala sa Bibliya unsaon nato pag-isip ang mga anak nga atong ipatungha? (Sal. 127:3; itandi ang Isaias 49:15.)’