Apostasya

Kahubitan: Ang apostasya maoy pagbiya o pagsalikway sa pagsimba ug pag-alagad sa Diyos, nga mao gayoy pag-alsa batok kang Jehova nga Diyos. Ang pipila ka apostata nagaangkon sa pag-ila ug pag-alagad sa Diyos apan nagasalikway sa mga pagtulon-an o mga tulomanon nga gipahimutang diha sa iyang Pulong. Ang uban nagaangkon sa pagtuo sa Bibliya apan nagasalikway sa organisasyon ni Jehova.

Ato ba gayong dahomon nga motungha ang mga apostata sulod sa Kristohanong kongregasyon?

1 Tim. 4:1: “Ang dinasig nga pulong sa tino nagapahayag nga  sa kaulahiang mga panahon adunay managpamiya gikan sa pagtuo, tungod sa pagtagad sa malimbongong dinasig nga mga pulong ug mga pagtulon-an sa mga demonyo.”

2 Tes. 2:3: “Ayaw kamo pagpalimbong ni bisan kinsa sa bisan unsang paagi, tungod kay [ang adlaw ni Jehova] dili moabot hangtod mahitabo una ang apostasya ug ang pagtungha sa tawo sa kalapasan, ang anak sa kalaglagan.”

Pipila ka timailhan sa mga apostata—

Mangdani sila sa paghimo sa uban nga ilang mga sumusunod, nga sa ingon nagahimog sektaryanong mga pagbahinbahin

Buh. 20:30: “Gikan ra gayod kaninyo adunay managpanindog nga mga tawo ug magsultig tinuis nga mga butang aron sa pagpamira sa mga tinun-an ngadto kanila.”

2 Ped. 2:1, 3: “Aduna usab ing mini nga mga magtutudlo sa taliwala kaninyo. Kini gayod sila sa tago magapasulod sa makadaot nga mga sekta ug magapanghimakak pa gani sa tag-iya nga maoy mipalit kanila . . . Usab, tungod sa kadalo kamo ilang panapion pinaagi sa tinumotumo nga mga pulong.”

Sila mahimong moangkon sa pagtuo diha kang Kristo pero dili mabalak-on sa buluhatong pagsangyaw ug pagpanudlo nga iyang gipabuhat sa iyang mga sumusunod

Luc. 6:46: “Nan, nganong inyong gitawag ako nga ‘Ginoo! Ginoo!’ apan dili mobuhat sa mga butang nga gisugo ko kaninyo?”

Mat. 28:19, 20: “Busa panlakaw kamo ug paghimog mga tinun-an sa katawhan sa tanang kanasoran, nga magabawtismo kanila . . . nga magatudlo kanila sa pagtuman sa tanang butang gisugo ko kaninyo.”

Mat. 24:14: “Kining maayong balita sa gingharian igawali sa tibuok pinuy-anang yuta alang sa pamatuod ngadto sa tanang kanasoran; ug unya moabot ang kataposan.”

Hayan mangangkon sila sa pag-alagad sa Diyos apan nagasalikway sa iyang mga hawas, sa iyang makitang kapunongan

Jud. 8, 11: “Kining mga tawhana, usab, sa ilang mga pagdamgo, nagahugawhugaw sa unod ug nagasalikway sa pagkaginoo ug  nagapasipala sa mga halangdon. Alaot gayod sila, kay sila . . . nangawagtang diha sa pagsupil ni Kore!”

Num. 16:1-3, 11, 19-21: “Si Kore . . . mipadayon sa pagtindog, uban sa . . . duha ka gatos ug kalim-an ka lalaki nga mga anak sa Israel mga pangulo sa katilingban . . . Busa nanaghiusa sila pagtingob batok kang Moises ug Aaron ug namulong ngadto kanila: ‘Igo na alang kaninyo, kay ang tibuok katilingban balaan ang tanan kanila ug si Jehova anaa sa ilang taliwala. Nan, nganong nagapataas kamo sa inyong kaugalingon ibabaw sa kongregasyon ni Jehova?’ . . . [Si Moises miingon:] ‘Ikaw ug ang tanan mong ginsakpan nga naghiusa sa pagtingob maoy batok kang Jehova. Mahitungod kang Aaron, unsa ba siya nga kamo nagbagulbol man gayod batok kaniya?’ Sa natigom na ni Kore ang tibuok katilingban nga batok kanila didto sa pultahan sa balongbalong nga pagatigoman, unya ang himaya ni Jehova mipakita sa tibuok katilingban. Sa maong panahon si Jehova misulti ngadto kang Moises ug Aaron, nga nag-ingon: ‘Pahalayo kamo gikan sa taliwala niini nga katilingban, aron pagaut-uton ko sila gilayon.’”

Dili lamang sila namiya sa matuod nga pagtuo kondili ila pang “gidagmalan” ang ilang kanhing mga kaubanan, nga nagagamit sa publikong kritisismo ug ubang mga paagi sa pagbalda sa ilang buluhaton; ang panlimbasog sa maong mga apostata gihalad sa paglumpag, dili sa pagpalig-on

Mat. 24:45-51: “Kinsa man gayod ang kasaligan ug manggialamon nga ulipon nga maoy itudlo sa iyang agalon sa pagdumala sa iyang panimalay, sa paghatag kanila sa ilang pagkaon sa hustong panahon? . . . Apan kon ang daotang ulipon magaingon sa iyang kasingkasing, ‘Madugay pa kadtong akong agalon,’ ug mosugod siya sa pagpamospos sa iyang mga masigkaulipon ug magakaon ug magainom kauban sa tino nga mga palahubog, ang agalon sa maong ulipon moabot sa adlaw nga siya wala magpaabot kaniya ug sa takna nga wala niya hibaloi, ug silotan siya sa hilabihan gayod ug ibutang niya siya ipon sa mga salingkapaw.”

2 Tim. 2:16-18: “Likayi ang kawang nga mga sulosulti nga nagalapas kon unsay balaan; kay sila magalabi pa sa pagkadidiyosnon, ug ang ilang pulong magaab-ab ingon sa kanggrina. Mga tawo nga ingon niini mao sila si Himeneo ug si Fileto. Kini gayong mga tawhana misimang gikan sa kamatuoran, nga nag-ingon nga ang pagpangbanhaw nahitabo na; ug ilang gidaot ang pagtuo sa uban.”

 Ang mga apostata ba abiabihon sa matinumanong mga Kristohanon sa ilang atubangan, sa personal man o pinaagig pagbasa sa ilang mga basahon?

2 Juan 9, 10: “Bisan kinsa nga magauna ug dili magapabilin sa pagtulon-an ni Kristo wala makapanag-iya sa Diyos. . . . Kon adunay moanha kaninyo ug wala magdala niining pagtulon-ana, ayaw gayod siya pasudla sa inyong mga balay ni mangumosta kaniya.”

Roma 16:17, 18: “Tambagan ko kamo, mga igsoon, nga padayong inyong timan-an kadtong nagahimog mga pagbahinbahin ug kahigayonan sa pagpapangdol nga supak sa pagtulon-an nga inyong nakat-onan, ug likayan sila. . . . Pinaagig mahapsay nga pulong ug maulog-ulogong sinultihan ginalimbongan nila ang mga kasingkasing sa mga buotan.”

Aduna bay seryosong kadaot nga mahitabo gumikan sa pagtagbaw sa pagkamapakisayron sa usa ka tawo bahin sa panghunahuna sa mga apostata?

Prov. 11:9: “Pinaagi sa iyang baba ang tawo nga apostata magalaglag sa iyang isigkatawo.”

Isa. 32:6: “Ang tawong buang mosulti sa binuang lamang, ug ang iya gayong kasingkasing magamugna nianang makadaot, aron bansayon ang apostasya ug isulti ang sayop batok kang Jehova, aron himoong walay sulod ang kalag nga gigutom, ug aron gani pahubason ang ilimnon sa giuhaw.” (Itanding Isaias 65:13, 14.)

Unsa ka seryoso (makuyaw) ang apostasya?

2 Ped. 2:1: “Kini gayod sila sa tago magapasulod sa makadaot nga mga sekta ug magapanghimakak pa gani sa tag-iya nga maoy mipalit kanila, nga magpadangat sa kalit nga pagkalaglag diha sa ilang kaugalingon.”

Job 13:16: “Sa iyang atubangan [Diyos] dili makaduol ang apostata.”

Heb. 6:4-6: “Dili na mahimo bahin niadtong sa makausa nalamdagan na unta, ug nakatilaw na sa walay bayad langitnong gasa, ug nahimo nang mga umalambit sa balaang espiritu, ug nakatagamtam na sa maayong pulong sa Diyos ug sa mga gahom sa umaabot nga sistema sa mga butang, apan mangahulog [“kon sila sa maong panahon nakahimog apostasya,” RS], ang pagpabalik pa kanila sa paghinulsol, sanglit kay gituyoan man nila sa paglansang pag-usab sa Anak sa Diyos alang sa ilang kaugalingon ug sa pagpakaulaw kaniya sa dayag.”