Bawtismo

Kahubitan: Ang pulong “bawtismo” nagagikan sa Gregong ba·ptiʹzein, nga nagkahulogang “aron ilusbog, aron iunlod.” (A Greek-English Lexicon, pinaagi ni Liddell ug Scott) Ang Kristohanong bawtismo sa tubig maoy panggawas nga simbolo nga ang usa nga gibawtismohan naghimog bug-os, walay ukon-ukon ug walay tagal nga pahinungod pinaagi ni Jesu-Kristo aron buhaton ang kabubut-on ni Jehova nga Diyos. Nga naglakip sa uban, ang Kasulatan nagpunting usab sa bawtismo ni Juan, bawtismo sa balaang espiritu, bawtismo sa kalayo.

Magdumili ba sa pagpabawtismo ang mga tawo kinsa nagatuo gayod sa Pulong sa Diyos?

Mat. 28:19, 20: “Busa panlakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang gisugo ko kaninyo.”

 Buh. 2:41: “Kadtong misagop sa iyang pulong nga kinasingkasing nabawtismohan.”

Buh. 8:12: “Sa diha nga nagpanuo na sila kang Felipe, kinsa nagmantala sa maayong balita sa gingharian sa Diyos ug sa ngalan ni Jesu-Kristo, sila nanagpabawtismo, mga lalaki ug ingon man mga babaye.”

Buh. 8:36-38: “Sa nagpadayon sila sa ilang panaw sa dalan, ming-abot sila sa usa ka tubig, ug miingon ang [Etiopianong] eunoko: ‘Tan-awa! Anaay tubig; unsa pa may makaulang sa akong pagpabawtismo?’ Ug misugo siya sa pagpahunong sa kalisa, ug . . . [si Felipe] mibawtismo kaniya.”

Kristohanong bawtismo sa tubig—kini ba pinaagig pagwisikwisik o pinaagig bug-os nga pagtuslob?

Mar. 1:9, 10: “Si Jesus . . . gibawtismohan [“gilusbog,” ED, Ro] ni Juan sa [Suba] sa Jordan. Ug sa dayon nga paghaw-as gikan sa tubig nakita niya nga nabukas ang kalangitan.”

Buh. 8:38: “Ug silang duha nanaog ngadto sa tubig, si Felipe ug ang eunoko; ug iyang gibawtismohan [“gilusbog,” ED, Ro] siya.”

Gibuhat ba sa unang-siglong mga Kristohanon ang bawtismo sa bata?

Mat. 28:19: “Busa panlakaw kamo ug paghimog mga tinun-an . . . magabawtismo kanila.”

Buh. 8:12: “Sa diha nga nagpanuo na sila kang Felipe . . . sila nanagpabawtismo, mga lalaki ug ingon man mga babaye.”

Apan, sa ulahi, si Origen (185-254 K.P.) misulat: “Maoy batasan sa iglesya nga himoon ang bawtismo bisan ngadto sa mga bata.” (Selections From the Commentaries and Homilies of Origen, Madras, India; 1929, p. 211) Ang maong batasan gilig-on sa Ikatulong Konsilyo sa Carthage (253 K.P.).

Ang relihiyosong historyanong si Augustus Neander misulat: “Ang pagtuo ug bawtismo padayong nalambigit sa usag usa; ug busa kana malagmit nga tinuod . . . nga ang batasan sa pagbawtismo ug bata wala idungog nianang yugtoa [sa unang siglo]. . . . Nga kana unang giila ingong apostolikong tradisyon sa paglakat sa ikatulong siglo, gipamatud-an hinuon nga batok inay kay dapig sa pagdawat niana nga apostolikong gigikanan.”—History of the Planting and Training of the Christian Church by the Apostles (New York, 1864), p. 162.

Ang Kristohanong bawtismo sa tubig moresulta ba sa kapasayloan sa mga sala?

1 Juan 1:7: “Kon kita magalakaw diha sa kahayag maingon nga  siya mismo anaa sa kahayag, . . . ang dugo ni Jesus nga iyang Anak nagahinlo kanato gikan sa tanang sala.” (Busa, dili ang bawtismo sa tubig, kondili ang dugo ni Jesus ang nagahinlo kanato gikan sa sala.)

Mat. 3:11: “Ako [Juan nga Bawtista] . . . nagabawtismo kaninyo sa tubig tungod sa inyong paghinulsol; apan siya nga moabot sunod kanako [Jesu-Kristo] mas gamhanan pa kay kanako, kansang mga sapin ako dili takos nga magakuha.” (Mga Mat 3 bersikulo 5, 6, usab ang Buhat 13:24, nagabutyag nga ang gibuhat ni Juan gipunting dili ngadto sa tanang katawhan, kondili ngadto sa mga Hudiyo. Ngano? Tungod sa kasal-anan sa mga Hudiyo batok sa tugon sa Kasugoan ug sa pag-andam kanila alang kang Kristo.)

Buh. 2:38: “Paghinulsol, ug magpabawtismo ang kada usa kaninyo diha sa ngalan ni Jesu-Kristo alang sa kapasayloan sa inyong mga sala.” (Ang bawtismo ba mismo mihatag ug kapasayloan ngadto kanila? Tagda: Kini gisulti ngadto sa mga Hudiyo kinsa nakaambit sa kaakohan sa kamatayon ni Kristo. [Tan-awang mga Buh 2 bersikulo 22, 23.] Ang ilang bawtismo nagbutyag nga adunay gipamatud-an. Unsa man kana? Nga sila sa maong panahon nagbutang ug pagtuo kaniya ingon ang Mesiyas, ang Kristo. Pinaagi lamang sa ilang pagbuhat niini nga ang ilang mga sala mapasaylo. [Buh. 4:12; 5:30, 31])

Buh. 22:16: “Tumindog ka, magpabawtismo ug hugasan ang imong mga sala pinaagi sa pagtawag diha sa iyang ngalan.” (Usab ang Buhat 10:43)

Kinsa ang bawtismohan pinaagig balaang espiritu?

1 Cor. 1:2; 12:13, 27: “Ngadto kaninyo nga nabalaan diha sa kahiusa ni Kristo Jesus, nga gipangtawag ingon nga mga balaan . . . Kay sa pagkamatuod pinaagi sa usa ka  espiritu kitang tanan gibawtismohan ngadto sa usa ka lawas, mga Hudiyo man o mga Grego, mga ulipon o mga tawong gawas, ug kitang tanan gipainom sa usa ka espiritu. Karon kamo mao ang lawas ni Kristo.” (Ingon sa gipakita sa Daniel 7:13, 14, 27, ang maong “mga balaan” moambit diha sa Gingharian uban sa Anak sa tawo, si Jesu-Kristo.)

Juan 3:5: “Gawas kon ang usa igaanak sa tubig ug sa espiritu siya dili makasulod sa gingharian sa Diyos.” (Ang usa ka tawo ‘ipanganak sa espiritu’ sa panahon sa iyang bawtismo pinaagi nianang espirituha. Nagpakita ang Lucas 12:32 nga ang “gamayng panon” lamang ang makahupot sa maong pribilehiyo. Tan-awa usab ang Pinadayag 14:1-3.)

Ang tanan ba kinsa gibawtismohan sa balaang espiritu nagasultig mga pinulongan o nakabaton ug gasa sa pagpanambal?

1 Cor. 12:13, 29, 30: “Kay sa pagkamatuod pinaagi sa usa ka espiritu kitang tanan gibawtismohan ngadto sa usa ka lawas . . . Dili ang tanan mga apostol, sila ba? . . . Dili ang tanan nagahimog mga milagro, sila ba? Dili ang tanan nakabaton ug mga hiyas sa pagpang-ayo ug mga sakit, sila ba? Dili ang tanan nagasultig mga pinulongan, sila ba?”

Tan-awa usab ang “Pag-ayog mga Sakit” ug “Mga Pinulongan, Pagsulti sa.”

‘Bawtismo alang sa mga patay’—unsa ang kahulogan niana?

1 Cor. 15:29, KJ: “Kon dili pa unsa may ilang ginabuhat sa pagpabawtismo alang sa mga patay, kon ang mga patay dili gayod banhawon? nan ngano nga sila bawtismohan alang sa mga patay?”

Ang Gregong preposisyon (pulong ipanglabot) nga hy·perʹ, nga gihubad dinhi nga “alang,” nagakahulogan usab nga “tungod sa,” “sa kaayohan sa,” “inay sa,” “alang sa katuyoan sa,” ubp. (A Greek-English Lexicon, pinaagi ni Liddell ug Scott) Unsa man ang gipasabot niana niining tekstoha? Gipasabot ba ni Pablo nga bawtismohan ang buhing mga tawo sa kaayohan niadtong kinsa namatay nga walay bawtismo?

Ang ubang mga kasulatan lamang nga diretsong naghisgot sa kamatayon maylabot sa bawtismo nagtumong ngadto sa usa ka bawtismo nga pagaagian sa maong indibiduwal mismo, dili ang usa ka bawtismo sa kaayohan sa laing tawo, siya nga patay na

Roma 6:3: “Wala ba kamo mahibalo nga kitang tanan nga nabawtismohan ngadto kang Kristo Jesus gibawtismohan man ngadto sa iyang kamatayon?” (Usab ang Marcos 10:38, 39)

Col. 2:12: “Kay kamo [buhing mga membro sa kongregasyon sa Colosas] gikalubong uban kaniya diha sa iyang bawtismo, ug pinaagig pakiglabot uban kaniya kamo usab duyog nga gibanhaw pinaagi sa inyong pagtuo diha sa buhat sa Diyos, kinsa mibanhaw kaniya gikan sa mga patay.”

Paghubad diha sa “New World Translation” sumala sa gramatika maoy husto ug nahauyon uban niining ubang mga teksto sa Bibliya

1 Cor. 15:29: “Kon dili pa, unsa may ilang buhaton kinsa gibawtismohan alang sa katuyoan sa pagkahimong mga patay? Kon ang mga patay dili man gayod banhawon, nganong sila usab bawtismohan man alang sa katuyoan nga mahisama niana?” (Mao nga sila bawtismohan, o ipatidlom, nganha sa dalan sa kinabuhi nga mosangpot ngadto sa kamatayon sa pagkamatinumanon nga sama  nianang iya ni Kristo ug unya pagabanhawon ngadto sa espiritung kinabuhi sama kaniya.)

Unsay moresulta gikan sa bawtismo sa kalayo?

Luc. 3:16, 17: “Siya [Jesu-Kristo] magbawtismo kaninyong mga tawo sa . . . kalayo. Ang iyang paliran anaa sa iyang kamot aron sa bug-os nga paghinlo sa iyang giukan . . . Ang mga uhot iyang sunogon sa kalayo nga dili arang mapalong.” (Ang kalaglagan niana maoy sa walay kataposan.)

Mat. 13:49, 50: “Sama unya niana diha sa konklusiyon sa sistema sa mga butang: ang mga anghel manggula ug lainon ang mga daotan gikan sa mga matarong ug isalibay sila ngadto sa nagadilaab nga hudno.”

Luc. 17:29, 30: “Sa adlaw sa pagpahawa ni Lot sa Sodoma miulan ug kalayo ug asupre gikan sa langit ug milaglag kanilang tanan. Maingon man usab niini sa adlaw nga igapadayag na ang Anak sa tawo.”

Dili pareho sa bawtismo sa balaang espiritu, nga kadto alang sa mga tinun-an

Buh. 1:5: “Si Juan, sa pagkamatuod, nagpangbawtismo sa tubig, apan kamo [matinumanong mga apostol ni Jesus] bawtismohan diha sa balaang espiritu sa dili madugay human niini.”

Buh. 2:2-4: “Sa kalit may miabot nga dahunog gikan sa langit ingon gayod sa huros sa makusog nga hangin, ug kini mipuno sa balay diin sila didto nanaglingkod. Ug dihay mipakita kanila nga mga dila nga daw kalayo ug napang-apod-apod, ug nagtinagsaay sa pagpatong [pero wala maglimin o maglusbog] sa matag usa kanila, ug silang tanan napuno sa balaang espiritu ug misugod sa pagsulti sa nagkalainlaing pinulongan, sumala gayod sa gitugot kanila nga ipalitok sa espiritu.”