Adlawng Natawhan

Kahubitan: Ang adlawng natawhan sa usa ka tawo o ang kasumaran nianang adlawa. Sa ubang mga dapit ang sumad sa adlawng natawhan sa usa, ilabina kanang iya sa bata, ginasaulog uban ang salosalo ug pagpanghatag ug mga gasa. Dili Biblikanhon nga buhat o batasan.

Ang mga reperensiya ba sa Bibliya alang sa mga selebrasyon sa adlawng natawhan nagpunting niana nga mauyonon? Adunay duha lamang ka reperensiya sa Bibliya nga nagtumong sa maong mga kasaulogan.

Gen. 40:20-22: “Ug mao nga sa ikatulo ka adlaw adlaw kadto  sa pagkatawo ni Paraon, ug siya naghimo ug kombira . . . Subay gayod niana iyang gipabalik sa iyang katungdanan ang pangulo sa mga magtitiing . . . Apan iyang gipabitay ang pangulo sa mga magbubuhat ug tinapay.”

Mat. 14:6-10: “Sa gisaulog ang sumad sa adlawng natawhan ni Herodes ang babayeng anak ni Herodias misayaw diha niana ug nakapahimuot kaayo ni Herodes nga tungod niana misaad siya uban ang panumpa nga ihatag kaniya ang bisan unsa nga iyang pangayoon. Unya siya, ubos sa pagtudlo sa iyang inahan, miingon: ‘Ihatag kanako dinhi sinulod sa bandiha ang ulo ni Juan nga Bawtista.’ . . . Ug iyang gipaadtoan ug gipapunggotan si Juan sulod sa bilanggoan.”

Ang tanan nga anaa sa Bibliya gisulat nga may katarongan. (2 Tim. 3:16, 17) Ang mga Saksi ni Jehova nagmatikod nga ang Pulong sa Diyos nagtaho nga dili mauyonon maylabot sa mga saulog sa adlawng natawhan ug busa nagalikay niini.

Unsa ang pagtamod sa sayong mga Kristohanon ug mga Hudiyo sa kapanahonan sa Bibliya maylabot sa mga kasaulogan sa adlawng natawhan?

“Ang ideya sa usa ka pangilin sa adlawng natawhan halayo sa panghunahuna sa mga Kristohanon niining maong yugto sa linangkob.”—The History of the Christian Religion and Church, During the Three First Centuries (New York, 1848), ni Augustus Neander (gihubad ni Henry John Rose), p. 190.

“Ang ulahing mga Hebreohanon nagtamod sa selebrasyon sa mga adlawng natawhan ingong bahin sa pagsimba sa diyosdiyos, usa ka tinamdan nga gilig-on ug maayo sa ilang nakita mahitungod sa naandan nga mga pagsaulog nga nalambigit niining mga adlawa.”—The Imperial Bible-Dictionary (London, 1874), giedit ni Patrick Fairbairn, Tomo I, p. 225.

Unsa ang sinugdanan sa iladong mga kustombre nga may pagkalangkit sa mga kasaulogan sa adlawng natawhan?

“Ang lainlaing mga kustombre nga ang mga tawo karon nagasaulog sa ilang mga adlawng natawhan adunay dugay nang kasaysayan. Ang mga sinugdanan niini maoy sa salamangka ug relihiyon. Ang mga kustombre sa pagtanyag ug mga pahalipay, paghatag ug mga gasa ug pagsaulog—nga kompleto sa gidagkotang mga kandila—sa karaang kapanahonan nagkahulogan nga  ang selebrante sa maong adlawng natawhan pagapanalipdan gikan sa mga demonyo ug sa pagpaneguro sa iyang seguridad alang sa umaabot nga tuig. . . . Hangtod sa ikaupat nga siglo ang Kristiyanidad misalikway sa selebrasyon sa adlawng natawhan ingon nga paganong kustombre.”—Schwäbische Zeitung (suplementong magasin nga Zeit und Welt), Abril 3/4, 1981, p. 4.

“Ang mga Grego nagtuo nga ang matag usa adunay mapanalipdong espiritu o daemon kinsa mitambong sa iyang pagkahimugso ug nagbantay kaniya sa kinabuhi. Kining espirituha adunay mistikong relasyon uban sa diyos kang kansang adlawng natawhan ang maong tawo nahimugso. Ang mga Romano nagtuo usab niining maong ideya. . . . Kining ideyaha gipalungtad diha sa tawhanong pagtuo ug gibanaag diha sa anghel nga magbalantay, ingkantohanong inahan ug patron nga santos. . . . Ang kustombre sa nagasigang mga kandila ibabaw sa mga keyk nagsumikad kana sa mga Grego. . . . Ang mga dugos nga keyk nga sama kalingin sa bulan ug gisug-an sa nipis nga mga kandila gipahiluna ibabaw sa templong mga halaran ni [Artemis]. . . . Ang mga kandila sa adlawng natawhan, diha sa pagtuo sa kasugiran, nasangkapan sa espesyal nga madyik alang sa mga panghinaot. . . . Ang gidagkotang nipis nga mga kandila ug haladnong mga suga adunay mistikong kahulogan sukad gayod ang tawo unang mitukod ug mga halaran ngadto sa iyang mga diyos. Ang mga kandila sa adlawng natawhan mao diay pasidungog ug halad ngadto sa adlawng natawhan sa bata ug magpatunghag maayong kapalaran. . . . Ang mga pahalipay sa adlawng natawhan ug mga panghinaot sa kalipay maoy kinaiyanhong bahin niining maong pangilin. . . . Sa sinugdanan ang ideya gikan gayod sa salamangka. . . . Ang mga pahalipay sa adlawng natawhan adunay gahom sa maayo o daotan sanglit ang usa mas duol man sa kalibotan sa espiritu nianang maong adlaw.”—The Lore of Birthdays (New York, 1952), ni Ralph ug Adelin Linton, pp. 8, 18-20.

Dili man supak ang mapuslanong mga panagkatigom sa pamilya ug mga higala aron sa pagkaon, pag-inom, ug pagkalipay sa ubang mga higayon

Eccl. 3:12, 13: “Walay lain nga mas maayo alang kanila kay sa pagkalipay ug sa pagbuhat sa maayo sa panahong buhi pa ang usa ka tawo; ug ingon man ang tagsatagsa ka tawo kinahanglang mokaon ug moinom gayod ug maglipay tungod sa iyang tanang mga paghago. Kini maoy hatag sa Diyos.”

Tan-awa usab ang 1 Corinto 10:31.