Yuta

Kahubitan: Ang terminong “yuta” gigamit nga labaw sa usa ang kahulogan diha sa Kasulatan. Sagad atong gihunahuna kana ingong nagtumong sa planeta mismo, nga gitagana gayod ni Jehova aron kana magpalahutay sa tawhanong kinabuhi uban sa panglantaw nga magpatagbaw ug maayo sa atong mga kinabuhi. Kinahanglang amgohon, hinuon, nga ang “yuta” ginagamit man usab sa mahulagwayong kahulogan, nga nagpunting, pananglitan, sa mga tawo nga nagapuyo ibabaw niining planetaha o sa tawhanong katilingban nga adunay tinong mga kinaiya.

Malaglag ba ang planetang Yuta diha sa nukleyar nga gubat?

Unsa ang gipakita sa Bibliya nga maoy katuyoan sa Diyos maylabot sa yuta?

Mat. 6:10: “Moabot unta ang imong gingharian. Matuman unta ang imong kabubut-on, ingon didto sa langit, mao man usab sa yuta.”

Sal. 37:29: “Ang mga matarong mismo magapanunod sa yuta, ug sila magapuyo sa ibabaw niini sa walay kataposan.”

Tan-awa usab ang Ecclesiastes 1:4; Salmo 104:5.

Aduna bay posibilidad nga, sanglit kay ang mga nasod diyutay ra man ang pagpabili sa katuyoan sa Diyos, tingali ilang bug-os laglagon ang yuta aron pagapuy-an sa laing paagi?

Isa. 55:8-11: “[Ang pulong ni Jehova mao:] Maingon nga ang mga langit hataas kay sa yuta, mao man ang akong mga dalan mas hataas kay sa inyong mga dalan, ug ang akong mga hunahuna kay sa inyong mga hunahuna. . . . Akong pulong . . . dili  mobalik kanako nga walay kapuslanan, kondili kini magatuman gayod sa akong gikahimut-an, ug kini magapalampos sa butang nga tungod niana kini akong gipadala.”

Isa. 40:15, 26: “Tan-awa! [Pinasukad sa panghunahuna ni Jehova nga Diyos] Ang mga nasod mahisama sa usa ka tinulo sa timba; ug ingon sa pino nga abog sa timbangan sila ginaisip. . . . ‘Iyahat ang inyong mga mata sa itaas ug tan-awa [ang adlaw, ang bulan, ug ang mga bilyon nga mga bituon]. Kinsay nagbuhat niining mga butanga? Mao Siya nga nagadala sa ilang panon sa tinagdaghan, ang tanan kanila iyang gitawag gani pinaagi sa ngalan. Tungod sa kadako sa iyang gahom, siya usab kusgan sa kagahom, walay mausa nga makulang kanila.’” (Ang nukleyar nga enerhiya nga gimugna sa mga nasod maoy makalilisang ngadto sa mga tawo. Apan mga benilyon sa mga bituon makapatunghag nukleyar nga enerhiya sa gidak-on nga dili nato maarangan sa pagsabot. Kinsa man ang milalang ug nagabuot niining tanang langitnong mga butang? Dili ba Niya mapugngan ang kanasoran sa paggamit sa ilang nukleyar nga mga armas nga magpabalda sa iyang katuyoan? Nga kini buhaton sa Diyos gipasundayag pinaagi sa iyang paglaglag sa militaryong puwersa sa Ehipto sa dihang si Paraon naninguha sa pagkawang sa kaluwasan sa Israel.—Ex. 14:5-31.)

Pin. 11:17, 18: “Kami nagapasalamat kanimo, Jehova nga Diyos, ang Labing Gamhanan, ang Usa nga mao ang sa karon ug mao ang sa kagahapon, tungod kay nahuptan mo ang imong dakong gahom ug nagsugod pagmando ingong hari. Apan ang kanasoran nangapungot, ug ang imong kaugalingong kapungot miabot, ug ang tinudlong panahon . . . sa paglaglag sa mga manglalaglag sa yuta.”

Ang yuta ba laglagon sa Diyos mismo pinaagig kalayo?

Ang 2 Pedro 3:7, 10 (KJ) nagasuportar ba sa maong pangisip? “Ang mga langit ug ang yuta, nga karon nagalungtad, pinaagi sa mao ra nga pulong ginatipigan, gikatagana sa kalayo batok sa adlaw sa paghukom ug perdisyon [“kalaglagan,” RS] sa mga tawong dili diyosnon. . . . Ang adlaw sa Ginoo moabot sama sa usa ka kawatan sa kagabhion; nga niana ang mga langit mangawagtang uban sa dakong dinaguok, ug ang mga elemento mangatunaw sa hilabihang kainit, ang yuta usab ug ang mga buhat nga ania niini pagasunogon [“masunog,” RS, JB; “mahanaw,” TEV; “mapadayag,” NAB; “mapasundayag,” NE; “mabutyag,” NW].” (Matikdi: Ang Codex Sinaiticus ug Vatican MS 1209, nga kining duha naglungtad sa ika-4 nga siglo K.P., mabasa nga “mabutyag.”  Ang ulahing mga manuskrito, ang ika-5 nga siglong Codex Alexandrinus ug ang ika-16 nga siglong Clementine nga bug-os nagrebisar sa Vulgate, mabasa nga “masunog.”)

Ang Pinadayag 21:1 (KJ) nagapakita ba nga ang atong planeta pagalaglagon? “Ug nakita ko ang usa ka bag-ong langit ug usa ka bag-ong yuta: kay ang unang langit ug ang unang yuta nangahanaw na; ug ang dagat wala na.”

Aron mahusto, ang katin-awan niining mga bersikuloha kinahanglang mahauyon sa konteksto ug duyog sa ubang bahin sa Bibliya

Kon kining mga tekstoha (2 Pedro 3:7, 10 ug Pinadayag 21:1) nagakahulogan man ugaling nga pagasunogon sa kalayo ang literal nga planetang Yuta, nan ang literal nga mga langit (ang mga bituon ug ubang langitnong mga butang) pagalaglagon usab pinaagig kalayo. Apan, ang maong literal nga panghunahuna mosumpaki sa pasalig nga anaa sa mga teksto sama sa Mateo 6:10, Salmo 37:29 ug Sal 104:5, maingon man sa Proverbio 2:21, 22. Dugang pa, unsa may epekto sa kalayo nganha sa mainit na kaayong adlaw ug mga bituon? Busa ang terminong “yuta” diha sa gikutlo-itaas nga mga teksto kinahanglang pagasabton diha sa laing kahulogan.

Sa Genesis 11:1, Unang Hari 2:1, 2, Unang Cronicas 16:31, Salmo 96:1, ubp., ang terminong “yuta” gigamit diha sa mahulagwayong kahulogan, nga nagpasabot sa katawhan, sa tawhanong katilingban. Mao kaha kana ang gipasabot sa 2 Pedro 3:7, 10 ug Pinadayag 21:1?

Matikdi nga, diha sa konteksto, sa 2 Pedro 3:5, 6 (ingon man ang 2Pe 2:5, 9), gihisgotan ang pagtandi o pagkasama sa Lunop sa adlaw ni Noe, nga ang daotan tawhanong katilingban gilaglag, pero si Noe ug ang iyang panimalay, ingon man sa globo mismo, naluwas. Mao man usab, diha sa 2 Pedro 3:7 nagaingon nga ang pagalaglagon mao ang “dili diyosnong mga tawo.” Ang pangisip nga “ang yuta” dinhi nagapasabot sa daotan tawhanong katilingban sa bug-os nahiuyon sa ubang bahin sa Bibliya, ingon sa giilustrar sa mga teksto nga gikutlo sa itaas. Mao kanang simbolikong “yuta,” o daotan tawhanong katilingban, ang “nabutyag”; nga mao, si Jehova mout-ot samag kalayo sa tanang nagatakoban, nga nagayagyag sa pagkadaotan sa dili diyosnon tawhanong katilingban ug ginabutyag kana nga angay sa bug-os nga kalaglagan. Kanang maong daotang katilingban sa katawhan mao usab “ang unang yuta” nga gitumong sa Pinadayag 21:1 (KJ).

Nga masubayon, ang pulong ni Jesus sa Lucas 21:33 (“ang langit ug yuta mahanaw, apan . . . ”) kinahanglang pagasabton  sumala sa katakdo nga pahayag sa Lucas 16:17 (“masayon pang mahanaw ang langit ug ang yuta kay . . . ”), nga kining duha nagpasiugda lamang sa imposibilidad o pagkadili mahimo sa mga situwasyon nga gipresentar.—Tan-awa usab ang Mateo 5:18.

Ang matarong ba dad-on sa langit ug unya pabalikon sa yuta human laglaga ang daotan?

Ang Pinadayag 21:2, 3 nagasuportar ba nianang panghunahunaa? Kini nagaingon: “Nakita ko usab ang balaang siyudad, ang Bag-ong Jerusalem, nga nanaog gikan sa langit gikan sa Diyos ug gikatagana maingon sa usa ka pangasaw-onon nga gidayandayanan alang sa iyang pamanhonon. Ug nadungog ko gikan sa trono ang makusog nga tingog nga nag-ingon: ‘Tan-awa! Ang balongbalong sa Diyos uban sa katawhan, ug siya magapuyo uban kanila, ug sila mahimong iyang mga katawhan. Ug ang Diyos mismo magpakig-uban kanila.’” (Ang punto ba nga ang Diyos “magapuyo” uban sa katawhan ug “magpakig-uban kanila” nagakahulogan nga siya mahimong unodnong Labing Hataas? Dili kana mahimo, kay si Jehova misulti man kang Moises: “Walay tawo nga arang makakita kanako ug mabuhi pa.” [Ex. 33:20] Nan, sa masubayon ang mga membro sa Bag-ong Jerusalem dili mobalik nganhi sa yuta ingong mga unodnon. Unsa man, diay, ang kahulogan nga ang Diyos “magpakig-uban” sa katawhan ug sa unsang paagi ang Bag-ong Jerusalem ‘manaog gikan sa langit’? Sa walay duhaduha ang timailhan makaplagan diha sa Genesis 21:1, nga nag-ingon nga ang Diyos “miduaw” kang Sara, nagpanalangin kaniya uban sa usa ka anak nga lalaki sa iyang pagkatigulang. Nagtug-an kanato ang Exodo 4:31 nga ang Diyos “miduaw” sa Israel pinaagig pagpadala kang Moises ingong manluluwas. Ang Lucas 7:16 nag-ingon nga pinaagi sa ministeryo ni Jesus ang Diyos “miduaw” sa iyang katawhan. [Tanan gikan sa KJ ug RS] Ang ubang mga hubad naggamit sa pulong nga ang Diyos “miliso sa iyang pagtagad” ngadto sa iyang katawhan [NW] o ‘nagpakitag kabalaka’ alang kanila [NE]. Busa ang Pinadayag 21:2, 3 magkahulogan diay nga ang Diyos ‘moduaw,’ o magpakig-uban sa katawhan, pinaagi sa langitnong Bag-ong Jerusalem, nga pinaagi niana ang mga panalangin ipadangat ngadto sa masinundanong mga tawo.)

Prov. 2:21, 22, KJ: “Ang mga matul-id magapuyo sa yuta [“ibabaw sa yuta,” NE], ug ang hingpit [“walay ikasaway nga mga tawo,” NE] magapabilin diha niana. Apan ang mga daotan pagaputlon gikan sa yuta, ug ang mga malapason pagalukahon gikan niana.” (Matikdi nga kana wala mag-ingon nga ang mga walay ikasaway mobalik nganhi sa yuta kondili nga sila “magapabilin diha niana.”)

 Nausab ba ang orihinal nga katuyoan sa Diyos alang sa yuta?

Gen. 1:27, 28: “Ang Diyos mipadayon sa paglalang sa tawo diha sa iyang dagway, sa dagway sa Diyos iyang gilalang siya; lalaki ug babaye gilalang niya sila. Dugang pa, gipanalanginan sila sa Diyos ug miingon ang Diyos kanila: ‘Sumanay ug dumaghan kamo ug pun-on ang yuta ug magagahom niini, ug magbaton kamo ug pagbulot-an sa mga isda sa dagat ug sa nagalupad nga mga linalang sa kalangitan ug sa matag binuhat nga buhi nga nagalihok sa ibabaw sa yuta.’” (Busa gibutyag sa Diyos ang iyang katuyoan nga ang yuta pun-on sa kaliwatan ni Adan ug Eva ingong mga tig-atiman sa tibuok-kalibotang paraiso. Human ang Diyos midesinyo niining yutaa sa kahibulongang paagi para puy-anan sa tawo, nga naghimo niining talagsaon taliwala sa tanang planeta nga nasusi sa tawo pinaagig iyang mga teleskopyo ug mga sakyanan sa wanang, ang Maglalalang ba misalindot na lamang sa iyang katuyoan, nga nagkawang niini sa walay kataposan tungod sa sala ni Adan?)

Isa. 45:18: “Kini mao ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug Magbubuhat niini, Siya ang Usa nga malig-ong nagtukod niini, kinsa milalang niini dili sa walay kapuslanan lamang, nga nag-umol niini aron pagapuy-an: ‘Ako mao si Jehova, ug wala nay lain.’” (Tan-awa usab ang Isaias 55:10, 11.)

Kon wala na man gayoy mamatay didto sa Bag-ong Sistema sa Diyos, sa unsang paagi maigo (masulod) ang tanang tawo ibabaw sa yuta?

Hinumdomi nga sa gibutyag sa Diyos ang iyang katuyoan alang sa yuta siya miingon: “Sumanay ug dumaghan kamo ug pun-on ang yuta.” (Gen. 1:28) Ang Diyos mihatag sa tawo ug katakos sa pagsanay, ug sa dihang ang Iyang katuyoan nianang bahina matuman na Siya makapahunong man sa pagpanganak ibabaw sa yuta.

Unsang matanga sa mga tawo nga uyonan sa Diyos uban ang dumalayong kinabuhi ibabaw sa yuta?

Sof. 2:3: “Pangitaa si Jehova, kamong tanang maaghop sa yuta, kinsa nanagtuman sa Iya mismong tulomanon. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”

Sal. 37:9, 11: “Sila nga nagalaom kang Jehova mao ang magapanunod sa yuta. . . . Ang mga maaghop sa ilang kaugalingon magapanunod sa yuta, ug sila gayod makakaplag sa ilang bug-os nga kalipay diha sa kadagaya sa pakigdait.”