Madadaelto ngata ti planeta a Daga gapu iti nuklear a gubat?

Aniat’ kunaen ti Biblia kas panggep ti Dios maipapan iti daga?

Mat. 6:10: “Umay koma ti pagariam. Maaramid koma ti pagayatam, kas sadi langit, kasta met ditoy daga.”

Sal. 37:29: “Dagiti nalinteg a mismo tawidendanto ti daga, ket agtaengdanto kenkuana nga agnanayon.”

Kitaenyo met ti Eclesiastes 1:4; Salmo 104:5.

Adda ngata posibilidadna, a yantangay di met ikabkabilangan ti nasnasion ti panggep ti Dios, indanto met laeng dadaelen nga interamente ti daga tapno di mapagnaedan?

Isa. 55:8-11: “[Kuna ni Jehova:] Ta kas ti langlangit nangatngatoda ngem iti daga, kasta ti daldalanko nangatngatoda ngem iti daldalanyo. . . . Ti saok . . . dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”

Isa. 40:15, 26: “Adtoy! [Sigun iti panangmatmat ni Jehova a Dios] Ti nasnasion kasda la sangkatedted ti maysa a timba; ken naibilangda a kas nalapat a tapok ti timbengan. . . . ‘Itangadyo dagiti matayo idiay ngato ket kitaenyo [ti init, ti bulan, ken binilion a bitbituen]. Asino ti namarsua kadagitoy? Isu Daydiay mangiruar iti buyotda babaen iti bilangda, isu inaganna ida amin. Gapu iti kinadakkel unay ti kinamaingelna, ken agsipud ta napigsa iti pannakabalin, awan ti agkurang uray no maysa.’” (Ti nuklear a pannakabalin a napataud ti nasnasion nakaam-amak no iti tattao. Ngem binilion a bitbituen dagiti agusar iti nuklear a pannakabalin a ti pigsada di pulos matukod ti panunottayo. Asinot’ namarsua ken mangtengtengngel kadagitoy a nailangitan a parsua? Dina aya malappedan ti nasnasion a mangusar iti nuklear nga ig-igamda tapno dida tubenan ti panggep ti Dios? Ti pammaneknek a kastoyto ti aramiden ti Dios makita iti daydiay panangduprakna iti militar a bileg ti  Egipto idi a pinadpadas ni Faraon a lapdan ti pannakaaon ti Israel.—Ex. 14:5-31.)

Apoc. 11:17, 18: “Jehova a Dios, a Mannakabalin amin, agyamankam kenka, Daydiay adda ita ken adda idi, agsipud ta innalam ti dakkel a pannakabalinmo ket nangrugika a nagturay kas ari. Ngem nakapungtot ti nasnasion, ket dimtengen ti pungtotmo, ken ti naituding a panawen . . . ti panangdadael kadagiti mangdaddadael iti daga.”

Ti Dios a mismo dadaelennanto aya ti daga babaen iti apuy?

Suportaran aya ti 2 Pedro 3:7, 10 (KJ) dayta a panangmatmat? “Ngem ti langlangit ken ti daga, nga adda ita, gapu iti daydi met la a sao naidulinda, a naireserba iti apuy agingga iti aldaw ti pannakaukom ken ti pannakapukaw [“pannakadadael,” RS] dagiti tattao a nadangkes. . . . Ti aldaw ti Apo umayto a kasla mannanakaw iti rabii; a ti langlangit aglabasdanto a buyogen ti dakkel a daranudor, ket dagiti elemento marunawdanto babaen ti napalalo a pudot, ti met daga ken ti ar-aramid nga adda kenkuana mauramdanto [“mauramdanto,” RS, JB; “mapukawdanto,” TEV; “maipanayagdanto,” NAB; “malukasandanto,” NE; “matakuatandanto,” NW].” (Paliiwenyo: Ti Codex Sinaiticus ken Vatican MS 1209, agpada nga idi maika-4 a siglo K.P., “matakuatandanto” ti mabasa. Dagiti naud-udi a manuskrito, ti Codex Alexandrinus iti maika-5 a siglo ken ti maika-16 a siglo a Clementine recension of the Vulgate, “mauramdanto” ti mabasa.)

Ipasimudaag kadi ti Apocalipsis 21:1 (KJ) a madadaelto toy planetatayo? “Ket nakitak ti maysa a langit a baro ken maysa a daga a baro: ta daydi immuna a langit ken daydi immuna a daga napalabasdan; ket ti baybay awanen.”

Tapno umiso daytoy, ti pannakailawlawag dagitoy a bersikulo masapul a maitunosda iti kontexto ken kadagiti sabali a paset ti Biblia

No dagitoy a texto (2 Pedro 3:7, 10 ken Apocalipsis 21:1) kaipapananda a ti literal a planeta a Daga ket mauramto, ngarud dagiti literal a langlangit (dagiti bituen ken dadduma a nailangitan a bambanag) madadaeldanto met babaen iti apuy. Ti kasta a literal a panangmatmat, nupay kasta, maikontra iti ipasigurado dagiti texto a kas ti Mateo 6:10, Salmo 37:29 ken 104:5, kasta pay ti Proverbio 2:21, 22. Mainayon pay, aniat’  epekto ti apuy iti daydiay datin a nakarot’ panagsegseggedna nga init ken ti bitbituen? Gapuna ti termino a “daga” no kadagitoy texto ditoy ngato masapul a sabali a sentido ti kaipapananda.

Idiay Genesis 11:1, Umuna nga Ar-ari 2:1, 2, Umuna a Cronicas 16:31, Salmo 96:1, kdp., ti termino a “daga” ket simboliko ti pannakausarna, a tuktukoyenna ti sangatauan, ti natauan a sosiedad. Di ngata dayta ti kaipapananna idiay 2 Pedro 3:7 ken Apocalipsis 21:1?

Paliiwenyo ta, sigun iti kontexto, idiay 2 Pedro 3:5, 6 (kasta pay ti 2:5, 9), naipada daytoy iti Layus idi aldaw ni Noe, a nakadadaelan ti natauan a sosiedad, ngem ni Noe ken ti pamiliana, agraman ti mismo a globo, ket nataginayon. Kasta met, kunaen ti 2 Pedro 3:7 a dagidiay “tattao a nadangkes” isudat’ madadael. Ti panangmatmat a ti “daga” ditoy ket kayuloganna ti nadangkes a natauan a sosiedad naan-anay a maitunos iti intero a Biblia, kas ipakita dagiti texto a nadakamat ditoy ngato. Dayta simboliko a “daga,” wenno nadangkes a natauan a sosiedad, isunto ti “matakuatan,” kayatna a sawen, lukasanto ni Jehova a kas panangipanayag ti apuy iti amin a panaginsisingpetna, ibutaktakna ti kinadangkes daytoy nakillo a natauan a sosiedad ket ipakitana a maikari dayta iti naan-anay a pannakadadael. Dayta a nadangkes a sosiedad ti tattao isu met daydiay “immuna a daga,” a nadakamat idiay Apocalipsis 21:1 (KJ).

Maitunos itoy, ti ebkas ni Jesus idiay Lucas 21:33 (“ti langit ken daga lumbesdanto, ngem . . .”) masapul a matarusan sigun ti lawag daydiay pumada a saona idiay Lucas 16:17 (“nalaklaka a mapukaw ti langit ken daga ngem . . . ”), nga agpadada nga igunamgunam nga imposible a mapasamak dagiti situasion a naibaga.—Kitaenyo pay ti Mateo 5:18.

Maipalangitto ngata dagiti nalinteg sadanto maisubli ditoy daga kalpasan ti pannakadadael dagiti nadangkes?

Suportaran kadi ti Apocalipsis 21:2, 3 dayta a panangmatmat? Kunana: “Nakitak ti nasantuan a siudad, ti Baro a Jerusalem, a bimmaba manipud langit nga aggapu iti Dios a naisagana a kasla maysa a nobia a naarkosan a maipaay iti nobiona. Ket nangngegko ti maysa a dakkel a timek a naggapu iti trono nga agkunkuna: ‘Adtoy! Ti tabernakulo ti Dios adda kadagiti tattao, ket isu makipagnaedto kadakuada, ket isudanto dagiti tattaona. Ket ti Dios met laeng addanto kadakuada.’” (Gapu  kadi ta ti Diosto ket “adda” kadagiti tattao ken “makipagnaedto kadakuada” ket kaipapananna nga aglasagto a Persona? Di mabalin a kasta, ta kinuna ni Jehova ken Moises: “Awan ti tao a makakita kaniak ket agbiag.” [Ex. 33:20] Maitunos iti dayta, ngarud, dagiti kameng ti Baro a Jerusalem didanto agsubli ditoy daga bilang pisikal a persona. Iti ania a sentido, ngarud, a ti Dios ‘addanto’ iti sangatauan ken kasano a ‘bumaba manipud langit’ ti Baro a Jerusalem? Di pagduaduaan a ti kayuloganna ket masarakan iti Genesis 21:1, a kunaenna a ti Dios “sinarungkaranna” ni Sara, a binendisionanna iti anak idi kabaketna. Ibaga ti Exodo 4:31 kadatayo a ti Dios “sinarungkaranna” ti Israel babaen iti panangibaonna ken Moises bilang manangisalakan. Kunaen ti Lucas 7:16 a babaen iti ministerio ni Jesus “sinarungkaran” ti Dios ti ilina. [Naadaw amin manipud KJ ken RS] Ti dadduma a patarus usarenda ti ebkas a ti Dios ‘inturongna ti atensionna’ iti ilina [NW] wenno ‘impakitana ti pannakaseknanna’ kadakuada [NE]. No kasta ti Apocalipsis 21:2, 3 masapul a kaipapananna a, ti Dios ‘sarungkarannanto,’ wenno addanto iti sangatauan babaen iti nailangitan a Baro a Jerusalem, a baeten iti dayta umapayto dagiti bendision kadagiti natulnog a tattao.)

Prov. 2:21, 22, KJ: “Ti nalinteg agtalinaedto iti daga [“ditoy daga,” NE], ket ti naan-anay [“awan tulawna a tattao,” NE] agtalinaeddanto kenkuana. Ngem dagiti nadangkes magudasdanto ditoy daga, ket dagiti managlabsing maparutdanto kenkuana.” (Paliiwenyo ta dina kunaen a dagiti awan tulawna agsublidanto ditoy daga no di “agtalinaeddanto kenkuana.”)

Namalbaliw ngatan ti orihinal a panggep ti Dios para iti daga?

Gen. 1:27, 28: “Ti Dios pinarsuana ti tao a kaladladawanna, iti ladawan ti Dios pinarsuana; pinarsuana ida a lalaki ken babai. Mainayon pay, ti Dios binendisionanna ida ket ti Dios kinunana kadakuada: ‘Agbungakayo ket agadukayo ket punuenyo ti daga ket agbalinkayo nga appo kenkuana, ket iturayanyo dagiti ikan ti taaw ken dagiti tumatayab iti langlangit ken amin a sibibiag a parsua nga aggaraw iti rabaw ti daga.’” (No kasta impasimudaag ti Dios ti panggepna a toy daga mapno kadagiti annak da Adan ken Eva kas para aywan iti sangalubongan a paraiso. Kalpasan ti nakadaydayag a panangdisenio ti Dios itoy a daga a pagtaengan ti tao, nga inaramidna daytoy a karkarna kadagiti amin a planeta a nabuyan ti tao babaen kadagiti teleskopio ken lugan-law-angna, binaybay-an latta ngatan  ti Namarsua ti panggepna, a tinalikudannan a din matungpal gapu lat’ panagbasol ni Adan?)

Isa. 45:18: “Ta kastoy ti kuna ni Jehova, ti Namarsua iti langlangit, Isu ti pudno a Dios, ti Nangbukel iti daga ken ti Nangaramid iti dayta, Isu Daydiay nangpasingked kenkuana, a dina pinarsua laeng nga ongaong, a binukelna tapno isu ti pagyanan: ‘Siak ni Jehova, ket awan ti sabali.’” (Kitaenyo pay ti Isaias 55:10, 11.)

No awanto a pulos ti matay idiay baro a sistema ti Dios, kasanoda nga umanay amin ditoy daga?

Laglagipenyo ta idi imbaga ti Dios ti panggepna ditoy daga kinunana: “Agbungakayo ket agadukayo ket punuenyo ti daga.” (Gen. 1:28) Ti Dios ti nangted iti tao ti abilidad nga agpaadu, ket no natungpalen ti panggep ti Dios maipapan itoy mabalinna a pasardengenen ti panagpaadu ditoy daga.

Aniada a kita ti tattao ti paraburan ti Dios iti agnanayon a biag ditoy daga?

Sof. 2:3: “Birukenyo ni Jehova, dakayo amin a naemma iti daga, a nagtungpal kadagiti nalinteg a pangngeddengna. Birukenyo ti kinalinteg, birukenyo ti kinaemma. Nalabit a dakayo maitalimengkayto iti aldaw ti pungtot ni Jehova.”

Sal. 37:9, 11: “Dagidiay nga agpannuray ken Jehova tawidendanto ti daga. . . . Dagiti naemma a mismo tawidendanto ti daga, ket maay-ayatandanto iti kinaruay ti talna.”