Purgatoryo

Kahubitan: “Sumala pa sa pagtulon-an sa [Romano Katolikong] Iglesya, ang luna, dapit, o kahimtang sa sunod nga kalibotan . . . diin ang mga kalag niadtong namatay nga anaa sa grasya, apan wala pa makagawas sa tanang pagkadihingpit, maghimog pagbayad alang sa wala mapasaylong benyal nga mga sala o alang sa lumalabay nga silot tungod sa benyal ug mortal nga mga sala nga napasaylo na ug, sa pagbuhat niana, ginaulay sa dili pa sila mosulod sa langit.” (New Catholic Encyclopedia, 1967, Tomo XI, p. 1034) Dili pagtulon-an sa Bibliya.

Gipasukad sa unsa ang pagtulon-an sa purgatoryo?

Human masubli ang ginaingon sa Katolikong mga magsusulat mahitungod sa maong mga teksto sama sa 2 Maccabees 12:39-45, Mateo 12:32, ug 1 Corinto 3:10-15, ang New Catholic Encyclopedia (1967, Tomo XI, p. 1034) nagaila: “Sa ultimang analisis, ang Katolikong doktrina bahin sa purgatoryo gipasukad sa tradisyon, dili sa Sagradong Kasulatan.”

“Ang iglesya misalig sa tradisyon sa pagsuportar ug tungatungang luna tali sa langit ug impiyerno.”—U.S. Catholic, Marso 1981, p. 7.

Mahitungod sa kahimtang sa purgatoryo, unsa ang gisulti sa Katolikong mga tigpamaba?

“Daghan ang naghunahuna nga ang bug-os nga pag-antos sa purgatoryo gipakasama sa pag-alinggat sa temporaryong pag-oktaba sa mahimayaong panan-awon, bisan tuod ang mas komun nga pangisip nag-ingon nga, dugang pa niini, adunay pila ka positibong silot . . . Diha sa Latin nga Iglesya sagad gikaingon nga kining maong kasakit ipahamtang pinaagig tinuod nga kalayo. Dili mao kini, bisan pa niana, hinungdanon sa pagtuo diha sa purgatoryo. Dili gani kini tino. . . . Bisan pa kon magapili ang usa, uban sa mga teologo sa Sidlakan, sa pagsalikway sa ideya sa pag-antos nga gipahinabo sa kalayo, kinahanglang magbantay ang usa nga dili isalindot ang tanang madapaton nga pag-antos gikan sa purgatoryo. Aduna gihapoy tinuod nga kasakit, kaguol, kahiubos, kaulaw sa tanlag, ug ubang espirituwal nga mga kagul-anan nga takos makahimog tinuod nga kasakit sa kalag. . . . Kinahanglang hinumdoman sa usa, bisan pa, nga diha sa taliwala sa ilang mga pag-antos kining mga kalaga makatagamtam usab ug dakong kalipay tungod sa pagkaseguro sa kaluwasan.”—New Catholic Encyclopedia (1967), Tomo XI, pp. 1036, 1037.

 “Kon unsa ang kahimtang didto sa purgatoryo maoy tag-an-tag-an nga iya kang bisan kinsa.”—U.S. Catholic, Marso 1981, p. 9.

Ang kalag ba buhi sa pagkamatay sa lawas?

Ezek. 18:4, Dy: “Ang kalag [Hebreo, neʹphesh; “tawo,” JB; “usa,” NAB; “kalag,” Kx] nga nagapakasala, siya mismo mamatay.”

Sant. 5:20, JB: “Bisan kinsa nga makapabalik sa usa ka makasasala gikan sa daotang dalan nga iyang gisubay magaluwas ug usa ka kalag gikan sa kamatayon ug nagatabon ug daghang mga sala.” (Italiko gidugang.) (Matikdi nga kini nagahisgot sa kamatayon sa kalag.)

Para sa dugang mga detalye, tan-awang mga ulohang “Kamatayon” ug “Kalag.”

Ang dugang silot ba tungod sa sala ipahamtang human sa kamatayon sa usa?

Roma 6:7, NAB: “Ang tawo nga patay na nakagawas na gikan sa sala.” (Kx: “Ang sala dili na makaangkon sa usa ka tawo kinsa patay na.”)

Ang mga patay ba makahimo sa pagtagamtam ug kalipay tungod sa pagsalig diha sa kalaoman sa kaluwasan?

Eccl. 9:5, JB: “Ang mga buhi nahibalo sa labing menos nga sila mamatay, ang mga minatay walay kahibalo.”

Isa. 38:18, JB: “Ang Sheol dili magadayeg kanimo [Yahweh], ang kamatayon dili magpasidungog kanimo; sila nga manaog sa gahong dili magpadayon sa pagsalig diha sa imong pagkamatinumanon.” (Busa sa unsang paagi ang bisan kinsa kanila “makatagamtam ug dakong kalipay tungod sa pagkaseguro sa kaluwasan”?)

Sumala sa Bibliya, sa unsang paagi malampos ang pagkaputli (pagkahinlo) gikan sa mga sala?

1 Juan 1:7, 9, JB: “Kon kita magakinabuhi sa atong kinabuhi diha sa kahayag, maingon nga siya [Diyos] anaa sa kahayag, kita nahiusa sa usag usa, ug ang dugo ni Jesus, nga iyang Anak, nagahinlo kanato gikan sa tanang sala. . . . Kon atong ginaila ang atong mga sala, nan ang Diyos kinsa matinumanon ug matarong  magapasaylo sa atong mga sala ug magahinlo kanato gikan sa tanan nga daotan [“tanan natong kasal-anan giwagtang,” Kx].”

Pin. 1:5, JB: “Si Jesu-Kristo . . . nahigugma kanato ug naghugas sa atong mga sala pinaagi sa iyang dugo.”