Kasano a ti ipapatay ni Jesu-Kristo ket naigidiat iti ipapatay dagidiay nagbalin a martir?

Ni Jesus ket perpekto idi a tao. Isut’ naiyanak nga awanan tulaw ti basol ket tinaginayonna dayta a kinaperpektona iti unos ti panagbiagna. “Isu saan a nagaramid iti basol.” Isut’ “di natulawan, adayo kadagiti managbasol.”—1 Ped. 2:22; Heb. 7:26.

Isu idi ti naisalsalumina nga Anak ti Dios. Ti Dios a mismo ti nangpaneknek iti daytoy babaen ti panagsaona manipud langit. (Mat. 3:17; 17:5) Daytoy nga Anak datin nga agnanaed idiay langit; baeten kenkuana pinaadda ti Dios amin a sabsabali a naparsua a persona ken bambanag iti intero nga uniberso. Tapno matungpal ti pagayatan ti Dios, simimilagro nga inyalisna ti biag daytoy nga Anak idiay aanakan ti maysa a birhen tapno isu ket maiyanak kas tao. Tapno maigunamgunam ti panagbalinna a tao, tinukoy ni Jesus ti bagina a kas Anak ti tao.—Col. 1:15-20; Juan 1:14; Luc. 5:24.

Isu saan a kasla awan gawgawayna iti saklang dagidi namapatay kenkuana. Kinunana: “Itedko ti biagko . . . Awan ti mangikkat kaniak, no di ket iyawatko a sisiak.” (Juan 10:17, 18) Nagkitakit a mangayab iti buyot dagiti anghel tapno isuda koma ti mangikaluya kenkuana. (Mat. 26:53, 54) Nupay napalubosan dagiti nadangkes a tattao a mangitungpal iti gakatda a mangpapatay kenkuana, talaga a panagsakripisio ti ipapatayna.

Adda pateg ti naibukbok a darana a mangipaay iti pannakaisalakan. “Toy Anak ti tao saan nga immay tapno pagserbian,  no di ket tapno agserbi ken tapno itedna ti kararuana a subbot a maisandi kadagiti adu.” (Mar. 10:45) Ti ngarud ipapatayna napatpateg ngem ti ipapatay ti maysa a martir a maigapu iti panagkitakitna a mangikompromiso iti pammatina.

Kitaenyo met ti panid 323, iti paulo a “Panglaglagip.”

Apay a ti subbot ket nesesita a kasdiay ti pannakaipaayna tapno magun-odantayo ti agnanayon a biag?

Roma 5:12: “No kasano ti iseserrek ti basol ditoy lubong gapu iti maymaysa a tao [a ni Adan] ken ti ipapatay gapu iti basol, ket iti kasta ti ipapatay immay kadagiti isuamin a tattao agsipud ta isuda nagbasolda amin.” (Uray pay no kasanot’ kinalinteg ti panagbiagtayo, managbasoltay amin manipud pannakayanaktayo. [Sal. 51:5] Ditay pulos mabalin nga uluen ti kalintegantayo nga agbiag nga agnanayon.)

Roma 6:23: “Dagiti supapak ti basol isu ni patay.”

Sal. 49:6-9: “Dagiti agtalek iti kinabaknangda, ket pagpasindayagda ti kaadu ti sanikuada, awan kadakuada ti makabalin babaen iti aniaman a pamuspusan a manubbot iti kabsatna, ken mangted man iti Dios ti supapakna; (ta ti pannakasubbot ti kararuada nangina ket nagsardengen agingga iti panawen a di nakedngan) tapno agbiag koma laeng nga agnanayon ket dina koma makita ti abut.” (Awan imperpekto a tao a maipamuspusanna nga aonen ti siasinoman manipud basol ken ipapatay. Ti kuartana dina magatang ti biag nga agnanayon, ket ti kararuana a maipusay ken patay, a kas supapakto met laeng ti basolna, awan pategna a mangaon iti siasinoman.)

Apay a di latta koman inkeddeng ti Dios, a nupay masapul a matay da Adan ken Eva gaput’ yaalsada, amin koma nga annakda nga agtulnog iti Dios agbiagda koma nga agnanayon?

Ngamin ta ni Jehova “ayatenna ti kinalinteg ken kinahustisia.” (Sal. 33:5; Deut. 32:4; Jer. 9:24) Gapuna, ti panangtratarna iti situasion isut’ nangitandudo iti kinalintegna, nasupusopan dagiti kalikagum ti naan-anay a kinahustisia ken, maigiddato met, naitan-ok ti ayat ken asina. Kasano a kasta?

(1) Da Adan ken Eva awan annakda sakbay ti panagbasolda, no kasta awan ti naiyanakda a perpekto. Amin nga annak ni Adan naiyanakda a sibabasol, ket ti basol agturong ken patay. No di latta koman inkankano ni Jehova daytoy, tinalikudanna koman ti mismo a nalinteg nga estandartena. Di mabalin nga  aramiden ti Dios ti kasta di la ket ta isu kumanunong iti kinakillo. Dina linaktawan dagiti alagaden ti naan-anay a kinahustisia; gapuna awan intelihente a parsuana a nainkalintegan a mangpabasol kenkuana iti daytoy.—Roma 3:21-26.

(2) Tapno di mabaybay-an dagiti alagaden ti kinahustisia, kasano a maited ti probision tapno maaon dagiti annak ni Adan a mayat a mangpaneknek iti naayat a kinatulnogda ken Jehova? No adda perpekto a tao a matay kas daton, ti kinahustisia ipalubosna a ti perpekto a biag kalubanna ti basbasol dagidiay sipapati a mangakseptar iti dayta a probision. Yantangay ti basol ti maymaysa a tao (a ni Adan) isut’ nakaigapuanan ti panagbasol ti intero a natauan a pamilia, ti naibukbok a dara ti sabali a perpekto a tao (bale, ti maikadua nga Adan) a katupagna iti kinapateg, mabalinna a balansien dagiti timbangan ti kinahustisia. Yantangay ni Adan ket sipapakinakem a nagbasol, awan benepisio a magun-odna; ngem yantangay ti dusa a masapul koma a bayadan ti amin a tattao gaput’ panagbasolda isut’ bayadan ti sabali babaen iti daytoy a wagas, dagiti annak ni Adan maispalda. Ngem awan met idi ti kasta a perpekto a tao. Ti sangatauan dina pulos maalagad dagita a kalikagum ti naan-anay a kinahustisia. Gapuna, ni Jehova a mismo, kas ebkas ti karkarna nga ayatna ken iti napalalo a personal a panagsagabana, intedna dayta a probision. (1 Cor. 15:45; 1 Tim. 2:5, 6; Juan 3:16; Roma 5:8) Ti bugbugtong nga Anak ti Dios situtulok met a mangibaklay iti pasetna. Pinanawanna a sipapakumbaba ti nailangitan a dayagna ket nagbalin a perpekto a tao, ket ni Jesus natay para iti sangatauan.—Fil. 2:7, 8.

Pangarigan: Adda ulo ti pamilia a nagbalin a kriminal ket nasentensiaan a matay. Pumanglaw dagiti annakna, ket naigalutdan iti utang. Nalabit ti naasi a loloda ket makibiang para iti pagsayaatanda, a mangipaay iti probision baeten iti anakna a kabbalayna tapno bayadanna ti utangda ket maluktan ti posibilidad ti baro a panagbiag para kadakuada. Ngem, tapno magunggonaanda, masapul nga akseptaren dagita nga ubbing dayta nga urnos, ket ti loloda nainkalintegan a kiddawenna ti bambanag a mangipasigurado a dagita nga ubbing ket dida tultuladen ti aramid ni tatangda.

Siasinoda ti immuna a nakaiyaplikaran ti pateg ti daton ni Jesus, ket ania ti gagarana dayta?

Roma 1:16: “Ti naimbag a damag [maipapan ken Jesu-Kristo ken ti pasetna sigun iti panggep ni Jehova] . . . isu, kinapudnona, ti pannakabalin ti Dios a maipaay iti pannakaisalakan ti  tunggal maysa a mamati, umuna iti Judio ken iti met Griego.” (Ti awis tapno magunggonaan iti dayta probision ti pannakaisalakan baeten ken Kristo ket naited nga immuna kadagiti Judio, santo dagiti di Judio.)

Efe. 1:11-14: “Iti pannakaitimpuyogtayo [ken Kristo] datayo [a Judio, agraman ken apostol Pablo] natudingantay kas agtawid [Agtawid iti ania? Iti nailangitan a Pagarian] . . . tapno datayo maipaaytay koma a pakaidayawan ti dayagna, datayo nga immuna a nanginanama ken Kristo. Ngem dakayo met [a Kristiano a naggapu kadagiti Gentil a nasion, ta adu dagiti taga Efeso a kasta] nanginanamakayo kenkuana kalpasan a nangngegyo ti sao ti kinapudno, ti naimbag a damag maipapan iti pannakaisalakanyo. Babaen met kenkuana, kalpasan a namatikayo, namarkaankayo iti naikari a nasantuan nga espiritu, isu a nasapsapa a tanda ti tawidtayo, a maipaay ti pannakaluk-at babaen iti subbot, ti sanikua a mismo ti Dios, a maipaay iti nadayag a dayawna.” (Dayta a tawid, kas naipakita idiay 1 Pedro 1:4, naireserban idiay langit. Ipasimudaag ti Apocalipsis 14:1-4 nga agdagup iti 144,000 dagiti makiraman dita. Kaduada ni Kristo, agserbidanto kas ar-ari ken papadi iti sangatauan iti unos ti 1,000 a tawen, nga iti dayta matungpalton ti panggep ti Dios a ti daga agbalin a paraiso a pagtaengan dagiti perpekto nga annak ti immuna a pagassawaan.)

Siasinoda pay itatta ti agsagsagrap iti pagimbagan manipud daton ni Jesus?

1 Juan 2:2: “Isu [ni Jesu-Kristo] ti daton ti kappia gapu iti basbasoltayo [basbasol da apostol Juan ken dadduma pay a Kristiano a napulotan iti espiritu], ket saan laeng a gapu iti basbasoltayo no di pay ket gapu iti isuamin a lubong [ti dadduma a tattao, kadagidiay a ti namnamada para iti biag nga agnanayon ditoy daga ket agbalin a posible].”

Juan 10:16: “Adda met sabsabali a karnerok, a saanda a naitipon itoy a pagtaraknan; dagidiay masapul nga iyegko, ket denggendanto ti timekko, ket agbalindanto a maymaysa nga arban, maymaysa a pastor.” (Dagitoy a “sabsabali a karnero” salinongan ida ti naayat a panangtaripato ni Jesu-Kristo bayat a ti natda iti “bassit nga ipastoran” dagiti agtawid ti Pagarian ket addada pay laeng ditoy daga; iti kasta ti “sabsabali a karnero” naitimpuyogda kadagiti agtawid ti Pagarian a kas paset ti “maymaysa nga arban.” Tagiragsakenda amin dagiti adu nga agpapada a pagimbaganda manipud daton ni Jesus, isuna laeng ta saan a namimpinsan nga agpapareho ti pagimbaganda, yantangay nagduduma ti pagturongandanto.)

 Apoc. 7:9, 14: “Kalpasan dagitoy kimmitaak, ket, adtoy! ti dakkel nga umariwekwek, nga awan tao a makabalin a bumilang, a naggapuda iti isuamin a nasnasion ken tribo ken il-ili ken dildila . . . ‘Dagitoy isuda dagiti naggapu iti dakkel a rigat, ket binugguanda dagiti pagan-anayda ket pinapudawda ida iti dara ti Kordero.’” (No kasta, dagiti kameng daytoy a dakkel nga umariwekwek agbibiagdanto no mangrugi ti dakkel a rigat ket nadalus ti takderda iti saklang ti Dios gaput’ panangalagaddat’ pammati iti subbot. Ti kinalinteg a naikuenta kadakuada kas resulta daytoy ket supisienten a mangilasat kadakuada ditoy daga bayat ti dakkel a rigat.)

Aniada a masanguanan a bendision ti matagiragsakto a kas resulta ti subbot?

Apoc. 5:9, 10: “Ikankantada ti maysa a kanta a baro, a kunkunada: ‘Maikarika [ti Kordero, ni Jesu-Kristo] a mangala iti libro ken manglukat kadagiti seliona, ta napapatayka idi ket nagatangmo a maipaay iti Dios babaen ti daram dagiti tattao ti amin a tribo ken dila ken ili ken nasion, ket pinagbalinmo ida a maipaay iti Diostayo a pagarian ken papadi, ket agturaydanto a kas ar-ari iti rabaw ti daga.’” (Ti subbot linuktanna ti dana nga agturong iti nailangitan a biag para kadagidiay agturayto a kas ar-ari a kadua ni Kristo. Din agbayag amin nga agtuturay iti baro a gobierno ti Daga addadanton kadagiti nailangitan a tronoda.)

Apoc. 7:9, 10: “Adtoy! ti dakkel nga umariwekwek, nga awan tao a makabalin a bumilang, a naggapuda iti isuamin a nasnasion ken tribo ken il-ili ken dildila, nga agtaktakderda iti sanguanan di trono ken iti sanguanan daydi Kordero [a ni Jesu-Kristo, a natay a kas naidaton a kordero], a nagkawesda kadagiti pagan-anay a puraw; ket adda palpalma iti im-imada. Ket agpukpukkawda iti dakkel a timek, a kunkunada: ‘Ti pannakaisalakan nagtaud iti Diostayo, nga agtugtugaw iti trono, ken iti Kordero.’” (Ti panamati iti daton ni Kristo nasken unay tapno makalasat daytoy a dakkel nga umariwekwek iti dayta dakkel a rigat.)

Apoc. 22:1, 2: “Ket impakitana kaniak ti maysa a karayan ti danum ti biag, a sumilsilap a kas kristal, nga agayos manipud iti trono ti Dios ken iti Kordero a bumaba iti tengnga ti kalsada sadiay. Ket iti agsumbangir nga igid daydi karayan adda dagiti kayo ti biag nga adda sangapulo ket dua a kita ti bungada, nga agbungada iti binulan. Ket ti bulbulong dagidi a kayo maipaayda iti pannakaagas ti nasnasion.” (Gapuna ti pannakaipakat ti  pateg ti daton ti Kordero ti Dios, a ni Jesu-Kristo, nasken a paset ti probision ti Dios a pangagas iti sangatauan kadagiti amin nga epekto ti basol ken kabaelandanton a tagiragsaken ti biag nga agnanayon.)

Roma 8:21: “Ti met laeng sangaparsuaan [ti sangatauan] maluk-atanto iti pannakaadipen ti panagrupsa ket maaddaanda iti nadayag a wayawaya dagiti annak ti Dios.”

Aniat’ kasapulan tapno magun-od ti agnanayon a pagimbagan manipud perpekto a daton ni Jesus?

Juan 3:36: “Ti mangalagad ti pammati iti Anak adda biagna nga agnanayon; ti sumukir iti Anak saannanto a makita ti biag, no di ket ti pungtot ti Dios agtaeng kenkuana.”

Heb. 5:9: “Idinto a [ni Jesu-Kristo] naaramid nga awan pagkuranganna nagbalin nga isu ti nakin-aramid ti agnanayon a pannakaisalakan kadagiti isuamin nga agtulnog kenkuana.”

Ti probision a pangsubbot ipalgakna ti ania no maipapan iti rikna ti Dios a maipaay iti sangatauan?

1 Juan 4:9, 10: “Daytoy ti nakaiparangarangan ti ayat ti Dios kadatayo, nga imbaon ti Dios ti Anakna a bugbugtong ditoy lubong tapno agbiagtayo gapu kenkuana. Ket daytoy ti ayat, saan a gapu ta ayatentayo ti Dios, no di ket gapu ta isu inayatnatayo ket imbaonna ti Anakna a daton a subbot iti basbasoltayo.”

Roma 5:7, 8: “Ta narasay ti mayat a matay a maipuon iti maysa a nalinteg; kinapudnona, adda ngata makaitured a matay gapu iti maysa a tao a naimbag. Ngem ti Dios ipatalgedna ti ayatna kadatayo, agsipud ta idinto a managbasoltayo, ni Kristo natay gapu kadatayo.”

Aniat’ epekto daytoy a probision iti wagas a panangusartayo kadagiti biagtayo?

1 Ped. 2:24: “Isu met laeng inawitna ti basbasoltayo iti bagina idiay kayo, tapno nataytayon iti basbasol ket agbiagtayon iti kinalinteg.” (Gapu kadagiti amin nga inaramid ni Jehova ken ti Anakna tapno maugasan ti basoltayo, ikagumaantay koma a siaanep a parmeken dagiti managbasol a pagannayasantayo. Saantay koma a pulos a mapanunot ti sipapakinakem nga intay panagaramid ti banag nga ammotayo a kas basol!)

Tito 2:13, 14: “Ni Jesu-Kristo . . . inyawatna ti bagina gapu  kadatayo tapno subbotennatay iti amin a kinadakes ken manggugor a maipaay kenkuana met laeng ti maysa nga ili a kukuana, a naregta iti naimbag nga ar-aramid.” (No apresiarentayo daytoy karkarna a probision matignaytay koma a sireregta a rumaman kadagiti aramid nga intuding ni Kristo kadagiti pudno a pasurotna.)

2 Cor. 5:14, 15: “Ti ayat ni Kristo pilitennakami, idinto nga ipatomi a kastoy, a ti maysa a tao natay gapu kadagiti isuamin; no kasta, ngarud, dagiti isuamin addada idi a natay; ket isu natay gapu kadagiti isuamin tapno dagiti agbiag saanda nga agbiagen a maipaay kadakuada, no di maipaay iti daydi natay ken nagungar gapu kadakuada.”