Isursuro kadi ti Biblia a ti panagdinna ket basol?

Gen. 1:28: “Ti Dios binendisionanna ida [da Adan ken Eva] ket ti Dios kinunana kadakuada: ‘Agbungakayo ket agadukayo ket punnuenyo ti daga.’” (Tapno matungpalda daytoy a nadiosan a bilin masapul nga agdinnada, di ngamin? Ti panagdinnada saandanto a pakabasolan no di ket maitunos iti panggep ti Dios a mangpunno iti daga. Adut’ mangipapan a ti ‘naiparit a bunga’ idiay Eden ket nalabit simboliko a panangtukoy iti nadibinuan a panangikedked wenno panangiparit iti panagdinna no iti paset da Adan ken Eva. Ngem dayta maikontra iti imbilin ti Dios a naadaw ditoy ngato. Maikontra met dayta iti pasamak a, nupay nangan da Adan ken Eva iti naiparit a bunga idiay Eden, ti immuna a pannakadakamat ti panagdinnada ket kalpasan laeng iti pannakaparuarda manipud sadiay.—Gen. 2:17; 3:17, 23; 4:1.)

Gen. 9:1: “Binendisionan ti Dios ni Noe ken dagiti annakna a lallaki ket kinunana kadakuada: ‘Agbungakayo ket agadukayo ket punuenyo ti daga.’” (Daytoy a kanayonan a bendision, agraman ti pannakaulit ti bilin a panagpaadu, naited kalpasan daydi sangalubongan a layus idi aldaw ni Noe. Ti panangmatmat ti Dios iti nainkalintegan a panagdinna saan a nagbalbaliw.)

1 Cor. 7:2-5: “Gapu iti panagraira ti pannakiabig, tunggal lalaki adda koma asawana ket tunggal babai adda koma asawana. Ited koma ti lalaki iti asawana ti annongna; ket kasta met ti babai ken asawana. . . . Saankay nga agpipinnaidam iti maysa ken maysa, malaksid no nagnumuanyo nga agpadpada agpaay iti naituding a tiempo, . . . di la ket ta sulisogennakayo ni Satanas gapu iti dikay panagdinna.” (Ti pannakiabig isut’ nailawlawag a dakes, saan ket a daydiay maitutop a panagdinna ti lalaki ken ti asawana.)

Dakes kadi ti panagdinna sakbay ti panagkasar?

1 Tes. 4:3-8: “Daytoy ti pagayatan ti Dios . . . nga idianyo koma ti pannakiabig; a tunggal maysa kadakayo ammona koma a salimetmetan ti asawana met laeng a mabuyogan iti kinasanto ken dayaw, saan nga iti tarigagay ti derrep a kasla  iti nasnasion a dida ammo ti Dios; nga awan koma ti agranggas ken mangallilaw iti kabsatna itoy a banag, ta ni Jehova isu ti bumales iti maipapan kadagitoy amin a banag, a kas met impakpakauna ken pinaneknekanmin kadakayo. Ta saannatayo nga inayaban ti Dios a maipaay iti kinarugit, no di iti kinasanto. Gapuna, daydiay sumukir saan a tao ti paidenna, no di ket ti Dios, isu a mangted kadakayo ti nasantuan nga espirituna.” (Ti Griego a sao a por·neiʹa, a naipatarus kas “pannakiabig,” tukoyenna ti panagdinna dagiti di pay nagkasar a tattao, kasta met iti pannakidinna ti kasado iti dina nga asawa.)

Efe. 5:5: “Awan mannakiabig wenno tao a narugit wenno naagum—isu a panagrukbab iti didiosen—nga adda tawidna iti pagarian ni Kristo ken ti Dios.” (Dina kaipapanan daytoy a siasinoman iti napalabas ket mannakiabig dinan tagiragsaken dagiti bendision ti Pagarian ti Dios, isuna laeng ta masapul nga isardengna ti kasta a kabibiagna tapno magun-odna ti anamong ti Dios. Kitaenyo ti 1 Corinto 6:9-11.)

Anamongan kadi ti Biblia ti panagkabbalay kas agassawa uray no awan legal a panagkasar dagita?

Kitaenyo ti panid 283-285, iti paulo a “Panagasawa.”

 Aniat’ kunaen ti Biblia maipapan iti homosexualidad?

Roma 1:24-27: “Ti Dios binaybay-anna ida iti derderrep ti puspusoda nga agturong iti kinarugit, tapno maibabain koma ti bagbagida kadakuada met laeng . . . Ti Dios binaybay-anna ida iti derderrep a nakababain, ta uray dagiti babbai nga adda kadakuada sinuktanda ti nakaparsuaan a pannakaaramatda iti maisalungasing iti nakaparsuaan; ket kasta met dagiti lallaki binaybay-anda ti nakaparsuaan dagiti babbai ket simgedda iti maysa ken maysa kadakuada, nga inaramidda ti nakarugrugit a pamay-an a lallaki ken lallaki, ket inawatda iti bagbagida met laeng ti maikari a gunggona ti pannakaallilawda.”

1 Tim. 1:9-11: “Ti linteg saan a nabangon a maipaay iti nalinteg, no di ket maipaay kadagiti nasukir ken managsalungasing, kadagiti nakillo ken kadagiti managbasol, . . . kadagiti mannakiabig, dagiti lallaki a makidinna kadagiti lallaki . . . ken uray ania a sabali a maisalungasing iti nasayaat a sursuro kas mayannurot iti nadayag a naimbag a damag ti naragsak a Dios.” (Idiligyo ti Levitico 20:13.)

Jud. 7: “Ti Sodoma ken Gomorra ken dagiti siudad iti kaparangetda,  idinto . . . a simmurotda iti naisangsangayan a lasag, a maikabilda a kas pagwadan nga aglaklak-am iti dusa ti apuy nga agnanayon.” (Ti nagan a Sodoma isut’ nakaibatayan ti sao a “sodomia,” nga isut’ pangnaganda iti maysa nga aramid dagiti homosexual. Idiligyo ti Genesis 19:4, 5, 24, 25.)

Ania ti panangmatmat dagiti pudno a Kristiano kadagidiay dati a homosexual?

1 Cor. 6:9-11: “Uray dagiti mannakiabig, uray dagiti agrukbab iti ladladawan, uray dagiti mannakikamalala, uray dagiti lallaki a maar-aramat iti di nainkasigudan a pangpanggep, uray dagiti lallaki a makidinna kadagiti lallaki . . . saandanto a tawiden ti pagarian ti Dios. Ket kakastada idi dagiti dadduma kadakayo. Ngem nadalusankayo, ngem napagsantokayo, ngem napalintegkayo babaen iti nagan ni Apo Jesu-Kristo ken iti espiritu ti Diostayo.” (Uray pay no kastat’ naglikudanda, no ita ket pagpanawandan ti dati a narugit nga ar-aramidda, nga ipakatda dagiti nalinteg nga estandarte ni Jehova, ket alagadenda ti pammati iti probision para iti pannakapakawan ti basbasol baeten ken Kristo, mabalinda a tagiragsaken ti nadalus a takderda iti saklang ti Dios. Kalpasan ti panagbalbaliwda, sibabaranto met nga awaten ida dagiti padada a Kristiano.)

Pagaammo dagiti pudno a Kristiano nga uray dagiti naigamer a dakes a tarigagay, agraman dagidiay tinawidtayo wenno dagidiay maigapu iti pisikal wenno ti nanglikmot kadatayo a kasasaad, mabalin nga iwaksi no kayattay a talaga nga ay-aywen ni Jehova. Dagiti dadduma talaga a managpudpudotda. Nalabit iti napalabas nabuslon ti panangipeksada iti panagpungpungtotda; ngem ti pannakaammoda iti pagayatan ti Dios, ti tarigagayda a mangay-ayo kenkuana ken ti tulong ti espirituna isut’ nangpatanor iti panagteppelda. Mabalin nga alkoholiko ti maysa a tao, ngem, buyogen ti umiso a motibo, maisardengna ti panaginumna ket iti kasta maliklikanna ti agbalin a mammartek. Kasta met, a ti maysa a tao mabalin a maatrakar kadagiti kapadana a sekso, ngem no ipangagna ti pammalakad ti Sao ti Dios isu mabalinna a liklikan dagiti homosexual nga aramid. (Kitaenyo ti Efeso 4:17-24.) Saan nga ipalubos ni Jehova nga ipapantayo nga awan balbalena uray no dakes ti kababalintayo; isu siaasi ngem sieestrikto a pakdaarannatayo kadagiti pagdaksantayo ket mangipaay ti nawadwad a tulong para kadagidiay mayat a ‘manguksob iti daan a kinatao agraman ar-aramidna, ket ikawesda ti baro a kinatao.”—Col. 3:9, 10.

 Ti panangmatmat ti Biblia maipapan iti sekso kadaanan kadi ken naestrikto unay?

1 Tes. 4:3-8: “Daytoy ti pagayatan ti Dios . . . nga idianyo koma ti pannakiabig . . . Gapuna, daydiay sumukir saan a tao ti paidenna, no di ket ti Dios, isu a mangted kadakayo ti nasantuan nga espirituna.” (Ti panangmatmat ti Biblia maipapan iti sekso saan a maysa la a banag a pinutar ti tattao a nagbibiag idi unana a tiempo. Nagtaud dayta manipud iti Namarsua ti tao; ibatadna no aniat’ kalikagumanna tapno magun-od ti anamongna; mangipaay met kadagiti giya a mamagbalin kadagiti pamilia a nasimpa ken kadagiti makaay-ayo, naragsak a relasion iti ruar ti pamilia. Dagidiay mangiyaplikar itoy a balakad masaluadanda manipud kadagiti nakaro nga emosional a saem ken dagiti makarumen a sakit a maikanunong iti imoral a kababalin. Ti pammalakad ti Biblia naintiempuan unay tapno maaywanan dagiti kasapulan dagidiay agtarigagay a maaddaan iti nadalus a konsiensia iti imatang ti Dios ken maaddaanda iti biag a siwayawaya manipud kadagiti leddaang.)

‘Aniat’ panangmatmatyo iti homosexualidad?’

Kunaenyo: ‘Alaenmi ti panangmatmat nga adda ditoy Biblia. Mamatiak a ti kunaen ti Biblia napatpateg ngem ti opinion ti tao, gapu ta kapanunotan ti Namarsua iti tao ti ipaayna. (1 Cor. 6:9-11) Mapaliiwyo a sumagmamano kadagitoy a Kristiano ket datida a mangal-alagad iti homosexualidad. Ngem gapu iti ayatda iti Dios, ken buyogen iti tulong ti espiritu, nagbalbaliwda.’

Wenno: ‘Kas sungbatko, kunaek a nadlawko a dagidiay mangipapan nga awan pagdaksanna ti homosexual a kabibiag ket dida patien a ti Biblia isut’ Sao ti Dios. Imtuodek man no kasanot’ panangmatmatyo iti Biblia?’ No kunaenna nga isu ket mamati iti Biblia, inayonyo: ‘Saan a kabbaro nga isyu ti homosexualidad. Ti Biblia ilanadna a sibabatad dagiti di agbalbaliw a panangmatmat ni Jehova a Dios. (Nalabit usarenyo ti material idiay  panid 393, 394.)’ No isu ket agduadua iti kaadda ti Dios wenno iti kinapudno ti Biblia, inayonyo: ‘No awan ti Dios, nalawag nga awan mangsingir kadatayo ket ngarud mabalintay a suroten ti kaykayattayo. Ti ngarud maitutop a saludsod isu daytoy, Adda kadi maysa a Dios ket utangko kadi  kenkuana ti kaaddak [kasta met, Impaltiing kadi ti Dios ti Biblia]? (Sayonto usaren ti idea idiay panid 113-119 wenno 69-78.)’