Ua ia te Oe le Aiā Tatau e Filifili Ai

O se auala fou faafoma‘i mo togafitiga lea (e ta‘ua o iloiloga o lamatiaga ma aogā) ua faafaigofie ai mo foma‘i ma gasegase ona galulue faatasi e ‘alo‘alo ese mai i togafitiga e faaaogā ai le toto. Ua fefuafuatai e foma‘i vala eseese e pei o lamatiaga e alia‘i mai ona o se fualaau po o se taotoga, atoa foi ma aogā e ono maua mai ai. E mafai foi e gasegase ona faia lena iloiloga.

Se‘i o tatou faaaogaina se faaaoaoga se tasi e masani ona talanoa i ai le toatele o tagata i le tele o nofoaga—o se ma‘i o le fuafuamomono (tonsillitis). Afai o loo e aafia i lenei faafitauli, e lē taumate o le a e alu i se foma‘i. O le mea moni, atonu e te asiasi i ni foma‘i se toalua, talu ai e masani ona fautuaina e tagata atamamai tau i le soifua mālōlōina le lelei ona maua foi o le manatu o se isi foma‘i. O le isi atonu na te fautua maia se taotoga. Na te otooto atu le uiga o lena mea: le umi e nofo ai i le falema‘i, le tele o le tiga, ma le totogi. E tusa ai ma lamatiaga, e faapea mai a ia o le matuiā o le alu o le toto e lē taatele ma e seāseā lava  maliu se isi mai lena taotoga. Peitai, o le foma‘i na te avatua le manatu lona lua o le a na uunaia oe ina ia faia togafitiga e inu ai fualaau e tetee ai le siama (antibiotics). Na te faamatala atu ituaiga o vailaau e ono aogā i ai, ma le tupe e alu ai. Ae tusa ai ma lamatiaga, fai mai a ia, e na o ni nai gasegase lava e oo i ai uiga e faamata‘uina ai le ola ona o fualaau.

E foliga mai na iloiloina e foma‘i agavaa, lamatiaga ma aogā, a o le taimi la lenei, e tatau ona e fuafuaina lamatiaga ma aogā e mafai ona maua, atoa foi ma isi mea moni ua e iloa lelei. (O loo e i le tulaga e sili ona lelei e fuafua ai itu e pei o ou faalogona ootia po o le malosi faaleagaga, tulaga tau tupe a le aiga, aafiaga i le aiga, ma amioga e te manatu e tatau.) Ona fai loa lea o lau filifiliga. E lē taumate o le a e talia le isi togafitiga, a e teena le isi.

O le a faapea foi la pe afai e maua lau tamaitiiti i le ma‘i o le fuafuamomono. O lamatiaga, o aogā, ma togafitiga, o le a otooto atu lava i a oulua, o mātua alolofa o ē o loo sili ona aafia totino ma o ē foi o le a amoina le avega tauave e tusa ma iuga e oo i ai. A uma ona manatunatu i itu uma ia, ona mafai lea ona fai la oulua filifiliga, e faavae a‘e i le iloa e tusa ai ma lenei mataupu ua aafia ai le soifua mālōlōina o si o oulua alo e oo lava i lona ola. Atonu lua te malilie i le taotoga, ma ona lamatiaga. O isi mātua atonu e filifilia antibiotics faatasi ma lamatiaga o le a alia‘e mai ai. E pei ona eseese manatu o foma‘i i a latou fautuaga, e faapena foi ona eseese manatu o gasegase po o mātua e tusa ma mea latou te manatu i ai e sili ona lelei. E faapena la se vala manino o le faia o filifiliga poto (i lamatiaga ma aogā).

Ae ā le faaaogaina o le toto? E leai se tasi na te iloiloina toto‘a le mea moni na te faafitia le faapea mai, o tuigā toto e aafia ai se lamatiaga tele. O Dr. Charles Huggins, o le faatonu o le galuega tau tuigā toto i le falema‘i tele i Massachusetts na faamaninoina mai lenei mea e faapea: “Ua sili atu nei ona malupuipuia le toto nai lo le mea sa iai muamua. Peitai, e ao ona manatu i ai, e iai ni tulaga lē maalofia e ono lē malupuipuia ai. O se mea sili lea ona matautia ua tatou faaaogā e avea ma vailaau.”—The Boston Globe Magazine, Fepuari 4, 1990.

Mo ni mafuaaga tatau, ua fautuaina ai i latou o loo galulue i le falema‘i e faapea: “E alagatatau foi ona toe iloilo toto‘a le tulaga o lamatiaga ma mea aogā e maua mai tuigā toto ma saili isi togafitiga e sui ai.” (O upu faasisipa o a matou.)—Perioperative Red Cell Transfusion, fonotaga a le National Institutes of Health, Iuni 27-29, 1988.

Atonu e lē ioe faatasi foma‘i e tusa ai o aogā po o lamatiaga i le faaaogaina o le toto. E mafai e se tasi ona tuuina atu ni tuigā toto se tele ma talitonu faapea, e aogā le tapa atu i ai. O le isi atonu e mafaufau e lē lelei le faia faapea, auā sa iai iuga lelei na ia maua i togafitiga e aunoa ma se toto na faaaogā ai. O lea, i le faaiuga, o oe le gasegase, po o le matua, e ao ona faia le filifiliga. Aisea e pa‘ū ai ia te oe? Auā ua aafia ai lou tino, (po o le tino o lou alo), le ola, mataupu silisili, ma le faiā e sili ona tāua ma loloto ma le Atua.

E AMANAIA LAU AIĀ TATAU

I le tele o nofoaga i aso nei, e iai le aiā tatau e lē masolia a le gasegase e filifili ai le togafitiga o le a na taliaina. “O le tulafono o maliega aloaia a gasegase, ua faavaeina a‘e i ni taofi se lua: muamua, e iai le aiā tatau a le gasegase na te mauaina ai faamatalaga lava saunia e faia ai sana filifiliga poto e uiga i le togafitiga ua fautuaina; ma lona lua, e mafai e le gasegase ona filifili e talia po o le teena le fautuaga a le foma‘i. . . . Se‘i vaganā lava ua manatu i gasegase o ē e iai le aiā e faapea mai ai e leai, po o le ioe, e oo lava i le ioe mai faatasi ma ni tuutuuga, ae o le tele lava o isi mafuaaga faavae mo na maliega aloaia o gasegase ua faaleaogaina.”—Informed Consent—Legal Theory and Clinical Practice, 1987. *

 O nisi gasegase sa faafeagai ma teteega a o taumafai e faatino a latou aiā tatau. Atonu pe mai i se uo e iai ni ona lagona malolosi e uiga i se taotoga o le fuafuamomono (tonsillectomy), po o le inuina o antibiotics. Pe atonu o se foma‘i ua talitonu lava ia i le sa‘o o lana fautuaga. E oo foi i se sui o le falema‘i atonu o le a lē malie, ona o tulaga tau tulafono po o itu foi tau tupe.

Fai mai Dr. Carl L. Nelson: “E toatele fomai o ponaivi (orthopaedists) e filifili latou te lē faia taotoga o gasegase [Molimau]. O lo matou talitonuga e faapea, e iai i le gasegase le aiā e teena ai so o se togafitiga faafoma‘i. Afai e alagatatau e tusa ai ma mataupu faavae ona saunia ma le malupuipuia se taotoga a o alofia ai se togafitiga faapitoa, e pei o le tuigā toto, e tatau la ona avea o se mataupu o filifiliga.”—The Journal of Bone and Joint Surgery, Mati 1986.

O se gasegase e magafagafa, o le a na lē faamalosia se foma‘i e faaaogā se togafitiga e lē o lava i ai se agavaa o lena foma‘i. Peitai, e pei ona sa matauina e Dr. Nelson, e toatele lava foma‘i tuutoina ua mafai ona latou amanaia talitonuga o le gasegase. Na fautua mai se tagata tāua i Siamani e faapea: “O le foma‘i, e lē mafai ona ia teena le tuuina atu o fesoasoani . . . i le manatu faapea, afai o se Molimau a Ieova, e lē o ia te ia uma la togafitiga faafoma‘i e mafai ona faaaogaina. E ia te ia pea le tiute e tuuina atu ai le fesoasoani e tusa lava po ua faaitiitia avanoa ua tatalaina atu ia te ia.” (Der Frauenarzt, Me-Iuni 1983) E faapena le mafuaaga na ala ai ona iai ia falema‘i, e lē tau ina ia maua ai tupe, peitai, ia tautua i tagata uma e aunoa ma se faailogatagata. Ua faamatala mai e le faifeau a le lotu Katoliko, o Richard J. Devine e faapea: “E ui lava o le falema‘i e ao ona faia nisi taumafaiga uma faafoma‘i e faasaoina ai le ola ma le soifua mālōlōina o le gasegase, ae ao ona faamautinoa o tausiga faafoma‘i e lē o aafia ai [lona] loto fuatia ifo. E lē gata i lea, e ao ona alofia ituaiga uma lava o faiga faamalosi e amata mai le faaoleoleina o le gasegase i upu mālū e oo i le aumaia o se poloaiga mai le faamasinoga e faamalosia ai se tuigā toto.”—Health Progress, Iuni 1989.

NAI LO LE FAIA O FAAMASINOGA

E toatele tagata e ioe faapea, o le fale faamasino e lē o se nofoaga lea mo finauga totino faafoma‘i. E faapeī sou lagona pe afai ua e filifilia togafitiga e faaaogā antibiotics, peitai ua alu se tasi i le faamasinoga ina ia faamalosia le faia o sou taotoga ona o le fuafuamomono? Atonu pe manao se foma‘i e faia mea ua ia manatu i ai, o se tausiga lea ua sili, ae e lē o sona tiute le sailia o faamaoniga faaletulafono e soli ai au aiā tatau faavae. Ma talu ai ona o loo tuu e le Tusi Paia le taumamao mai le toto i tulaga tau amio e tutusa ma le aloese mai le faitaaga, o le faamalosia la o le toto i se Kerisiano, o le a tutusa lava lea ma feusuaiga faifaamalosi—o le toso tamaitai.—Galuega 15:28, 29.

Ae peitai, ua lipotia mai e le Informed Consent for Blood Transfusion (1989) e faapea, o nisi fale faamasino e matuā loto tigā lava pe a malie se gasegase e taliaina se lamatiaga talu ai ana aiā tatau faaletapuaiga, “ona latou faia lea o ni tuusaunoaga faaletulafono—po o manatu fatu fua ua faatulafonoina—e faataga ai le tuigā toto e faia.” Atonu o le a latou taumafai e fai se faamolemolega i le faapea atu, o loo aafia ai se ma‘itaga o se fafine, pe faapea mai foi o loo iai ni tamaiti e ao ona tausia. “O manatu fatu fua faaletulafono na,” ua fai mai ai le tusi. “Ua iai i tagata matutua atamamai le aiā tatau e teena ai togafitiga.”

O nisi o ē tausisi pea i le tuiina o le toto, ua lē amanaiaina le mea moni e faapea, o Molimau a Ieova latou te lē o teena togafitiga uma. Na o le tasi lava le togafitiga latou te teena lea ua  oo lava i ē atamamai faapitoa o faapea mai, e anoanoai ni lamatiaga. E masani lava o se faafitauli faafoma‘i e mafai ona faafoeina i ni auala eseese se tele. O na auala taitasi e tofu ma lamatiaga eseese. Pe e mafai e se faamasinoga po o se foma‘i ona pei o sē e pule e iloa po o lē fea lamatiaga “e sili ona lelei mo oe?” O oe lava e toatasi e te faamasinoina le itu lena. E maumaututū Molimau a Ieova, latou te lē mananao i se tasi e faia filifiliga mo i latou; o la latou lava lea avega tauave totino i luma o le Atua.

Afai e faamalosia e se faamasinoga ia te oe se togafitiga e inosia, e mafai faapefea i lenei mea ona aafia tele ai lou loto fuatia ifo ma le mea e matuā tāua, o lou faanaunauga ina ia e ola? Na tusi mai Dr. Konrad Drebinger e faapea: “E mautinoa lava o se faaaogaina sese o ni faanaunauga faafoma‘i, o le a faamalosia ai e se tasi se gasegase ina ia talia se togafitiga, ma lē amanaia ai lona loto fuatia ifo, ina ia togafitia ai o ia i le tino, ae i le feagai ai ma lona mafaufau, o se ta lea e oti ai.”—Der Praktische Arzt, Iulai 1978.

TAUSIGA ALOFA MO FANAU

O faamasinoga i fale faamasino e faatatau i le toto e tele lava ina aafia ai fanau. I mea e tutupu, ina ua talosaga ma le faaaloalo mātua alolofa e faaaogaina togafitiga e lē faaaogaina ai le toto, ae ua saili isi o ē e galulue faafoma‘i ina ia maua se lagolagosua tau faamasinoga e tuiina ai le toto. E moni, e ioe Kerisiano i tulafono po o gaoioiga faalefaamasinoga e puipuia ai le saunoa i fanau ma ia lē tuulafoaia. E lē taumate, po ua e faitau i mea na faamanu‘aina ai e nisi mātua se tamaitiiti po o le matuā lē faia i ai o ni tausiga faafoma‘i. Pagā se faanoanoaga! Ma le manino lava, e mafai e le Malo ma e ao foi ona gaoioi e puipuia se tamaitiiti ua tuulafoaiina. Ae ui i lea, e faigofie tele ona iloa le eseesega tele pe a talosaga atu se matua alofa ma manao foi i togafitiga faafoma‘i e sili ona lelei ma aogā, ae faia e aunoa ma le faaaogaina ai o le toto.

O nei mataupu faafaamasinoga, e masani ona taulai atu i se tamaitiiti o i se falema‘i. Pe na faapefea ona oo atu le tamaitiiti iina, ma aisea? E toetoe lava o mātua uma e manatu mamafa, e avatu a latou tamaiti ina ia mauaina se tausiga e sili ona lelei ma aogā. E pei ona sa naunau Iesu i tamaiti, e faapena foi i mātua Kerisiano ona naunau mo a latou fanau. O loo tautala le Tusi Paia e faatatau i ‘se failele e tausi lelei i ana tama.’ Ua faapena le alofa loloto o Molimau a Ieova mo a latou fanau.—1 Tesalonia 2:7; Mataio 7:11; 19:13-15.

O tulaga masani lava, o mātua uma e faia faaiuga e aafia ai le saogalemu ma ola o a latou fanau: Po o le a faaaogā ea le kesi po o le eletise e kuka ai mea‘ai a le aiga? Po o le a la avea ea le tamaitiiti i se malaga umi? Pe e mafai ona alu na o ia e taele i le sami? O na mea e aafia ai lamatiaga, e oo lava i lamatiaga e iu ai i le oti po o le ola. Peitai, e aloaia e tagata le faautaga a mātua, o lea la, o mātua ua tuuina i ai le aiā tatau autū i le toetoe lava i faaiuga uma e aafia ai a latou fanau.

I le 1979, na faamatala manino mai ai e le Faamasinoga Sili i le Iunaite Setete e faapea: “O le manatu o le tulafono e uiga i le aiga e faalagolago lea i luga o se manatu e faapea, o loo iai i mātua mea e lē o maua e fanau i le taumatuaina, le poto masani, ma le tomai i faaiuga e manaomia mo le faia o filifiliga tāua o le olaga . . . Talu ai o le filifiliga a se matua [i se mataupu faafoma‘i] e aafia ai lamatiaga, e lē faapea la o le a te‘i ai fua ua tuu atu le aiā tatau lea a le matua e faia ai ana filifiliga, ina ia faia mai e se sui po o se ofisa foi o le malo.”—Parham v. J.R.

O le tausaga lava lena e tasi na faatulafonoina ai e le Faamasinoga o Talosaga a Niu Ioka e faapea: “O le mea e sili ona tāua i le iloiloina po ua lē maua e se tamaitiiti le tausiga e atoatoa ona lelei faafoma‘i . . . o le tagai lea po ua saunia e mātua se laasaga e taliaina ai togafitiga faafoma‘i mo le la tamaitiiti e  tusa ai ma le malamalamaga o tulaga eseese o loo aofia ai. O lenei iloiloga, e lē mafai ona folasiaina atu i luga o ni aiaiga, pe sa faia e mātua se faaiuga ‘sa‘o’ pe ‘sese’ auā o le tulaga o loo fai ai nei le faiga o togafitiga i vailaau, e ui lava ina alualu i luma le aogā, ae seāseā lava faatagaina ai na faaiuga ua mautinoa. E lē mafai foi e le faamasinoga ona ia tauavea le vaega a se tasi o loo fai ma sui o se matua.”—In re Hofbauer.

Toe manatunatu i le faaaoaoga a mātua na la filifili pe fai le taotoga, po o le inu o antibiotics. O togafitiga taitasi e tofu lava ma lamatiaga. O mātua alolofa e iai le avega tauave e fuafua ai lamatiaga, o aogā, ma isi vala, ona fai ai lea o se faaiuga. I lenei sootaga, na fautuaina ai e Dr. Jon Samuels (Anesthesiology News, Oketopa 1989) se toe iloiloga o Guides to the Judge in Medical Orders Affecting Children (Ta‘iala i le Faamasino i Poloaiga Faafoma‘i e Afaina ai Fanau), lea na tu i lenei tulaga:

“O le poto faafoma‘i ua lē lava lona alualu i luma e mafai ai e se foma‘i ona muai folafola mai ma le mautinoa e faapea, o lana gasegase o le a ola pe oti . . . Afai o iai ni togafitiga eseese e filifili mai ai—pe afai foi, mo se faaaoaoga, ua fautua mai e le foma‘i se togafitiga e 80 pasene atonu e faamanuiaina ai ae lē faamaonia e mātua, ma e leai se tetee o mātua i se togafitiga e na o le 40 pasene atonu e faamanuiaina ai—e ao ona faia e le foma‘i le togafitiga e sili atu ona lamatia i le faafoma‘i ae o se laasaga e lē o teena e mātua.”

Ona o le tele o mea matautia ma le lamatia i le faaaogaina faafoma‘i o le toto, lea ua alia‘e, ma talu ai ona o loo iai isi ituaiga o togafitiga aogā e sui ai le faafoega, pe e lē o le aloese ea mai le toto o le a faaitiitia ai lamatiaga?

O le tulaga masani lava, e fuafua e Kerisiano le tele o vala pe afai e manaomia e so latou tamaitiiti se taotoga. O taotoga uma lava, e faaaogā po o le lē faaaogā ai le toto, e iai lava lamatiaga. O le ā e mafai ona avatu e se foma‘i e faamautinoa ai e leai ni lamatiaga? Atonu po ua iloa e mātua o foma‘i atamamai sa faamanuiaina lelei i taotoga na faia e aunoa ma se toto i fanau a Molimau. O lea la, e tusa lava pe iai se foma‘i po o se sui o se falema‘i e iai se isi ana togafitiga e sili ia te ia, nai lo le faapogaia o se fefinauaiga tau tulafono e faapopoleina ai ma faaumiumi ai fua le taimi, pe lē o se mea talafeagai ea mo i latou ona galulue faatasi loa ma mātua alolofa? Po o le sii foi e mātua o si a la tamaitiiti i se isi falema‘i o loo iai se aufaigaluega ua poto masani i le taulimaina o ia ituaiga o gasegase ma o loo malilie e faia faapena. O le mea moni, o togafitiga e aunoa ma le toto, o le a sili ona foliga mai o se tausiga aogā, auā e mafai ona fesoasoani i le aiga “ina ia ausia sini faafoma‘i pe lē faafoma‘i foi e tusa ma le tulafono,” e pei ona sa matauina muamua.

[Faaopoopoga i lalo]

 [Pusa i le itulau 18]

FAATOAMALIEINA O ATUGALUGA FAALETULAFONO

Atonu o le a e tau manatunatu, ‘Pe aisea e faanatinati ai nisi foma‘i ma falema‘i ia maua mai se poloaiga faafaamasinoga e faatagaina ai le tuuina o le toto?’ I nisi nofoaga, o le pogai taatele lava o le fefefe i tuua‘iga.

E leai lava se faavae mo sea atugaluga pe a filifilia e Molimau togafitiga e lē faaaogaina ai le toto. Ua tusi mai se foma‘i mai le Albert Einstein College of Medicine (i le Iunaite Setete o Amerika) e faapea: “O le toatele o [Molimau] ua uma ona latou sainia le pepa a le American Medical Association e faasaoloto ai foma‘i ma falema‘i i le tuua‘iga, ma e toatele o loo latou tauavea pepa mo Togafitiga Faafoma‘i (Medical Alert card). O se pepa ua sainia lelei e ta‘ua o le ‘Teena le Taliaina o Tuigā Toto’ o se maliega tau feagaiga, ma ua aloaia faaletulafono.”—Anesthesiology News, Oketopa 1989.

Ioe, ua ofoina atu ma le naunautai ia tulaga e Molimau a Ieova ma se faamautinoaga faaletulafono o le a lē aliali mai se mea e tuua‘ia ai se foma‘i ma falema‘i i le talosagaina o togafitiga e lē faaaogaina ai le toto. E pei ona fautuaina e tagata atamamai faafoma‘i faapitoa, e ao ona tauaveina e Molimau taitoatasi se pepa o Togafitiga Faafoma‘i. E faafouina faaletausaga lenei pepa ma ua sainia e le tagata ma ē e molimau, e masani ona sainia e ni tagata o lona aiga o ē e sili ona latou vavalalata.

Ia Mati i le 1990, na faamaonia ai e le Faamasinoga Sili i Ontario, i Kanata se faaiuga e faamaonia ai le aloaia faaletulafono o lea pepa e faapea: “O le pepa o se tautinoga tusitusia lea o se tulaga amanaiaina e mafai ai e lē o loo tauaveina e tusa ma le tulafono ona faailoa atu le teena o se faasasaāga [i le] feagaiga na faia ma le foma‘i.” I le Medicinsk Etik (1985), na tusi mai ai le polofesa o Daniel Andersen e faapea: “Afai ua iai se faamatalaga tusia maumaututu mai se gasegase e faapea mai ai, o ia o se tasi o Molimau a Ieova, ma na te lē manaomia le toto i lalo o so o se tulaga, o le faaaloalo mo le manaoga totino ua talosagaina e le gasegase e tatau ona aloaia, ia pei lava ona faamatalaina i ana upu.”

E faapena foi ona sainia e Molimau pepa o maliega tau feagaiga ma falema‘i. O se tasi o ia pepa o loo faaaogaina i se falema‘i i Freiburg, i Siamani, o loo iai se avanoa e mafai ai e le foma‘i ona faamanino le faamatalaga na ia tuuina atu i le gasegase e uiga i le togafitiga. A o luga a‘e la o le saini a le foma‘i ma le ma‘i, ua faaopoopo mai ai le pepa e faapea: “Ona o se sui o le lotu a Molimau a Ieova, ou te teena ai le faaaogaina o ni toto e ese po o vaega o le toto i le taimi a o fai lo‘u taotoga. Ua ou iloa o le taualumaga fuafuaina ma manaomia e iai sona lamatiaga maualuga ona o lavelave o le alu o le toto. Ina ua uma ona ou mauaina faamatalaga mae‘ae‘a lelei ae maise e uiga i lena itu, ona ou talosagaina ai lea e faapea, o le taotoga e manaomia ona fai, e faia e aunoa ma le faaaogaina o se toto e ese po o vaega o le toto.”—Herz Kreislauf, Aokuso 1987.

O le tulaga moni lava, o togafitiga e lē faaaogaina ai le toto atonu e itiiti ni lamatiaga. Peitai o le itu tāua i nei gasegase o Molimau, e fiafia e faamatuu atu so o se atugaluga e lē manaomia ina ia mafai ona gaoioi tagata galulue faafoma‘i aga‘i i luma i le faia o mea ua latou fuafua e ao ona fai, e fesoasoani ai ia maua e tagata le malosi. O lenei felagolagomaiga e aogā i tagata uma, e pei ona faaalia e Dr. Angelos A. Kambouris i “Taotoga Tetele Tau Manava o Tagata Molimau a Ieova”:

“O le maliega e fai muamua a o lei faia le taotoga e ao ona manatu i ai o se mea ua noatia ai le foma‘i o loo faia le taotoga, ma e ao ona tausisia pea e tusa lava po o ā mea e tutupu mai a o faagasolo le taotoga pe ina ua uma foi le taotoga. [O lenei itu] e manino lelei ai ma mautinoa e le gasegase a o aga‘i atu i o latou taotoga e togafitia ai, ma faaliliu ese ai le manatu o le foma‘i o taotoga, mai le mafaufauina o ala faaletulafono ma faafilosofia i itu tau taotoga ma le atamai faapitoa, ina ia taga ia te ia ona faia o le mea sili e oo i ai ma auauna ai mo manaoga sili o lana ma‘i.”—The American Surgeon, Iuni 1987.

[Pusa i le itulau 19]

‘‘O le soona faaaogaina o le togafitiga fou i suesuega faafoma‘i, o se vala autū lea i le faatelega o tupe faaalu mo le tausiga o le soifua mālōlōina i le taimi nei. . . . O le tuigā toto ua faapitoa ona tāua ona o iuga ma le maualuga o le lamatiaga e faaono tupu mai ai. E tusa ai ma lea itu, na faavasegaina tuigā toto e le Komisi Soofaatasi a Amerika e Faamaonia i Falema‘i e faapea, ua ‘maualuga lona alumia, ua tele ona lamatiaga, ma e faigofie ona sese.’”—“Transfusion,” Iulai-Aokuso 1989.

[Pusa i le itulau 20]

Iunaite Setete: “O loo iai i mea tonu tau amioga e tatau, le aiā tatau a tagata taitoatasi; o le filifiliga i le taunuuga o le tagata lava ia e tatau ona fai e le tagata patino o loo aafia ai. O le faavae faaletulafono e ala ai ona manaomia se maliega faapea, ona o se gaoioiga faafoma‘i e faia e aunoa ma le maliega o le gasegase, ua avea o se faaoolima.”—“Informed Consent for Blood Transfusion,” 1989.

Siamani: “O le aiā tatau a le gasegase i lona taofi maumaututu i lana filifiliga, ua faaleaogaina ai le mataupu silisili o le tuuina atu o le fesoasoani ma faasaoina ai le ola. O le iuga: e leai se tuigā toto e faia pe a tetee i ai lē o gasegase.”—“Herz Kreislauf,” Aokuso 1987.

Iapani: “E leai se ‘mea e sa‘o atoatoa’ i togafiti faafoma‘i. E talitonu foma‘i e faapea, o le laasaga o faiga faafoma‘i i ona po nei e sili ona lelei ma ia mulimuli ai, ae lē tatau ona faamalosia ana auiliiliga taitasi e faapea ua ‘sa‘o atoatoa’ i gasegase. O gasegase foi e ao lava ona iai le sa‘olotoga e filifili ai.”—“Minami Nihon Shimbun,” Iuni 28, 1985.

[Pusa i le itulau 21]

‘‘Ua ou iloaina o aiga [o Molimau a Ieova] e maopoopo ma fealofani,” o le lipoti mai lea a Dr. Lawrence S. Frankel. “E a‘oa‘oina fanau, e manatu mamafa i isi, ma faaaloalo. . . . E aliali mai e ono malolosi i latou i le usitaia o faatonuga faafoma‘i, atonu ua avea lea ma mea e faata‘ita‘ia mai ai lo latou naunau e talia faiga faafoma‘i i le tele e talafeagai ai ma o latou talitonuga.”—Department of Pediatrics, M. D. Anderson Hospital and Tumor Institute, Houston, U.S.A., 1985.

[Pusa i le itulau 22]

‘‘Ua fai mai Dr. James L. Fletcher, Jr., e faapea: “Ua ou fefe ona ua taatele le manatu faualuga o ē ua iai tomai faapitoa, ma ua latou suia ai filifiliga lelei faafoma‘i. O togafitiga ia ua faapea mai, ‘ua sili i aso nei,’ e oo atu foi taeao ua toe suia pe ua faaleaogaina. O lē fea la e sili atu ona matautia, o se ‘matua e mapolotu’ po o se foma‘i e manatu faasausili ua talitonu faapea o lana togafitiga e matuā tāua a‘ia‘i?”—“Pediatrics,” Oketopa 1988.