“Sierra Leona markan jakasiri Dauda sat jaqix akham siwa: Alay tuqinkir mä jiskʼa markan jilsuwayta. Jiskʼäskayäta ukhaxa, familiajampi ukat yaqha familiampiw mä uraqxat wal chʼaxwapxäna. Uka uraqix nayankiwa sasaw purapat sasipxäna. Uka jan waltʼäwi askichañatakix mä layqaruw jawsayapxi. Uka layqaxa mayni chachan amparaparuw mä espejo kattʼayi ukat mä janqʼu telampiw imxataraki. Ukat mä jukʼampiruxa, uka jaqix wal jumpʼitati ukat khathatiñ qalltaraki. Espejo uñkatasax akham sasaw artʼasi: ‘¡Mä chuymankipstat chachar jakʼachasisinkir uñjta! Jachʼa tansa, janqʼu isimpi isthaptʼata, qaqa pʼiqi ukat kʼumtʼatarakiw sarnaqi’ sasa.

Jïsa, ¡achachilajat parlaskäna! Ukat uka chachax wali mulljatäsinxa akham sasaw artʼasi: ‘¡Janiw chiqäkiti sasin sapxsta ukhaxa, jumanak pachpa aka espejot uñjir jutapxam!’ sasa. Chiqpachansa, janiw khitis uk uñjirix sarapkänti. Ukat layqax quqa laphinakampiw manqʼañ calabazar mä platorjam um waktʼayasax uka chachar chʼallakipi, ukhamatwa jan sustjatäxänti.

Espejo kattʼatäkäna uka chacha tuqiw ‘achachilajax’ awichajar uka uraqix familiasankiwa, jan llaktʼasisa uka uraqirux yapuchaskakim säna. Ukat uka yaqha familiax ukhamäpanay sasaw sapxäna. Ukhamat uka chʼaxwäwix askichasïna.”

 Inti jalant tuqinkir África tuqinakanxa, ukhamanakax waljapuniw istʼasi. Ukhamarak yaqha markanakan millón millón jaqinakaw jiwatanakax kawkhantï ajayunakax jakapki ukaruw sarapxi ukat ukhatpachas uraqinkirinakar uñchʼukinipkaspa, yanapirïpkaspas jan ukax jan waltʼayirïpkaspas ukham amuyapxi. ¿Ukax chiqäpachati? ¿Jiwatanakax chiqpachapunit jakasipkpacha? Jan ukhamäkchi ukhaxa, ¿khitinakas jiwatanakan ajayupäpxtwa sasax sapxpacha? Uka jisktʼanakat sum yatxatañaxa wali wakiskiripuniwa. Kunattix jakañasa jiwañasa ukarjamäxaspawa.