Ba Dauda abekala ku Sierra Leone batile, “Nakuliile mu mushi uunono uwaba mu citungu ca ku kabanga. Ilyo nali umwaice, aba mu lupwa lwesu balelwila impanga na ba mu lupwa lumbi. Bonse baleti ni mpanga yabo. Pa kupwisha ubu ubwafya balitile ing’anga. Ing’anga yapeele umwaume umo icilola, no kumufimba insalu iyabuuta. Tapapitile inshita, ulya mwaume atendeke ukututuma e lyo no kupiba. Ilyo aloleshe mu cilola apundile ukuti: ‘Namona shikulubantu aleisa! Afwele ifyabuuta. Mutali kabili mukote ne mfwi. Nakongama na pa kwenda.’

“Abo alemona ni bashikulu bandi. Lyena alikalipe no kulanda ati: ‘Nga mulemona kwati ndebepa iseni muimwene!’ Kwena bonse fye twalitiinine ukuyamona. Lyena ing’anga yalimusanshile amenshi ya muti uo yayabikile mu nsupa pa kuti aleke ukupunda.

“Bashikulu baebele umwaume uwalelolesha mu cilola ukulanda ati impanga yali ya lupwa lwesu, kabili bamama bafwile ukulalima muli iyi impanga ukwabula ukusakamana. Aba mu lupwa lumbi balisumine ifyapingwile bashikulu. E fyo no mulandu wapwile.”

 Ifya musango uyu filacitika sana ku West Africa. Nga filya fine caba ku ba ku West Africa, abantu abengi sana mu calo basumina ukuti abantu nga bafwa baya ku cifulo ca mipashi uko bamona ifilecitika pa calo, kabili balikwata amaka ya kucita ifyo balefwaya ku bantu. Bushe ifi balanda fya cine? Bushe abafwa baba fye ku cifulo cimbi? Nga ca kuti te fya cine, ni bani baifungushanya ukuba kwati mipashi ya bafwa? Nacicindama sana ukuti twishibe amasuko kuli aya mepusho pantu kuti kwalenga twaisaba no mweo wa muyayaya.