Dawuda, ka bɔ Siyera Leyɔne y’a fɔ ko: “Ne mɔna dugunin dɔ la saheli yanfan mara la. Siɲɛ dɔ la, ka ne denmisɛnma to, ne somɔgɔw ni du wɛrɛ mɔgɔw tun bilala ɲɔgɔn na dugukolo dɔ ko la. U fila bɛɛ y’a fɔ k’u ta don. Walisa ka o koɲɛ ɲɛnabɔ, somakɛ dɔ welela ka na. A ye dungare di cɛ wɛrɛ ma, ka fini jɛ biri a la. A ma mɛn dɔrɔn, cɛ ye yɛrɛyɛrɛ daminɛ fini kɔrɔ, ka wɔsi. A filɛlikɛtɔ dungare la, a y’i kanto ko: ‘Ne ɲɛ bɛ cɛkɔrɔba dɔ la min b’a la k’i magɛrɛ! Fini jɛw b’a kan na. A ka jan, a kɔrɔlen don, wa a kunsigi jɛlen bɛ. A kɔ kurulen dɔɔnin de bɛ ka taama.’

“A tun bɛ ne mɔkɛ de cogoya ɲɛfɔ! O kɔfɛ, a ŋanaŋanatɔ y’i pɛrɛn k’a fɔ ko: ‘N’aw dalen tɛ ne ka kuma la, aw yɛrɛw ka na a lajɛ!’ A jɛlen don k’an si ma farinya k’o kɛ! Somakɛ ye cɛ mada a kɛlen ka nasiji seri-seri a kan. O tun dilanna ni jiribulu ni ji ye; a tun b’a bolo filen dɔ kɔnɔ.

“A kumatɔ cɛ dungaretigi da la, ne ‘mɔkɛ’ y’a fɔ ko dugukolo tun ye ne somɔgɔw ta ye. A y’a fɔ ne mamuso ye k’a ka kan ka dugukolo in baara k’a sɔrɔ a ma kɛ ni tanbaki ye. Du tɔ kelen mɔgɔw sɔnna o kiri ma. Koɲɛ ɲɛnabɔra ten.”

 Nin maana sugu jɛnsɛnnen don Afiriki tilebin yanfan na. O yɔrɔ la, i n’a fɔ diɲɛ yɔrɔ tɔw la, mɔgɔ miliyɔn caman dalen b’a la ko furew bɛ taa fɛn hakililamaw sigiyɔrɔ la, ani ko yenni nɔ, u bɛ se ka dugukolo kan mɔgɔw ka ɲɛnamaya kɔlɔsi, k’u fanga digi u kan. O dannako ye tiɲɛ ye wa? Tiɲɛ bɛ furew ka ɲɛnamaya ko la wa? N’o tɛ tiɲɛ ye, minnu b’a fɔ k’u ye furew ye, olu ye jɔni ye? Nin ɲininkaliw jaabi jɔnjɔnw dɔnniya nafa ka bon haali. Ɲɛnamaya ni saya koɲɛ don.