Dauda nuʼij: «Xikʼïy pä chpan jun koʼöl tinamït ri kʼo pa norte che rä ri tinamït Sierra Leona. Kʼo jun qʼij, taq kʼa yïn akʼal na, kʼo jun chʼaʼoj xbʼanatäj chukojöl nfamilia rkʼë jun chik familia rma jun juyuʼ. Che kaʼiʼ familias yechʼojin wä chrij ri juyuʼ riʼ. Rchë xkisöl ri kʼayewal xkiskʼij jun ajqʼij. Ryä xyaʼ jun espejo pa ruqʼaʼ jun achï chqä xyaʼ jun säq tzyäq chrij. Jbʼaʼ chrij riʼ, ri achï riʼ kan kowan xxiʼij riʼ. Xtzuʼun chpan ri espejo y xuʼij: ‹¡Najin ntzʼët jun riʼj achï ri najin njelun pä! Säq rutzyaq, nüm raqän y wuqʼwïk nbʼiyïn›.

¡Kan yë wä nmamaʼ najin nutzjoj! Y rma ri xbʼïn·ïl, ri achï riʼ xuʼij: ‹¡We ma ninmaj ta ri najin nbʼij chiwä, kixampä y titzʼetaʼ rïx chpan ri espejo!›. Majun ta jun xrajoʼ xuʼän riʼ. Ri ajqʼij xchklaj ruyiʼal qʼayis chrij ri achï riʼ rchë xresaj ri xbʼïn·ïl chrij.

Ri achï ri xqʼalajin chpan ri espejo xuʼij che rä ri achï ri ruchapon wä ri espejo chë ri juyuʼ riʼ rchë wä nfamilia. Ryä xuʼij che rä watiʼt chë ma txiʼij ta riʼ tksaj ri juyuʼ. Rma riʼ, ri jun chik familia ma xchʼojin ta chik. Ri kʼayewal xsolotäj».

 Experiencias achiʼel reʼ yebʼanatäj chkipan kʼïy tinamït. Ye kʼïy winäq nkiquʼ chë taq jun winäq nkäm, nkʼaseʼ qa respíritu y ri espíritu riʼ nkowin yerutoʼ o yerutzʼlaʼ ri winäq. ¿Kantzij komä riʼ? ¿Kantzij komä chë ri kamnaqiʼ kʼo jun nkʼaseʼ qa chkë? We ma ke riʼ ta, ¿achoq rkʼë kʼa yetzjon wä ri winäq taq nkajoʼ yetzjon rkʼë jun kamnäq? Ri nqatamaj kiqʼalajsaxik re kʼutunïk reʼ kan kowan rejqalen, rma ya riʼ xtuʼän chë rkʼë jbʼaʼ xtqïl kʼaslemal o kamïk.