Kola qaja hnei Droda ne Siera Leone ka hape: “Eni a mele ngöne la ketre tribu kaco, ailopi ne la nöj. Ngöne la eni a nekönatr, ke, hna iwesitrë pi dro hnene la lapange memine la ketre fami. Nyidroti a ithepene laka isa ihnadro i nyidro. Celë hi matre, hna hëne la ketre trene haze troa isenyine la ewekë cili. Nyidrë a hamëne jë la ithulu kowe la ketre trahmany, me atuthi angeice ju hnei dara ka wië. Kola hmengöhmengöne lai trahmanyi hnine lai dara nge kola trotro la zihnu. Nge ame la angeic’a goëne lai ithulu, ke, angeic’a hmeke sesë me qaja ka hape: ‘Ca qatre trahmanyi la ka alemi koi ni! Hna hetrë ka wië asë hi. Ka qea draië nge qatre hë nyidrë, iqia ha nge kola wenini trootro.’

“Angeice hi lai a qeje qaaqaa! Kola sue hnei angeic, tune lo atr ka hmo hë me hape: ‘Maine epuni a jele thoi ni, ke, trohemi matre isa wange ju kö epun!’ Ngo, pëpi kö trene trenge catre e eahuni troa kuca lai! Ame hnene la ka kuci drösinö hna aupunyi angeic; hna trofi angeice hnene la trapë drösinö ka tiqa hnei dröne hnitr hna ce fica me tim, ene pe lapa hnyawa ju hi angeic.

“Öni qaaqaati jë hi qa hnine lo ithulu ka hape: “ame la hnepadro hna ithepen, ke, ewekë ne la fami eahun. Nyidrëti a qaja fe koi qaaqa ka hape, tha tro kö eahlo a qou troa huliwaane lai ihnadro. Nge ame hna kapa ju lai hna amekötine cili hnene lai ketre lapa. Celë hi aqane nyipune la iwesitrë.”

 Celë hi itre ewekë lai hna melëne ka traqa palahi ngöne la götrane ahuë ne Afirik. Ketre, ngöne la itre xaa götrane ne la fen, ke, alanyimu la ka mekune ka hape kola tro la nöjei ka meci kowe la mele ngöne la ua, nge atreine hi angatre e cili troa goeëne me ajojezine la mele ne la itre atr ka mele e celë fene hnengödrai. Hapeu nyipici kö lai? Tune ka lo itre ka meci hë, mele kö angatr? Nge maine pëkö, ke, drei kö la itre ka nyi ua ne la itre ka meci hë? Nyipi ewekë troa atre hnyawa la nyine sa kowe la itre hnyinge celë, pine laka jëne mele hi lai. Celë hi matre troa isa iën: mel, maine mec.