Dauda ni jɛ Sierra Leone lɛ gba akɛ: “Mida yɛ akrowa bibioo ko mli yɛ maŋ lɛ kooyigbɛ kpokpaa lɛ nɔ. Be ko beni miji gbekɛnuu fioo lɛ, shikpɔŋ he bei ko te shi yɛ miweku lɛ kɛ weku kroko ko teŋ. Wekui enyɔ lɛ fɛɛ kɛɛ amɛshikpɔŋ ni. No hewɔ lɛ ayatsɛ tsofatsɛ kɛba, koni ebaye sane lɛ. Kɛkɛ ni ekɛ ashwishwɛ ha nuu kroko ko, ni ekɛ klala ha enɔ. Etsɛɛɛ ni nuu ni yɔɔ mama lɛ shishi lɛ bɔi kpokpomɔ ni latsaa bɔi lɛ tsaa. Beni ekwɛ ashwishwɛ lɛ mli lɛ, ebo akɛ: ‘Miina nuumo ko miinyiɛ kɛmiiba! Ewo atade yɛŋ. Ekɛ ni egbɔ, ni eyiteŋ fɛɛ eyɛ, ni edɔɔ emli fioo kɛnyiɛɔ.’

“Wɔnii he ewieɔ nɛɛ! Kɛkɛ ni ebɔi enifeemɔ tamɔ mɔ ni nɔ ko eyi enɔ ni ekɛɛ: ‘Kɛji nyɛheee nɔ ni miwieɔ lɛ nyɛyeee lɛ, no lɛ nyɛ diɛŋtsɛ nyɛbakwɛa!’ Yɛ anɔkwale mli lɛ, wɔteŋ mɔ ko naaa ekaa ni ebaaya eyafee nakai! Ni tsofatsɛ lɛ kɛ baa ko ni ekɛwo nu mli ni ekɛfeɔ ashwai, ni ehiɛ yɛ tsene mli lɛ shwa enɔ ni ekɛjɔɔ ehe.

“Kɛkɛ ni ‘Wɔnii’ wie kɛtsɔ nuu ni kwɛɔ ashwishwɛ lɛ mli lɛ nɔ, ni ekɛɛ akɛ shikpɔŋ lɛ ji wɔweku lɛ nɔ. Ni ekɛɛ minaa akɛ ebaanyɛ etsu nii yɛ shikpɔŋ lɛ nɔ ni naagba ko kwraa bɛ he. Weku kroko lɛ kpɛlɛ kojomɔ lɛ nɔ. Kɛkɛ ni akɛna sane lɛ naa kwraa.”

 Afɔɔ niiashikpamɔi ni tamɔ nɛkɛ numɔ yɛ Afrika Anaigbɛ. Gbɔmɛi akpekpei abɔ ni anyɛŋ akane, ni yɔɔ biɛ, taakɛ eji yɛ je lɛŋ hei krokomɛi fɛɛ lɛ heɔ yeɔ akɛ mɛi ni egboi lɛ tsaa nɔ kɛyaa mumɔi ajeŋ, ni amɛnyɛɔ amɛjɛɔ jɛmɛ amɛkwɛɔ gbɔmɛi ashihilɛ yɛ shikpɔŋ nɔ ni amɛnaa amɛnɔ hewalɛ. Ani nɛkɛ hemɔkɛyeli nɛɛ ji anɔkwale? Ani gbohii lɛ ahiɛ kamɔ lɛlɛŋ? Kɛ jeee nakai lɛ, namɛi ji mɛi ni kɛɔ akɛ amɛji mɛi ni egboi lɛ amumɔi lɛ mɔ? Nɛkɛ sanebimɔi nɛɛ ahetoi ni ja ni wɔɔle lɛ he miihia waa diɛŋtsɛ. Eji wala-kɛ-gbele sane.