“Yẹn yin pinpọn e go whẹ́n to gbetatò pẹvi ayimatẹn agewaji tọn de mẹ,” wẹ Dauda dọ sọn Sierra Leone. “To ojlẹ de mẹ, to whenuena yẹn yin visunnu pẹvi de, nudindọn aigba tọn de tin to ṣẹnṣẹn whẹndo ṣie po whẹndo devo po tọn. Whẹndo awe lẹpo sọalọakọn dọ emi tọn wẹ aigba lọ yin. Nado didẹ whẹho lọ, dawe obówatọ de yin yiylọ biọ whẹho lọ mẹ. E yi mẹpọnnu de na dawe devo, enẹgodo e yí ala wewe de ṣinyọn nẹẹ. To madẹnmẹ dawe he tin to avọ glọ lọ jẹ sisọsisọ ji bosọ jẹdẹn. Dile ewọ pọn mẹpọnnu lọ mẹ, e dawha to ajijimẹ dọmọ: ‘yẹn mọ dawe yọnhonọ de to dindọnsẹpọ!’ ewọ yin aṣọdona po ala wewe foo de po. Ewọ dite bosọ poyọnho, po owhà po, bosọ to zọnlinzin kluyọ-kluyọ.’

“Ewọ to baba daho jlẹ! Enẹgodo e gọna avosisa zẹjlẹgo bosọ dawha daga dọmọ: ‘Eyin mì ma yi nuhe yẹn to didọ sè, mì wá pọn na mìde!’ Na nugbo tọn, depope to mí mẹ ma tindo adọgbigbo sọmọ nado wà mọ gba! Dawe obówatọ lọ whiwhẹ ẹ gbọn masin flusọ nujijlẹ tọn lẹ hunhun do e ji dali, he ewọ zehẹn to oká de mẹ.

“To hodọ gbọn dawe mẹpọnnunọ lọ gblamẹ, ‘Baba daho’ dọ dọ aigba lọ yin whẹndo mítọn tọn. Ewọ dọna onọdahó ṣie dọ ewọ dona wazọ́n to aigba lọ ji matin nuhiha depope. Whẹndo awetọ kẹalọyi whẹdida lọ. Nudindọn lọ yin hinhẹn gbọ.”

 Numimọ mọnkọtọn lẹ yin nuhe gbayipe to Wheyihọ Mẹyugbeji (Afrique) tọn. Tofi, dile e te do to awa aihọn tọn devo lẹ ji, livi susu madosọha lẹ yise dọ oṣiọ lẹ nọ lẹkọyì lẹdo gbigbọ tọn de mẹ, fie yé penugo nado doayinugo bosọ yi huhlọn zan do gbẹzan gbẹtọ he tin to aigba ji lẹ tọn ji. Be yise ehe yin nugbo ya? Be oṣiọ lẹ tin to ogbẹ̀ na taun tọn ya? Eyin e ma yin mọ, mẹnu wẹ yin enẹnọ he nọ sọalọakọn nado yin gbigbọ oṣiọ tọn lẹ? Yinyọn ­gblọndo he sọgbe kanbiọ ehelẹ tọn yin onu titengbe ­tangan de. E yin whẹho ogbẹ̀-po-okú po tọn de.