“Ami mbe kurira motjihuro otjiṱiṱi mondendera yeyuva kokunene,” Dauda waSierra Leone otji ma yarura po. “Otjikando tjimwe, ami ngunda a mba ri omuzandona, pa ri ombata ohunga nehi pokati keṱunḓu retu neṱunḓu rarwe. Ayeevari ya ri nomaheya wokukara nouini wehi tjingero. Okuyandisa otjiposa, pa isanewa ombetere. Oyo ya yandja otjiritarero komurumendu warwe, okuzambo a i mu kutjire nongwava ombapa. Katjimanga omurumendu kehi yongwava wa uta okuzezera nokurukutura. Otja tja tara motjiritarero, eye wa tja: ‘Ami me munu omurumendu omukururume ngu ma tukuruka! Eye wa hwikike ozombanda ozombapa. Eye omure nomukurupe, u nozonḓi, neye ma kaondja ayoo ongota.’

“Eye aa handjuṋuna Honini! Eye okuzambo wa uta okurira nokuyora na urakana: ‘Eṋe indu tji mu hinokukambura ami mbi me hungire, indjeye mu ritarere oveni!’ Otjinga pe ri, kape na umwe wetu ngwa ri na imbwi oupenda okutjita ho! Ombetere ye mu poreka mokutjatja kombanda ye ovirunga vyoviyao nomeva woundjai, oyo ngu ya ṱizire mondjupa.

“Ama hungire mokutuurungira momurumendu wotjiritarero, ‘Honini’ wa tja ehi ra ri ouini weṱunḓu retu. Eye wa raera tjikurukaze wandje kutja eye wa sere okupurura ehi nokuhinongendo. Eṱunḓu indi ekwao ra yakura ombanguriro. Ombata ye ya komaandero.”

 Ozondjiririra ohamukwao na inḓo ouandaraze moAfrika kOngurova. Imba, otja motupa tware twouye, omangete omahavarwa ye kambura kutja ovaṱi ve tapakaṋa kouye wozombepo, imba owo pu ve ka sora okutarera nokutjurura ominyo vyovandu kombanda yehi. Ongamburiro ndji ouatjiri? Ovaṱi tjiri ve nomuinyo? Tji pe he ri, oouṋe imba mbe tataimba kutja owo ozombepo zovaṱi? Okutjiwa omaziriro omasemba komapuriro nga okunanḓengu tjinene. Otjo otjiposa tjomuinyo nonḓiro.