Dauda, muena Sierra Leone, udi ulonda ne: “Mvua mukolele mu provense wa ku Nord wa ditunga mu musoko mukese. Pantshivua nsongalume, dîku dietu divua ne matandu ne dikuabo dîku bua tshilumbu tshia budimi. Bubidi buawo avua afuila budimi. Bua kukosa tshilumbu, bakabikidisha mpaka-manga. Wakapesha mukuabo muntu lumuenu, e kumubuikila ne tshilamba tshitoke. Kupita mutantshi mukese, muntu uvua mubuikila tshilamba tshitoke wakatuadija kukanka ne kuela tshisululu. Wakatangila mu lumuenu, e kuamba ne: ‘Ndi mumona muntu mukulakaje wenda ulua! Mmuvuale bilamba bitoke. Udi mule ne mukulakaje wa nsuki mitoke, ne udi wenda ne mukobame.’

“Uvuaye wamba eu uvua kaku! Wakatuadija kuenza bu muena mukupa ne kuela dîyi dikole ne: ‘Panuikala kanuyi nuitaba tshindi ngamba, luayi nudimuene!’ Kabiyi mpata, nansha umue wa kutudi kavua mua kupeta dikima dia kudimuena! Mpaka-manga wakamutalaja ne dimunyakila buanga bua majimbu buenza ne mabeji a mitshi ne mâyi, buvua mu kalowo.

“Ku butuangaji bua muntu uvua ne lumuenu, ‘Kaku’ wakamba ne: budimi buvua bua dîku dietu. Kuambilaye kaku-mukaji bua kubudima kayi utshina bualu. Dîku dikuabo diakanyisha dîyi edi. Tshilumbu tshiakakoseka.”

 Malu a mushindu’eu adi atamba kumueneka mu Afrike wa kudi dîba dibuelela. Apa, anu bu mu bikuabo bitupa bia buloba, miliyo ya bantu kabayi kubala badi bela meji se: bafue batu babuela mu muaba wa nyuma, mudibo mua kumona ne kukokesha bantu badi pa buloba. Mbia bushuwa anyi? Bafue batu ne muoyo menemene anyi? Pikalabi kabiyi nanku, mbanganyi badi badiamba mudibo spiritu ya bafue? Mandamuna malelela ku nkonko eyi adi ne mushinga udi utangila muoyo wetu. Ntshilumbu tshia lufu anyi tshia muoyo.